សំណុំរឿងSnowdenធ្វើឲ្យលោកអូបាម៉ាលុបចោលជំនួបជាមួយលោកពូទីន
ចុះផ្សាយនៅថ្ងៃ៖
ស្តាប់ - ០៨:១១
ប្រធានាធិបតីអាមេរិក លោកបារ៉ាក់ អូបាម៉ាបានប្រកាស កាលពីថ្ងៃពុធទី ៧ សីហា លុបចោលកិច្ចប្រជុំកំពូលជាមួយលោកវ្លាឌីមៀ ពូទីន ប្រធានាធិបតីរុស្ស៊ី ដែលត្រូវធ្វើនៅថ្ងៃទី ៤ខែ កញ្ញា ក្នុងទីក្រុងSaint Petersbourg ប្រទេសរុស្ស៊ី។ ជាផ្លូវការ អ្នកនាំពាក្យរបស់សេតវិមាន បានបញ្ជាក់ថា គឺសំណុំរឿងរុស្ស៊ីផ្តល់សិទ្ធិជ្រកកោនដល់យុវជន Snowden ដែលធ្វើឲ្យលោកអូបាម៉ាដូរចិត្ត លុបចោលកិច្ចប្រជុំកំពូលដែលលោកត្រូវធ្វើជាមួយលោកពូទីន។
លោកអូបាម៉ា នៅតែទៅចូលរួម ក្នុងកិច្ចប្រជុំកំពូលរបស់ក្រុមប្រទេសG២០ដែលត្រូវធ្វើនៅថ្ងៃទី ៥ និងទី ៦កញ្ញា ប៉ុន្តែ លោកនឹងមិនជួបលោកពូទីន ប្រធានាធិបតីរុស្ស៊ី ក្នុងកិច្ចប្រជុំកំពូលអាមេរិក រុស្ស៊ី ដែលត្រូវរៀបចំ នៅថ្ងៃទី ៤ គឺមួយមុន កិច្ចប្រជុំកំពូល G២០នោះទេ ។ ជំនួសវិញ នៅថ្ងៃទី ៤កញ្ញា លោកអូបាម៉ា នឹងធ្វើដំណើរទៅប្រទេសស៊ុយអែដដើម្បីជួបជាមួយមេដឹកនាំរបស់ប្រទេសនេះ និយាយពីការដោះដូរពាណិជ្ជកម្ម។
កាលពីថ្ងៃអង្គារ នៅក្នុងបទសម្ភាសន៍ជាមួយទូរទស្សន៍ NBC លោកអូបាម៉ាបាននិយាយថា លោកខកចិត្តខ្លាំងណាស់ ដែលទីក្រុងម៉ូស្គូបានសំរេចផ្តល់សិទ្ធិជ្រកកោនដល់យុវជន Snowden ដែលតាមពិតទៅ អាមេរិកត្រូវការចាប់ខ្លួន យកមកកាត់ទោសពីបទលួចបញ្ចេញឯកសារសម្ងាត់របស់រដ្ឋាភិបាលទៅឲ្យអ្នកកាសែត។
លោកអូបាម៉ា ប្រកាសលុបចោលកិច្ចប្រជុំកំពូល គឺដូចជាការទះកំភ្លៀងលោកពូទីន មួយដៃ ឲ្យដឹងថា កុំឲ្យមើលស្រាលអាមេរិក ថាមិនហ៊ានធ្វើអ្វី។ កន្លងមក រុស្ស៊ីបានផ្គើនដាក់អាមេរិក ដោយមិនត្រឹមតែព្រងើយកន្តើយ មិនចាប់បញ្ជូនSnowdenទៅតាមការសុំរបស់អាមេរិក ប៉ុន្តែ ហ៊ានដល់ទៅផ្តល់សិទ្ធិជ្រកកោនដល់អ្នកលួចឯកសារសម្ងាត់របស់អាមេរិកទៀត។
ជារឿងធម្មតា ដែលអាមេរិកមិនសប្បាយចិត្តនឹងរុស្ស៊ី ដែលខំជួយការពារយុវជន Snowdenដែលអាមេរិកចាត់ទុកជា ជនឧក្រិដ្ឋ ជា ចោរលួចឯកសារសម្ងាត់។ ប៉ុន្តែ មិនមែនដោយសារតែសំណុំរឿងរបស់យុវជន Snowdenតែមួយទេ ដែលធ្វើឲ្យលោកអូបាម៉ាលុបចោលជំនួបជាមួយលោកពូទីន។ រឿងរបស់ Snowdenគ្រាន់តែជាតំណក់ទឹកបន្ថែមមួយតំណក់ទៀត ដែលធ្លាក់ចូលទៅ ធ្វើឲ្យទឹកនៅក្នុងកែវហៀរចេញប៉ុណ្ណោះ។ ប្រធានាធិបតីអាមេរិកលុបចោល ជំនួបកំពូលជាមួយប្រធានាធិបតីរុស្ស៊ី គឺដូចជារឿងលែងលះរបស់ប្តីប្រពន្ធ។ ទម្រាំមកដល់ថ្ងៃឈ្លោះលែងលះគ្នា គឺប្តីប្រពន្ធបានជួបរឿងប្រេះស្រាំនឹងគ្នា ជាច្រើនណាស់ ក្នុងពេលកន្លងមក។
ទំនាក់ទំនងអាមេរិក និងរុស្ស៊ី មិនដែលស្គាល់ភាពផ្អែមល្អែមនឹងគ្នាទេ។ ជាអតីតសត្រូវនឹងគ្នា ក្នុងសង្រ្គាមត្រជាក់ អាមេរិក និងរុស្ស៊ី នៅតែមិនព្រមមើលមុខគ្នាចំទេ រហូតមកដល់ពេលនេះ។ គេឃើញទំនាក់ទំនងរវាងប្រទេសទាំងពីរចាប់ល្អក់កករនឹងគ្នា នៅពាក់កណ្តាលឆ្នាំ ២០១១ គឺនៅពេលរុស្ស៊ីបានចេញមុខគាំទ្រដាច់ណាត់ មិនឲ្យគេទម្លាក់លោកប្រធានាធិបតីស៊ីរី លោកបាស្ហា អាល់អាសាដ ចេញពីតំណែង។ ដោយសម្រេចដូច្នេះ រុស្ស៊ីបានខ្ទាស់ជើង នយោបាយការទូតរបស់អាមេរិកនៅ ដើមបូព៌ា ព្រោះបើតាមអាមេរិក សង្រ្គាមស៊ីវិលនៅស៊ីរី អាចបញ្ចប់ទៅបាន លុះណា លោកប្រធានាធិបតីអាសាដចុះចេញពីតំណែង។
ក្រៅតែពីរឿងស៊ីរី នៅមានសំណុំរឿងជាច្រើនទៀត ដូចជានុយក្លេអ៊ែររបស់អ៊ីរ៉ង់ ការកាត់បន្ថយក្បាលគ្រាប់នុយក្លេអ៊ែរ និងការដាក់ពង្រាយខែលមីស៊ីលរបស់អាមេរិកនៅទឹកដីអឺរ៉ុប ដែលប្រទេសទាំងពីរនៅខ្វែងគំនិត និងមិនព្រមធ្វើការសហការជាមួយគ្នា។ សំណុំរឿងចុងក្រោយ គឺបញ្ហាសិទ្ធិរំលោភសិទ្ធិមនុស្ស ដែលអាមេរិកទើបនឹងចេញរបាយការណ៍រំលោភរិះគន់ទីក្រុងម៉ូស្គូ កាលពីពេលថ្មីៗនេះ។
នៅក្នុងស្ថានភាពបច្ចុប្បន្ន គេអាចនិយាយដូច្នេះ បាន ដោយសារតែលោកអូបាម៉ា ពេលនេះ បានងក់ង និងអន់ចិត្ត មិនចង់ចាប់ដៃធ្វើការជាមួយលោកពូទីនទៀតទេ។ ជំហររបស់ប្រធានាធិបតីអាមេរិកនឹងអាចដូរ ប្រសិនបើប្រធានាធិបតីរុស្ស៊ីមិនមែនជាលោកពូទីន។ គួរដឹងថា នៅពេលលោកស្បថចូលកាន់តំណែងជាប្រធានាធិបតីអាមេរិក នៅឆ្នាំ ២០០៩ លោកអូបាម៉ាបានសន្យាថា នឹងស្តារទំនាក់ទំនងរុស្ស៊ី អាមេរិកឲ្យល្អឡើងវិញ។ កាលណោះ រុស្ស៊ី ដឹកនាំដោយលោកនាយករដ្ឋមន្រ្តីរុស្ស៊ីបច្ចុប្បន្ន គឺលោកឌីមីទ្រី មេដវេដេវ ដែលលោកអូបាម៉ាវាយតម្លៃថា ជាប្រធានាធិបតីដែលមានជំនាញ។
នៅក្នុងអាណត្តិរបស់លោកមេដវេឌេវ អាមេរិក រុស្ស៊ីនិយាយចុះសម្រុងជាមួយគ្នាបានច្រើន ដូចជាប្រទេសទាំងពីបានព្រមព្រៀងគ្នា ចុះសន្ធិសញ្ញាNewstarts ដែលតម្រូវឲ្យប្រទេសមហាអំណាចនុយក្លេអ៊ែរ ទាំងពីរកាត់បន្ថយចំនួនក្បាលគ្រាប់នុយក្លេអ៊ែរ ដែលសេសសល់ពីសង្រ្គាមត្រជាក់។ រុស្ស៊ីបានជួយអាមេរិកក្នុងការបញ្ជូនភស្តុភាទៅអាហ្វហ្កានីស្ថាន និងបានចូលរួមជាមួយអាមេរិក ដើម្បីដាក់ទណ្ឌកម្មលើកម្មវិធីនុយក្លេអ៊ែរ របស់កូរ៉េខាងជើង។
ប៉ុន្តែ ក្នុងរយៈពេលមួយឆ្នាំចុងក្រោយនេះ គឺចាប់តាំងពីពេលលោកពូទីនត្រលប់មកកាន់តំណែងជាប្រធានាធិបតីរុស្ស៊ី វិញ ភាពតានតឹងការទូត រវាងរុស្ស៊ី និងអាមេរិក បានឡើងដល់កម្រិតកំពូល។ កាលពីខែមិថុនា កន្លងទៅ អាមេរិកបានចេញបញ្ជីរាយនាមមន្រ្តីរុស្ស៊ីជាង១០នាក់ មិនឲ្យធ្វើដំណើរចូលទឹកដីអាមេរិក ក្នុងមូលហេតុពួកគេទាំងនោះ មានជាប់ពាក់ព័ន្ធនឹងការបាត់បង់ជីវិតរបស់អ្នកច្បាប់រុស្ស៊ីម្នាក់ ដែលជាប់ក្នុងគុករុស្ស៊ី។ លោកពូទីន កាលណោះ បានហៅការសម្រេចចិត្តរបស់ទីក្រុងវាស៊ីនតោន ថា ដូចជាថ្នាំបំពុលទំនាក់ទំនងរុស្ស៊ីអាមេរិក។ ហើយជាការសងសឹកវិញ រុស្ស៊ីបានបណ្តេញសមាជិករបស់អង្គការផ្តល់ជំនួយអាមេរិក ដោយចោទពួកគេទាំងនោះថា ជាក្រុមចារកិច្ចរបស់អាមេរិក លួចយកការណ៍សម្ងាត់របស់មូស្គូទៅឲ្យរដ្ឋាភិបាលអាមេរិក។ គំនិតសងសឹកមួយទៀត គឺទីក្រុងមូស្គូទើបតែសម្រេចផងដែរ មិនឲ្យជនជាតិអាមេរិកសុំកូនរុស្ស៊ី យកទៅចិញ្ចឹម។
សង្រ្គាមត្រជាក់ចេញពីមាត់របស់លោកអូបាម៉ា
លោកអូបាម៉ាបាននិយាយ កាលពីថ្ងៃអង្គារថា រុស្ស៊ីកំពុងនៅដិតដាមដោយចិត្តគំនិតធ្វើសង្រ្គាមត្រជាក់នៅឡើយ នោះគឺនៅពេលដែលរុស្ស៊ីយល់ព្រមបើកដៃទទួល Snowden ដែលតាមពិតជាអ្នកបានលួចឯកសារសម្ងាត់របស់រដ្ឋាភិបាលអាមេរិក។ សង្រ្គាមត្រជាក់ ដែលកើតឡើង តាំងពីឆ្នាំ ១៩៤៧ ដល់ឆ្នាំ ១៩៩០ គឺសង្រ្គាម មនោគមវិជ្ជា រវាងប្លុកពីរ កុម្មុយនិស្ត និងសេរី ដែលមេជម្លោះ គឺអាមេរិក និងសហភាពសូវៀត។ នៅសម័យសង្រ្គាមត្រជាក់ អាមេរិក និងសហភាពសូវៀត ដែលក្រោយមកក្លាយជារុស្ស៊ី បានប្រជែងគ្នា ខាងផ្នែកចារកម្ម សព្វាវុធ ការផលិតគ្រាប់នុយក្លេអ៊ែរ និងបច្ចេកវិទ្យា។
សម្រាប់លោកអូបាម៉ា សង្រ្គាមត្រជាក់បានផុតរលត់ និងក្លាយជារឿងអតីតកាល។ អាមេរិក បានអំពាវនាវឲ្យរុស្ស៊ីងាកមកធ្វើការដោយស្មោះត្រង់ ជាមួយអាមេរិក ដើម្បីកែលម្អទំនាក់ទំនងរវាងប្រទេសទាំងពីរ។ ទំនាក់ទំនងអាមេរិករុស្ស៊ី ដែលពេលនេះ បានធ្លាក់ជិតដល់ចំណុចសូន្យ បន្ទាប់ពីលោកអូបាម៉ាប្រកាសលុបចោលកិច្ចប្រជុំជាមួយលោកពូទីន។
អាមេរិក និងរុស្ស៊ីបានបន្ទោសគ្នាទៅវិញ ទៅមក ដោយភាគីម្ខាងៗចោទគ្នា ថា ជាអ្នកធ្វើឲ្យជាប់គាំងការចរចា ឬការសហការ ដើម្បីពង្រឹងទំនាក់ទំនងរវាងប្រទេសទាំងពីរ។ លើកនេះ រុស្ស៊ីបានសំដែងការខកចិត្តវិញម្តង ដែលលោកអូបាម៉ាបានលុបចោលកិច្ចប្រជុំជាមួយលោកពូទីន ប៉ុន្តែ យ៉ាងណាក៏ដោយ ទីក្រុងមូស្គូអះអាង ថា គេនៅតែបើកទ្វារជានិច្ចបើសិនជាលោកអូបាម៉ាដូរចិត្ត។
តាមអ្នកនាំពាក្យរបស់សេតវិមាន រុស្ស៊ីមិនបានបង្ហាញការខិតខំប្រឹងប្រែងដើម្បីដោះស្រាយបញ្ហាជាមួយអាមេរិកទេ។ នៅមានចំណុចខ្វែងគំនិតគ្នាច្រើន ទាក់ទងនឹងរឿងសិទ្ធិមនុស្ស នយោបាយកាត់បន្ថយក្បាលគ្រាប់នុយក្លេអ៊ែរ ដែលប្រទេសទាំងពីរមិនទាន់បាននិយាយត្រូវគ្នា។ វាគ្មានប្រយោជន៍អ្វីដែលលោកអូបាម៉ា ត្រូវជួបប្រជុំជាមួយលោកពូទីន ប្រសិនបើសំណុំរឿងសំខាន់ដែលត្រូវជជែកនោះ មិនទាន់ត្រូវគេនិយាយយល់ស្របគ្នាមុននោះ។
ប្រមុខដឹកនាំប្រទេសអាចតឹងសរសៃកដាក់គ្នា ប៉ុន្តែ មិនទាន់ធ្វើឲ្យទំនាក់ទំនងរុស្ស៊ី អាមេរិក ស្លាប់ គ្មានដំណោះស្រាយនោះទេ។ អ្នកនាំពាក្យរបស់សេតវិមានអះអាងថា ជំនួបរវាងរដ្ឋមន្រ្តីរបស់ក្រសួងការបរទេស និងក្រសួងការពារជាតិ របស់ប្រទេសទាំងពីរ ដែលត្រូវធ្វើនៅថ្ងៃសុក្រនេះ នឹងត្រូវមានជាធម្មតា គឺមិនលុបចោលទេ។ ដូច្នេះ គេនៅចាំមើលថា តើជំនួបនៅថ្ងៃសុក្រនេះ រវាងថ្នាក់ដឹកនាំក្រសួងគន្លឹះទាំងពីរ គឺការបរទេស និងការពារជាតិរបស់ប្រទេសទាំងពីរ នឹងអាចស្រោចស្រង់ស្ថានការណ៍ឲ្យល្អឡើងវិញ ឬដំពន្លិចឲ្យកាន់តែជ្រៅថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ