បារាំង ៖ ផែនការប្រយុទ្ធប្រឆាំងនឹងអ៊ីស្លាមជ្រុលនិយម ជីហាដ គ្មានប្រសិទ្ធភាព ?
ចុះផ្សាយនៅថ្ងៃ៖
ស្តាប់ - ០៧:៥០
ជនសង្ស័យក្នុងរឿងបាញ់ប្រហារនៅសារមន្ទីរជ្វីហ្វ ប្រទេសប៊ែលហ្ស៊ិក ដែលបានសម្លាប់មនុស្សបីនាក់ និងរបួសធ្ងន់ម្នាក់ ត្រូវបានចាប់ខ្លួន នៅក្នុងប្រទេសបារាំង។ ជនសង្ស័យនេះគឺជាពលរដ្ឋបារាំង ហើយដែលធ្លាប់ចេញទៅធ្វើសង្រ្គាមជីហាដ នៅក្នុងប្រទេសស៊ីរី។ ជនសង្ស័យជាច្រើនរូបផ្សេងទៀតត្រូវបានចាប់ខ្លួន នៅថ្ងៃចន្ទនេះ ក្នុងរឿងជាប់ពាក់ព័ន្ធនឹងបណ្តាញជីហាដ ក្នុងប្រទេសបារាំង។ សំណុំរឿងនេះកំពុងតែធ្វើឲ្យផ្ទុះឡើងវិញនូវភាពចម្រូងចម្រាស ជុំវិញសមត្ថភាព ឬអសមត្ថភាពរបស់អាជ្ញាធរបារាំង ក្នុងការទប់ស្កាត់ក្រុមអ៊ីស្លាមជ្រុលនិយម នៅក្នុងទឹកដីរបស់ខ្លួន។
គឺនៅថ្ងៃទី ២៤ ឧសភា សប្តាហ៍មុន ដែលមានការបាញ់ប្រហារនៅមុខសារមន្ទីរជី្វហ្វ កណ្តាលក្រុងព្រុចសែល ប្រទេសបែលហ្ស៊ិក ដោយខ្មាន់កាំភ្លើងម្នាក់ បង្កឱ្យទេសចរជាតិអ៊ីស្រាអែលពីរនាក់ប្តីប្រពន្ធស្លាប់ និងអ្នកធ្វើបដិសណ្ឋាកិច្ចម្នាក់រងរបួសធ្ងន់។ ការបាញ់ប្រហារប្រឆាំងនឹងសហគមន៍ជ្វីហ្វ នេះត្រូវបានមើលឃើញថាជាគំនិតស្អប់ខ្ពើម ប្រកាន់ពូជសាសន៍ ប្រឆាំងនឹងពូជសាសន៍ជ្វីហ្វ ឬអ៊ីស្រាអែល ដែលគ្រប់គ្នាបានបរិហារ។ ហើយឥលូវជនសង្ស័យ ដែលជាអ្នកបាញ់ប្រហារនោះ ត្រូវចាប់ខ្លួនបាន នៅប្រទេសបារាំង និងជាពលរដ្ឋបារាំង ដែលមានដើមកំណើតនៅភាគខាងជើងប្រទេសជាប់ របងជាមួយនឹងប្រទេសបែលហ្ស៊ិកតែម្តង។
ចាប់ខ្លួនជនសង្ស័យមួយសប្តាហ៍ក្រោយហេតុការណ៍បាញ់ប្រហារ
មានវត្ថុភស្តុតាងជាច្រើន ដែលប៉ូលិសរកឃើញនៅនឹងខ្លួន ដូចជាកាំភ្លើង អាកា ដែលដូចគ្នាបេះបិទនៅកាំភ្លើងដែលប្រើក្នុងហេតុការណ៍នៅព្រុចសែល កាំភ្លើងខ្លីដែលបញ្ចូលគ្រាប់រួចជាស្រេច ម៉ាស៊ីនថតរូប ដែលថតលម្អិតការបាញ់ប្រហារ បញ្ជាក់អំពីសកម្មភាពជីហាដរបស់ខ្លួន។
ពេលនេះ ជនសង្ស័យ កំពុងស្ថិតក្នុងការឃុំឃាំងបណ្តោះអាសន្ន ពីបទឃាតកម្ម មានអាវុធជាប់ខ្លួន និងមានពាក់ព័ន្ធនឹងអង្គការភេរវនិយម ដែលនឹងអាចមានរយៈពេលយូរ បើឈរទៅលើកំរិតនៃការគំរាមកំហែងភេរវកម្ម។
ការចាប់បានជនសង្ស័យ ជាដំណាក់កាលដ៏សំខាន់ ប៉ុន្តែ គឺកាលៈទេសៈនិងលក្ខខណ្ឌនៃការចាប់ខ្លួន ដែលបំផុសឱ្យមានសំណួរជាច្រើនជុំវិញ សកម្មភាពប្រយុទ្ធប្រឆាំងនឹងភេរវកម្មនៅប្រទេសបារាំងនេះ។ មានអាយុ ២៩ឆ្នាំ មេឌី នេមូស ជាជនសង្ស័យ ត្រូវបានចាប់ខ្លួន ពីបទមានអាវុធជាប់នឹងខ្លួន ដោយភ្នាក់ងារគយ ពេលឆែកឆេរឡានក្រុង នៅក្រុងម៉ាសី ភាគខាងត្បូងប្រទេសបារាំង។ ការឆែកឆេរដែលទំនងធ្វើឡើងដើម្បីរកចាប់វត្ថុខុសច្បាប់ មានជាគ្រឿងញៀន អាភៀនជាដើម។ល។ ព្រោះឡានក្រុងនោះ ធ្វើដំណើរចេញមកពីប្រទេសហូឡង់ ដែលស្ថិតនៅភាគខាងជើងប្រទេសបារាំង។ មិនមែនដោយក្រុមប៉ូលិសប្រឆាំងភេរវកម្មអីទេ។
ជនសង្ស័យមានឈ្មោះក្នុងបញ្ជីខ្មៅ
ម្យ៉ាងទៀតរូប មេឌី នេម៉ូស ដែលមានកំណើតកើតជានៅភាគខាងជើងប្រទេស មានឈ្មោះក្នុងបញ្ជីខ្មៅគួរតាមដាន ព្រោះជាក្មេងដែលមានប្រវត្តិមិនល្អ ធ្លាប់ជាប់ពន្ធនាគារជាច្រើនលើកច្រើនសា ពីបទលួចប្លន់ហិង្សា នៅចន្លោះរវាងឆ្នាំ២០០៤-០៩។ ទោសចុងក្រោយមានរយៈពេល៥ឆ្នាំក្នុងគុក ! គឺក្នុងអំឡុងពេលនោះហើយ ដែលមេឌី បាន បញ្ចូលខ្លួនស៊ុបជា អ្នកអ៊ីស្លាមជ្រុលនិយម។ នៅចុងឆ្នាំ២០១២ មេឌី បានធ្វើដំណើរទៅប្រទេសស៊ីរី និងស្នាក់នៅទីនោះ រយៈពេលជាងមួយឆ្នាំ ជាមួយក្រុមអ៊ីស្លាមជ្រុលនិយម ដែលហិង្សាបំផុត មានជាអាទិ៍ក្រុមរដ្ឋអ៊ីស្លាមអ៊ីរ៉ាក់ និងឡឺវ៉ង់ តំណាងដោយអក្សរកាត់ EIIL ដូចមានឆ្លាក់លើទង់ក្រណាត់សដែលមេឌីដាក់តាមខ្លួនជាភស្តុតាង។
បើតាមរដ្ឋអាជ្ញាក្រុងប៉ារីស ជនសង្ស័យនេះ ត្រលប់ចូលអឺរ៉ុបវិញ ដោយឆ្លងកាត់ ប្រទេសម៉ាឡេស៊ី សិង្ហបុរី និងថៃ មុនមកចុះនៅអាល្លឺម៉ង់ នៅខែមីនាឆ្នាំ២០១៤ ដើម្បីបំបែងដានក្រុមប៉ូលិស។
ផែនការប្រយុទ្ធប្រឆាំងនឹងបណ្តាញជីហាដ
បើយោលទៅប្រវត្តិនិងដំណើរដើមទងរបស់ជនសង្ស័យនេះ គឺពិតណាស់ដែលការតស៊ូមតិជុំវិញការតាមដានបេក្ខជនជីហាដ គួរតែផុសផុលឡើងនោះ។ បើតាមការប៉ាន់ស្មាន មានពលរដ្ឋបារាំង និងអ្នករស់នៅ សុ្រកបារាំង ប្រមាណ ៧៨០នាក់ និង បែលហ្ស៊ិក ប្រមាណ២០០នាក់ បានធ្វើដំណើរទៅស៊ីរី ដើម្បីបំផ្លែងខ្លួនជាជីហាដ។
តាមការពិតបារាំងបានដាក់ចេញ នូវផែនការប្រយុទ្ធប្រឆាំងនឹងបណ្តាញជីហាដ តាំងពីខែមេសាមក។ ក្នុងរយៈពេលតែបីសប្តាហ៍ដំបូងសោះ គេកត់ត្រាបាន៧០ករណី និងរារាំងមិនឱ្យសិស្សជីហាដចេញដំណើរទៅស្រុកអ៊ីស្លាមបាន៥-៦ករណី។ ក្រុមបេក្ខជនជីហាដ មានឈ្មោះក្នុងបញ្ជី ត្រូវបញ្ជូនទៅឱ្យក្រុមប្រយុទ្ធប្រឆាំងភេរវនិយមតាមដាន នៅពេលណា ក្រុមនេះធ្វើដំណើរ ចេញ ឬចូលស្រុក។ ក្នុងករណីមានសកម្មភាពជាបណ្តាញនិងជាក្រុម ប៉ូលិសឆាប់មើលឃើញជាងការបញ្ចេញសកម្មភាពជាលក្ខណៈបុគ្គល តែឯងដាច់ដោយឡែក ដូចយ៉ាងករណីជនសង្ស័យ មេឌីនេះ។
ភ្នាក់ងារប្រយុទ្ធប្រឆាំងនឹងភេរវនិយម គ្មានមធ្យោបាយដាក់តាមដាន គ្រប់ជនសង្ស័យ ឬធ្វើបញ្ជីឈ្មោះតាមកំរិតគ្រោះថ្នាក់បានឡើយ។ ការតាមដាន២៤ម៉ោងលើ២៤ម៉ោង ជនជីហាដម្នាក់ ត្រូវការមានក្រុមការងារយ៉ាងហោចទៅ៥នាក់ និងត្រូវការប្រើធនធានច្រើន ព្រោះគ្មានអ្វីជាច្បាស់លាស់ទេ។
ហេតុការណ៍បាញ់ប្រហារនៅបែលហ្ស៊ិក និងការចាប់ខ្លួនជនសង្ស័យបាននៅពេលនេះ ជាមេរៀនបញ្ជាក់អំពីការគំរាមកំហែងភេរវកម្ម ដែលបារាំងហាក់ដូចយឺតយ៉ាងខ្លាំងក្នុងវិស័យនេះ។ ម្សិលមិញ រដ្ឋមន្ត្រីក្រសួងមហាផ្ទៃបារាំង និងបែលហ្ស៊ិក បានចេញសេចក្តីថ្លែងការណ៍រួម ពង្រឹងការតានដានថ្នាក់អឺរ៉ុបលើសកម្មភាពបេក្ខជនជីហាដ ដែលទៅនិងមកពីស៊ីរី និងបានរំលឹកអំពី ការប្តូរផ្លាស់ច្បាប់ ដែលនឹងអនុញ្ញាតឱ្យអាជ្ញាធរអាចដកលិខិតឆ្លងដែន ឬហាមឃាត់មិនចេញពីប្រទេស ចំពោះជនណាដែលមានជាប់សង្ស័យមានទំនាក់ទំនងជាមួយបណ្តាញភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ