សហជីពចង់ឲ្យក្រសួងការងារបញ្ជាក់ពីរបៀបបើកប្រាក់ឧបត្ថម្ភ ចំពោះកម្មករដែលព្យូរការងារ
ក្រុមសហជីពស្នើឲ្យក្រសួងការងារបញ្ជាក់ពីរបៀបបើកប្រាក់ឧបត្ថម្ភប្រចាំខែជូនកម្មករ ចំពោះកម្មករប្រមាណ៦ម៉ឺននាក់ដែលត្រូវបានរោងចក្រជាង១០០ព្យូរការងារកន្លងមកនេះ ដោយមិនទាន់រាប់បញ្ចូលកម្មករក្នុងវិស័យទេសចរណ៍។ ការលើកឡើងយ៉ាងដូច្នេះគឺនៅពេលដែលកម្មករមួយចំនួនបានទៅស្រុកកំណើតរួចហើយ មុនពេលរដ្ឋាភិបាលហាមធ្វើដំណើរអំឡុងពេលបុណ្យចូលឆ្នាំខ្មែរ ហើយពួកគេទំនងជាមិនវិលមកកាន់រោងចក្រវិញទេ ក្នុងអំឡុងពេលព្យូរការងារនេះ។
ចុះផ្សាយនៅថ្ងៃ៖
ស្តាប់ - ០២:១៣
លោក អាត់ ធន់ ប្រធានសហភាពការងារកម្ពុជា អះអាងថា កម្មករជិត៦ម៉ឺននាក់ប៉ះពាល់ដោយការព្យូរការងារនៅពេលរោងចក្រខ្វះវត្ថុធាតុដើម និងអស់អ្នកបញ្ជាទិញ ដោយមិនទាន់គិតពីផលប៉ះពាល់ដោយសារបញ្ហាEBA។ ក្នុងចំណោមរោងចក្រជាង១០០ដែលព្យូរការងារកម្មករនេះ មានរោងចក្រខ្លះព្យូរយៈពេលខ្លី និងខ្លះឈានទៅបិទរោងចក្រតែម្តង។
បើតាមលោក អាត់ ធន់ កម្មករភាគច្រើនបានវិលទៅស្រុកកំណើតវិញមុនពេលរដ្ឋាភិបាលបិទការធ្វើដំណើរទៅកាន់ខេត្តនានាអំឡុងបុណ្យចូលឆ្នាំខ្មែរ។ នេះជាហេតុដែលធ្វើឲ្យកម្មករមួយចំនួនធំមិនដឹងថាតើពួកគេនឹងទទួលបានប្រាក់ឧបត្ថម្ភប្រចាំខែចំនួន៧០ដុល្លារដែលជាការសម្រេចថ្មី របស់រដ្ឋាភិបាលនោះ ដោយរបៀបណា ខណៈគោលការណ៍ចាស់គឺតម្រូវឲ្យកម្មករមកបើកពីរោងចក្រដោយផ្ទាល់ចំពោះប្រាក់ដែលថៅកែត្រូវផ្តល់ជូន ហើយប្រាក់ដែលរដ្ឋឧបត្ថម្ភគឺត្រូវបង្វិលតាមប្រព័ន្ធផ្ទេរប្រាក់។
ចំណែក លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានក៏នៅមានភាពស្រពិចស្រពិលពីរបៀបនៃការបើកប្រាក់ជូនកម្មករដែលត្រូវព្យូរការងារនេះដែរ ខណៈលោកកត់សំគាល់ថា កម្មករមួយចំនួនដែលត្រូវព្យូរការងារគឺពួកគេកំពុងនៅស្រុកកំណើត។ តែលោកចង់ឲ្យក្រសួងការងារសម្រួលធ្វើការផ្ទេរប្រាក់ឧបត្ថម្ភនោះតាមរយៈប្រព័ន្ធវេលុយផ្សេងៗ ជៀសវាងតម្រូវឲ្យកម្មករឡើងមកបើកផ្ទាល់ពីរោងចក្រដែលនាំឲ្យមានការជួបជុំមនុស្សច្រើន។ ការជួបជុំមនុស្សច្រើនជាការបារម្ភនៃការឆ្លងជំងឺកូវីដ១៩។
យ៉ាងណាក៏ដោយ អ្នកនាំពាក្យក្រសួងការងារបានអះអាងថា នឹងមានសេចក្តីណែនាំលម្អិតមួយនៅថ្ងៃទី១៥មេសា ដើម្បីវិស័យកាត់ដេរ និងទេសចរណ៍អាចដាក់ពាក្យសំព្យួរការងារចាប់ពីថ្ងៃទី ១៨ មេសា តទៅ។
សូមបញ្ជាក់ដែរ ការដែលរដ្ឋាភិបាលចេញសម្រេចឧបត្ថម្ភប្រាក់ប្រចាំខែសរុបចំនួន៧០ដុល្លារក្នុងនោះរដ្ឋផ្តល់៤០ដុល្លារ និងថៅកែបន្ថែម៣០ដុល្លារនេះ គឺត្រូវអនុវត្តចាប់ពីថ្ងៃទី១០មេសា ក្នុងរយៈពេល២ខែ ដោយគ្របដណ្តប់ទាំងវិស័យរោងចក្រនិងវិស័យទេសចរណ៍ផងដែរ ដោយមិនតម្រូវឲ្យកម្មករ-និយោជិតមកទទួលការបណ្តុះបណ្តាលឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ