បារាំងមិនចុះញ៉មនឹងពួកជីហាតអ៊ីស្លាមជាដាច់ខាត
មួយថ្ងៃបន្ទាប់ពីចំណាប់ខ្មាំងជនជាតិបារាំង ត្រូវបានពួកអ៊ីស្លាមជ្រុលនិយមនៅអាល់ហ្ស៊េរីសម្លាប់ដោយអារកទាំងរស់ ប្រទេសបារាំង ទាំងថ្នាក់ដឹកនាំ ទាំងប្រជាជនទូទៅមានការតក់ស្លុត ជាខ្លាំង បន្តែ ទន្ទឹមនឹងនេះ រដ្ឋាភិបាលបារាំងបានសម្រេចយ៉ាងម៉ឺងម៉ាត់ ថានឹងបន្តបេសកកម្មកម្ចាត់ពួកជីហាតអ៊ីស្លាមឲ្យអស់។ ទាហានអាកាសបារាំងបានធ្វើការវាយប្រហារថ្មីមួយទៀត ទៅលើទីតាំងពួកជីហាតនៅអ៊ីរ៉ាក់។ ចំណែកនៅក្នុងប្រទេសបារាំងវិញ អជ្ញាធរបានចាត់វិធានការយ៉ាងតឹងរឹង ដើម្បីទប់ស្កាត់រាល់ការធ្វើភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ប្រធានាធិបតីបារាំងលោកហ្រ្វង់ស័រ ហូឡង់ បានកោះប្រជុំជាបន្ទាន់នៅព្រឹកថ្ងៃព្រហស្បតិ៍ម្សិលមិញ ដើម្បីដាក់វិធានការឲ្យបានម៉ត់ចត់ទាក់ទិនទៅនឹងការគំរាមកំហែង ថាអាចនឹងមានអំពើភេរវកម្ម បង្កឡើងដោយពួកភេរវករអ៊ីស្លាមនៅបារាំង។ ការប្រជុំបន្ទាន់នេះ ធ្វើឡើងភ្លាមៗ មួយថ្ងៃបន្ទាប់ពីជនជាតិបារាំងម្នាក់ ត្រូវបានពួកឧទ្ទាមអ៊ីស្លាមនៅអាល់ហ្ស៊េរី អារកសម្លាប់ចោល។ ការសម្លាប់ដ៏សាហាវព្រៃផ្សៃនេះ ជាការគំរាមកំហែងរបស់ពួកបណ្តាញជីហាតនៅអាល់ហ្ស៊េរី ធ្វើទៅលើបារាំង ព្រោះថាបារាំងបានចូលរួមធ្វើការវាយប្រហារលើពួកជីហាតនៅអ៊ីរ៉ាក់ជាមួយអាមេរិក។
ទោះបីជាយ៉ាងណាក៏ដោយ លោកប្រធានាធិបតីបារាំង បានថ្លែងថា បារាំងមិនចុះញ៉មនឹងការគំរាមកំហែង របស់ពួកឃាតករសាហាវយង់ឃ្នង ដូចពួកជីហាតឡើយ។ បារំាងបានប្តេជ្ញាចិត្ត ថានឹងវាយកម្ទេចពួកនេះឲ្យអស់ ដើម្បីធានាសុន្តិសុខ និងសុវត្ថិភាពដល់ប្រជាជនទូទាំងពិភពលោក។ ជាក់ស្តែងនៅព្រឹកថ្ងៃព្រហស្បតិ៍ម្សិលមិញនេះដែរ ទ័ពអាកាសបារាំង បានប្រើប្រាស់យន្តហោះរ៉ាហ្វាល់ បាញ់កម្ទេចទីតាំងរបស់ពួកជីហាតមួយទៀតនៅអ៊ីរ៉ាក់។ ទន្ទឹមគ្នានេះ កងទ័ពអាកាសអាមរិក និងកងទ័ពប្រទេសអារ៉ាប់៥ទៀត បានរួមគ្នាវាយកម្ទេចទីតាំងផលិតប្រេង របស់ពួកជីហាត នៅក្នុងប្រទេសស៊ីរី។
ចំណែកនៅក្នុងប្រទេសបារាំងវិញ រដ្ឋាភិបាលបានដាក់បញ្ជា ឲ្យរឹតបន្តឹងសន្តិសុខ នៅតាមទីកន្លែងសាធារណៈ ដែលមានមនុស្សម្នាច្រើន ដើម្បីធានាទប់ស្កាត់ រាល់អំពើភេរវកម្មដែលអាចបង្កឡើងជាយថាហេតុ ដោយពួកភេរវករអ៊ីស្លាម។ ទន្ទឹមនឹងនេះដែរ ក្រសួងការបរទេសបារាំង បានធ្វើការអំពាវនាវ ឲ្យប្រជាជនបារាំងដែលនៅក្រៅប្រទេសទាំងអស់ ឲ្យធ្វើការប្រុងប្រយ័ត្នខ្ពស់ ពេលធ្វើដំណើរទៅណាមកណា ហើយត្រូវផ្តល់ព័ត៌មាន ដល់ស្ថានកុងស៊ុលបារាំង ឲ្យបានរួសរាន់ ក្នុងករណីមានហេតុការអ្វីកើតឡើង។
សូមរំលឹកផងដែរថា ក្នុងយុទ្ធនាការបោសសម្អាតពួកឧទ្ទាមអ៊ីស្លាមជ្រុលនិយម បារាំងទើបតែបានអនុម័តច្បាប់ប្រឆាំងភេរវកម្មថ្មីមួយ កាលពីថ្ងៃ ១៨ កញ្ញា ថ្មីៗនេះ។ ច្បាប់នេះត្រូវបានអនុម័ត ដើម្បីទប់ស្កាត់យុវជនបារាំងដើមកំណើតអាហ្វ្រិក មិនឲ្យទៅចូលរួមធ្វើជាភេរវករតាមការអូសទាញរបស់ពួកជីហាតនៅអ៊ីរ៉ាក់ និងស៊ីរី។ សូមបញ្ជាក់ថា មិនមែនមានតែបារំាងមួយទេ ប្រទេសនៅអឺរ៉ុបផ្សេងទៀតក៏ដូចគ្នាដែរ គឺកំពុងតែនាំគ្នាទប់ស្កាត់ ការហូរចូលរបស់យុវជនដែលកាន់សាសនាអ៊ីស្លាម ទៅក្នុងសមរភូមិតំបន់ដើមបូព៌ា ក្រោមការអូសទាញ ពង្វក់របស់មេពួកជីហាតជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ