គណបក្ស GDP សោកស្តាយដែលរដ្ឋាភិបាលកម្ពុជា ឆ្លើយតបយឺតយ៉ាវ លើវិធានការទប់ទល់ កូវីដ-១៩
គណបក្សប្រជាធិបតេយ្យមូលដ្ឋាន ឬ GDP តាមរយៈសេចក្តីថ្លែងការណ៍នៅថ្ងៃទី ៥ខែមីនា បានសម្តែងការសោកស្តាយ ដោយអះអាងថា រដ្ឋាភិបាលកម្ពុជា នៅព្រងើយកន្តើយ និងមានភាពយឺតយ៉ាវ ក្នុងការឆ្លើយតបលើវិធានការទប់ទល់នឹងមេរោគកូរ៉ូណាថ្មី ឬ កូវីដ-១៩។ វិធានាការដែល GDP មានន័យថា ការទប់ទល់លើផលប៉ះពាល់នៃជំងឺ កូវីដ-១៩លើវិស័យសេដ្ឋកិច្ច និងការងារ ជាពិសេសវិស័យកាត់ដេរ និងទេសចរណ៍។
ចុះផ្សាយនៅថ្ងៃ៖
ស្តាប់ - ០២:២៤
ក្នុងសេចក្តីថ្លែងការណ៍របស់ខ្លួន គណបក្សប្រជាធិបតេយ្យមូលដ្ឋាន (GDP) មើលឃើញថា ដំណោះស្រាយដែលរដ្ឋាភិបាលបានដាក់ចេញ ហាក់ដូចជានៅសើៗ និងមិនមានភាពជាក់លាក់ ព្រោះរហូតមកដល់ពេលនេះ រដ្ឋាភិបាលគ្រាន់តែដាក់ចេញនូវគោលនយោបាយដោះស្រាយបញ្ហា ប៉ុន្តែពុំទាន់មានការអនុវត្តជាក់ស្តែងនៅឡើយ។
សេចក្តីថ្លែងការណ៍ គណបក្សប្រជាធិបតេយ្យមូលដ្ឋាន មានការសោកស្តាយដែលរាជរដ្ឋាភិបាលហាក់ដូចជានៅព្រងើយកន្តើយ និងមានភាពយឺតយ៉ាវ...
Publiée par គណបក្សប្រជាធិបតេយ្យមូលដ្ឋាន sur Jeudi 5 mars 2020
តាម GDP លទ្ធផលនេះហើយ បានធ្វើឲ្យរោងចក្រ សណ្ឋាគារមួយចំនួន ត្រូវបង្ខំចិត្តបិទទ្វារ ឬ ផ្អាកសកម្មភាព ដែលការណ៍នេះ ធ្វើឲ្យកម្មករមួយចំនួន បាត់បង់ការងារ ដែលជាប្រភពចំណូលដ៏សំខាន់របស់ពួកគេ និងគ្រួសារ។ ចំពោះបញ្ហានេះ គណបក្សប្រជាធិបតេយ្យមូលដ្ឋាន បានបញ្ចេញនូវវិធានការជាច្រើនចំនុច ដើម្បីប្រឈមនឹង កូវីដ-១៩។
វិធានការរបស់ GDP ដើម្បីប្រឆាំងនឹង កូវីដ-១៩ រួមមានដូចជា លើកទឹកចិត្តដល់ក្រុមហ៊ុន សហគ្រាស កសិដ្ឋានទាំងអស់ ដែលកំពុងដំណើរការស្រាប់ ទទួលយកកម្មករដែលបាត់បង់ការងារ ដោយរដ្ឋត្រូវជួយចេញថ្លៃប្រាក់ឈ្នួលតាមគោលការណ៍កំណត់ ហើយក្រុមហ៊ុន សហគ្រាស ជាអ្នកចេញបន្ថែម។ ក្នុងនោះ ក៏សំណូមពរឲ្យមានការគាំទ្រដល់ផលិតផលក្នុងស្រុក ហើយត្រូវកាត់បន្ថយថ្លៃអគ្គិសនី ត្រូវមានវិធានការជាក់លាក់បញ្ចុះថ្លៃការប្រាក់កម្ចី និងសម្របសម្រួលលើរយៈពេលសងត្រលប់របស់អតិថិជនដែលរងផលប៉ះពាល់។
GDP ក៏ចង់ឲ្យរដ្ឋាភិបាល ពង្រឹងសេដ្ឋកិច្ចមូលដ្ឋាន តាមរយៈការគាំទ្រដល់អ្នកដាំដុះ និងសិប្បករ នៅតាមមូលដ្ឋាន ហើយចំពោះកម្មករណាដែលមានបំណងវិលមកកាន់ភូមិស្រុក និងចង់ចាប់យកមុខរបរដោយខ្លួនឯង រដ្ឋាភិបាលត្រូវមានទុនគាំទ្របន្ថែមដល់ពួកគេ ឬ ហៅថាទុនចំណងដៃ។
យ៉ាងណាមិញ ការចេញសេចក្តីថ្លែងការណ៍របស់ GDP នេះ គឺបន្ទាប់ពីលោកនាយករដ្ឋមន្ត្រីហ៊ុន សែន ទើបបានប្រកាសពីវិធានការជាច្រើនចំណុច ដើម្បីឆ្លើយតបនឹងការឆ្លងរាលដាលនៃមេរោគកូរ៉ូណាថ្មី។ រដ្ឋាភិបាល បានដាក់ចេញនូវចំណាត់ការជួយដល់កម្មករ និយោជិត ឲ្យទទួលបានប្រាក់ឧបតម្ថ ៦០ភាគរយ ក្នុងពេលបាត់បង់ការងារ ដោយការរោងចក្រព្យួរ ឬ ដោយសារការខ្វះវត្ថុធាតុដើម បណ្តាលមកពីការផ្ទុះឡើងនូវកូវីដ-១៩។
សម្តេចតេជោ ហ៊ុន សែន បានស្នេីសុំក្រសួង...
Publiée par Samdech Hun Sen, Cambodian Prime Minister sur Mercredi 4 mars 2020
ចំពោះវិស័យទេសចរណ៍វិញ រដ្ឋាភិបាល ក៏បានលើកលែងការយកពន្ធលើសណ្ឋាគារ និងផ្ទះសំណាក់មួយរយៈពេល ស្របពេលដែលភ្ញៀវទេសចរធ្លាក់ចុះយ៉ាងគំហុក ក្នុងខេត្តសៀមរាប។ លើសពីនេះ នៅសប្តាហ៍នេះ លោកប្រមុខរដ្ឋាភិបាលកម្ពុជា ទើបបានប្រកាសកាត់បន្ថយការចំណាយលើគ្រប់ក្រសួងរបស់រដ្ឋាភិបាលទាំងអស់ ៥០ភាគរយ ដោយលើកលែងតែក្រសួង ៣ គឺក្រសួងការបរទេស ក្រសួងពាណិជ្ជកម្ម និងទីស្តីការគណៈរដ្ឋមន្ត្រី ដែលត្រូវកាត់បន្ថយការចំណាយ ២៥ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ