កិច្ចសហការជួយដោះស្រាយបញ្ហាកម្មករដែលត្រូវព្យួរការងារ រដ្ឋាភិបាលរក្សាប្រាក់ឧបត្ថម្ភ២០% ក្រៅពីនេះទូទាត់តាមមាត្រា៧១
ជាថ្មីម្តងទៀត ក្រសួងការងារ នៅតែអះអាងថា រដ្ឋាភិបាលនឹងផ្តល់ប្រាក់ឧបត្ថម្ភ២០ភាគរយ ទៅដល់កម្មករដែលត្រូវថៅកែរោងចក្រព្យួរការងារអំឡុងពេលការរីករាលដាលជំងឺកូវីដ១៩។ នេះជាការបញ្ជាក់របស់ លោក ហេង សួរ អ្នកនាំពាក្យក្រសួងការងារ។ ការលើកឡើងរបស់អ្នកនាំពាក្យរូបនេះ គឺបន្ទាប់ពីសមាគមរោងចក្រកាត់ដេរនៅកម្ពុជា បានដាក់សំណើរជាលើកទីពីរទៅរដ្ឋាភិបាលកម្ពុជា ឲ្យពិចារណាជួយដល់ថៅកែរោងចក្រកាត់ដេរ ដែលត្អូញត្អែរថាពួកគេមិនមានលទ្ធភាពបើកប្រាក់ឈ្នួលឲ្យកម្មករទេ ខណៈរោងចក្រមិនមានការបញ្ជាទិញនិងបានព្យួរ។
ចុះផ្សាយនៅថ្ងៃ៖
ស្តាប់ - ០២:១២
លោក ហេង សួរ អ្នកនាំពាក្យក្រសួងការងារ បានបញ្ជាក់ថា ២០%ដែលចេញពីរដ្ឋាភិបាលនេះ គឺជាលើកទី១ហើយ ដែលបានបើកសាច់ប្រាក់ជូនបងប្អូនកម្មករ។ ហើយក្រៅពីនេះគឺអាចប្រើមាត្រា ៧១ នៃច្បាប់ស្តីពីការងារដើម្បីដោះស្រាយ។ មាត្រា៧១បានចែងថា ក្នុងករណីមានមានការព្យួការងារ គឺព្យួម្តងមិនអោយលើសពី២ខែនោះទេ។ ករណីព្យួរនេះដែរ អាចមានហេតុផលច្រើនយ៉ាងដូចជា ប្រធានស័ក្កិ ខ្វះវត្ថុធាតុដើម ខ្វះការបញ្ជាទិញ ឬ បញ្ហាគ្រោះធម្មជាតិជាដើម។ ដូច្នេះក្នុងអំឡុងពេលព្យួរការងារនេះ និយោជកឬថៅកែរងចក្រមានកាតព្វកិច្ច ត្រូវផ្តល់ថ្លៃស្នាក់នៅដល់នយោជិត ចំនួនប៉ុន្មាននោះ មិនមានចែងនៅក្នុងច្បាប់ទេ តែវាអាស្រ័យលើការចរចារគ្នា។ នេះបើតាមលោក ហេង សួរ
សូមរលឹកថា អគ្គលេខាធិការសមាគមរោងចក្រកាត់ដេរនៅកម្ពុជា(GMAC) គឺលោក ខេន លូ កាលពីពេលថ្មីៗនេះ បានថ្លែងប្រាប់វិទ្យុបារាំង RFI អ្នកបញ្ជាទិញសម្លៀកបំពាក់ដ៏សំខាន់មួយរបស់កម្ពុជា បានប្រកាសថា គេបានសម្រេចលុបកិច្ចសន្យាបញ្ជាទិញពីកម្ពុជា ចាប់ពីខែមីនា រហូតដល់ខែមិថុនា ដោយសារតែការវាយលុកពីមេរោគកូវីដ១៩ នៅអាមេរិក និងអឺរ៉ុប ដែលនេះគឺជាប្រធានស័ក្តិ។
ការផ្អាកការបញ្ជាទិញសម្លៀកបំពាក់ពីកម្ពុជាដូច្នេះ ធ្វើឲ្យទំនិញដែលរោងចក្រមួយចំនួនបានផលិតហើយនៅក្នុងអំឡុងខែមីនា ត្រូវបានកកស្ទះ មិនអាចនាំចេញទៅក្រៅបាន។ ជាមួយគ្នានេះ ក៏មានរោងចក្រខ្លះត្រូវផ្អាកការផលិតពាក់កណ្តាលទីផងដែរ។
លោក ខេន លូ បានលើកឡើងជាសំណួរថា ការផលិតដែល មិនមានអ្នកទិញ គឺរោងចក្រកាត់ដេរក៏មិនមានប្រាក់ចំណូលដូចគ្នា ដែលបញ្ហានេះ បានជះឥទ្ធិពលដល់ការបើកប្រាក់ឈ្នួលដល់កម្មករ។ តាមក្រសួងការងារ មកទល់នឹងថ្ងៃទី០២ មេសា នេះ មានរោងចក្រចំនួន៩១ហើយដែលបាន ព្យួរការងារ ដោយសារជំងឺកូវីដ ១៩ និង ប៉ះពាល់ដល់កម្មករចំនួន ៦ម៉ឺន១៥០០ នាក់។
គួបញ្ជាក់ថា រដ្ឋាភិបាលកន្លងមកធ្លាប់អះអាងថា កម្មករដែលត្រូវថៅកែរោងចក្រព្យួរការងារ នឹងទទួលបានប្រាក់ឧបត្ថម្ភ ៦០ភាគរយនៃប្រាក់ខែគោល ១៩០ដុល្លារ ឬស្មើនឹង ១២០ដុល្លារក្នុង១ខែ។ បើតាមរដ្ឋាភិបាល ប្រាក់ឧបត្ថម្ភនេះ គឺភាគីរោងចក្រត្រូវទទួលដោះស្រាយឱ្យកម្មករម្នាក់ៗ ៤០ភាគរយ ចំណែក ២០ភាគរយ រដ្ឋាភិបាលជាអ្នកចេញ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ