បារាំងកោះហៅឯកអគ្គរដ្ឋទូតអាមេរិកជុំវិញសកម្មភាពចារកិច្ចលើពលរដ្ឋបារាំង
ចុះផ្សាយនៅថ្ងៃ៖
ស្តាប់ - ០៤:៥៨
បញ្ហាចម្រូងចម្រាស ជុំវិញសកម្មភាពចារកិច្ចអាមេរិកនៅបរទេស នៅតែបន្តកើតមាន។ ផុតពីរឿងអាស្រូវមួយ ផ្ទុះរឿងមួយថ្មីមកទៀត។ នៅថ្ងៃនេះ មានលេចចេញព័ត៌មានមួយទៀតថា ទីភ្នាក់ងារចារកិច្ចអាមេរិកបានលបយកការណ៍សម្ងាត់ នៅក្នុងប្រទេសបារាំង ដែលជាប្រទេសសម្ព័ន្ធមិត្ត។ រដ្ឋមន្រ្តីការបរទេសបារាំងបានកោះហៅឯកអគ្គរដ្ឋទូតអាមេរិកជាបន្ទាន់ នៅថ្ងៃនេះ ដើម្បីទាមទារឲ្យមានការបកស្រាយបំភ្លឺ ជុំវិញរឿងនេះ។
ព័ត៌មានស្តីពីសកម្មភាពចារកិច្ចរបស់អាមេរិក ទៅលើពលរដ្ឋបារាំង ត្រូវបានចុះផ្សាយដោយកាសែតបារាំង ឈ្មោះ Le Monde ដោយបានដកស្រង់ប្រភពព័ត៌មានពីឯកសារសម្ងាត់បានមកពី Edward Snowden អតីតបុគ្គលិកទីភ្នាក់ងារចារកិច្ចអាមេរិក NSA (National Security Agency) ដែលបច្ចុប្បន្នកំពុងជ្រកកោននៅក្នុងប្រទេសរុស្ស៊ី។
យោងតាមឯកសារដែលកាសែត Le Monde បានចុះផ្សាយនេះ ទីភ្នាក់ងារចារកិច្ចអាមេរិក NSA បានលបយកការណ៍សម្ងាត់នៅក្នុងប្រទេសបារាំង តាមរយៈការលបស្តាប់ការសន្ទនាតាមទូរស័ព្ទ និងការលួចស្ទាក់ចាប់ការផ្ញើសារតាមទូរស័ព្ទ។
ការលួចស្តាប់ការសន្ទនានេះ ត្រូវបានធ្វើឡើងក្នុងទ្រង់ទ្រាយធំ។ គ្រាន់តែក្នុងរយៈពេល ៣០ថ្ងៃ គឺពីថ្ងៃទី១០ ធ្នូ ឆ្នាំ២០១២ ដល់ថ្ងៃទី៨ មករា ២០១៣ កិច្ចសន្ទនាតាមទូរស័ព្ទ នៅក្នុងប្រទេសបារាំង ប្រមាណជាជាង ៧០លាន ត្រូវបានទីភ្នាក់ងារ NSA លួចថត។ ការលួចស្តាប់ការសន្ទនានេះ ត្រូវបានធ្វើឡើង ទាំងទៅលើមនុស្ស ដែលមានជាប់សង្ស័យថាពាក់ព័ន្ធនឹងសកម្មភាពភេរវកម្ម និងទាំងទៅលើមនុស្សក្នុងមជ្ឈដ្ឋានក្រុមហ៊ុនសហគ្រាស នយោបាយ និងរដ្ឋបាលសាធារណៈបារាំង។
ការលេចធ្លាយព័ត៌មានសម្ងាត់ ស្តីពីសកម្មភាពចារកិច្ចលើពលរដ្ឋបារាំងនេះ បានធ្វើឲ្យរដ្ឋាភិបាលបារាំងបញ្ចេញប្រតិកម្មដោយកំហឹងភ្លាមៗ នៅព្រឹកថ្ងៃចន្ទនេះ។ រដ្ឋមន្រ្តីក្រសួងមហាផ្ទៃបារាំងបានថ្លែងថា ការលួចស្តាប់ការសន្ទនាតាមទូរស័ព្ទរបស់ពលរដ្ឋបារាំង ដោយទីភ្នាក់ងារចារកិច្ចអាមេរិកនេះ គឺជារឿងដែលមិនអាចទទួលយកបាន។ ចំណែករដ្ឋមន្រ្តីក្រសួងការបរទេសបារាំងវិញបានឲ្យដឹងថា ក្រសួងរបស់លោកបានកោះហៅឯកអគ្គរដ្ឋទូតអាមេរិកប្រចាំក្រុងប៉ារីស ឲ្យមកជួបជាបន្ទាន់ នៅថ្ងៃចន្ទនេះ ដើម្បីធ្វើការបកស្រាយបំភ្លឺ ជុំវិញសកម្មភាពចារកិច្ចនេះ។
រហូតមកទល់នឹងពេលនេះ គេនៅមិនទាន់ឃើញមានការធ្វើអត្ថាធិប្បាយណាមួយនៅឡើយទេ ពីខាងអាមេរិក។ ប៉ុន្តែ ការលេចធ្លាយព័ត៌មានចារកិច្ចនេះ កើតឡើង នៅចំថ្ងៃដែលលោកចន ឃែរី ត្រូវមកប៉ារីស ដើម្បីជជែក អំពីសំណុំរឿងស៊ីរី។
គួរបញ្ជាក់ថា ទាក់ទងនឹងសកម្មភាពចារកិច្ចអាមេរិកនេះ តុលាការបារាំងបានចាប់បើកការស៊ើបអង្កេតបឋម តាំងពីខែកក្កដាមកម៉្លេះ នៅក្រោយពេលដែល Snowden បានបញ្ចេញព័ត៌មានដំបូង អំពីសកម្មភាពរបស់ NSA ដែលលួចចូលយកទិន្ន័យឯកជន នៅក្នុងបណ្តាញអ៊ីនធ័រនែត នៅទូទាំងពិភពលោក តាមរយៈកម្មវិធី ឈ្មោះថា PRISM។
នៅថ្ងៃនេះដែរ ក្រៅពីរឿងចារកិច្ចនៅបារាំង គេឃើញមានលេចធ្លាយរឿងសម្ងាត់មួយទៀត គឺការលួចយកការណ៍របស់អាមេរិក នៅក្នុងប្រទេសម៉ិចស៊ិក។ ព័ត៌មាននេះ ត្រូវបានចុះផ្សាយដោយ ទស្សនាវដ្តីអាល្លឺម៉ង់ ឈ្មោះ Der Spiegel ដោយដកស្រង់ប្រភពព័ត៌មានពីឯកសាររបស់ Edward Snowden ដូចគ្នា។
ទស្សនាវដ្តី Der Spiegel បានចុះផ្សាយឲ្យដឹងថា កាលពីខែឧសភា ឆ្នាំ២០១០ ទីភ្នាក់ងារចារកិច្ច NSA របស់អាមេរិកបានលួចចូលមើលសារអេឡិចត្រូនិក (Email) របស់លោកហ្វេលីប៉េ កាល់ដេរ៉ុន (Felipe Calderon) ដែលកាលណោះ ជាប្រធានាធិបតីម៉ិចស៊ិក។ រដ្ឋាភិបាលម៉ិចស៊ិកក៏បានទាមទារឲ្យអាមេរិកធ្វើការបកស្រាយបំភ្លឺ ជុំវិញព័ត៌មាននេះដែរ។
គួររំឭកឡើងវិញថា កាលពីខែមុននេះ មានការចុះផ្សាយម្តងរួចមកហើយ អំពីឯកសារសម្ងាត់របស់ Snowden ដែលបង្ហាញពីសកម្មភាពរបស់ទីភ្នាក់ងារ NSA លួចចូលមើលសារអេឡិចត្រូនិករបស់ លោកអិនរីកេ ប៉េញ៉ា ញ៉េតូ (Enrique Peña Nieto) ដែលជាប្រធានាធិបតីបច្ចុប្បន្នរបស់ម៉ិចស៊ិក បន្តពីលោកកាល់ដេរ៉ុន។ ម្យ៉ាងទៀត នៅអាមេរិកឡាទីន មិនមែនមានតែប្រធានាធិបតីម៉ិចស៊ិកមួយទេ ដែលត្រូវអាមេរិកតាមឃ្លាំមើល។ លោកស្រីឌីលម៉ា រូសេហ្វ (Dilma Rousseff) ប្រធានាធិបតីប្រេស៊ីល ក៏ត្រូវបានទីភ្នាក់ងារ NSA តាមឃ្លាំមើលដែរ។ ការលេចធ្លាយព័ត៌មានចារកិច្ចនេះ បានធ្វើឲ្យលោកស្រីឌីលម៉ា រូសេហ្វ លុបចោលដំណើរទស្សនកិច្ចផ្លូវរដ្ឋទៅកាន់សហរដ្ឋអាមេរិក។
ចាប់តាំងពីផ្ទុះរឿងអាស្រូវចារកិច្ចអាមេរិកនេះមក ឯកសារសម្ងាត់បញ្ចេញដោយ Edward Snowden បានបង្ហាញឲ្យឃើញថា សកម្មភាពឈ្លបយកការណ៍សម្ងាត់របស់អាមេរិកត្រូវបានធ្វើឡើង ទាំងទៅលើប្រទេសដែលជាគូប្រជែងផង (ដូចជា រុស្ស៊ី និងចិន) និងទាំងទៅលើប្រទេសសម្ព័ន្ធមិត្តផង (ដូចជា បារាំង អង់គ្លេស អាល្លឺម៉ង់ ម៉ិចស៊ិក និងប្រេស៊ីល ជាដើម)។ គោលដៅនៃការឈ្លបយកការណ៍សម្ងាត់នេះទៀតសោត មិនមែនធ្វើឡើង តែទៅលើអ្នកជាប់សង្ស័យរឿងភេរវកម្មទេ ប៉ុន្តែ ជាសកម្មភាពយកការណ៍សម្ងាត់ដែលមានលក្ខណៈទូលំទូលាយ ទាំងក្នុងរឿងភេរវកម្មផង នៅក្នុងមជ្ឈដ្ឋានក្រុមហ៊ុនសហគ្រាសផង និងក្នុងជួរថ្នាក់ដឹកនាំរដ្ឋាភិបាលបរទេសផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ