តើកងដាក់ក្នុងស្បូន មាននិងគ្មានអ័រមូន ខុសគ្នាយ៉ាងណា ?
ចុះផ្សាយនៅថ្ងៃ៖
ស្តាប់ - ០៨:៥៧
ថ្ងៃទី២៦កញ្ញាជាទិវាពន្យារកំណើតពិភពលោក។ ឆ្លៀតក្នុងឱកាសនេះ កម្មវិធីសុខភាពរបស់វិទ្យុយើងសូមជម្រាបអំពីមធ្យោបាយពន្យារកំណើត ដោយប្រើកងដាក់នៅក្នុងស្បូន។ កងក្នុងស្បូន មានពីរបែប គឺកងមានជាតិទង់ដែង និងកងមានអ័រមូន។ តើកងក្នុងស្បូនទាំងពីរនេះមានគុណសម្បត្តិនិងគុណវិបត្តិយ៉ាងណាខ្លះ ?
ការដាក់កងក្នុងស្បូន ជាវិធីពន្យារកំណើតដែលស្ត្រីប្រើច្រើនជាងគេលំដាប់ទីពីរ បន្ទាប់ពីថ្នាំលេប។
កងដាក់ក្នុងស្បូន ជាឧបករណ៍ប្លាស្ទិក តូច ទន់ ដែលគ្រូពេទ្យយកស៊កបញ្ចូលក្នុងស្បូន តាមទ្វារមាស។ កងដាក់ក្នុងស្បូនមានច្រើនទម្រង់ និងច្រើនយ៉ាង តែកងដែលគេនិយមប្រើប្រាស់ជាងគេ គឺកងមានទម្រង់ជាអក្សរ T និងគេអាចចេញជាពីរប្រភេទធំៗ មួយជាកងមានអ័រមូន និងមួយទៀតជាកងគ្មានអ័រមូន ឬហៅថាកងទង់ដែង ព្រោះមានបន្ទះ ឬសរសៃទង់ដែង រុំជុំវិញ។ កងប្រភេទនេះមានប្រើច្រើននិងជាទូទៅនៅក្នុងប្រទេសកម្ពុជា។ កងទាំងពីរប្រភេទនេះ បញ្ចេញសកម្មភាពដូចគ្នា គឺនឹងទៅរំខានដំណើររបស់ស្ពែម៉ាតូហ្សូអ៊ីត (មេជីវិតបុរស) និងរំខានមិនឱ្យមានការបង្កកំណើត ដោយសារឥទ្ធិពលរបស់ទង់ដែង ឬអ័រមូន លេបូន័រហ្សេស្ត្រែល lévonorgestrel របស់កងសាយភាពក្នុងស្បូន។
ជម្រើសថាគួរប្រើកងអ័រមូន ឬកងទង់ដែង គឺអាស្រ័យទៅលើការធ្លាក់រដូវរបស់ស្ត្រី។ តើស្រ្តីមានរដូវច្រើន ឬតិច មានអមដោយការឈឺចុកចាប់ដែរឬអត់ និងសេចក្តីសម្រេចរបស់ស្ត្រីផ្ទាល់នៅពេលបានជួបពិគ្រោះជាមួយគ្រូពេទ្យរួចត្រឹមត្រូវ។
បច្ចុប្បន្ននេះ នៅប្រទេសបារាំង មានស្ត្រីប្រមាណ៨សែននាក់ជ្រើសរើសវិធីពន្យារកំណើតដោយការដាក់កងក្នុងស្បូន ហើយក្នុងនោះ ជាង៥០% ជាកងមានអ័រមូន និងជិតពាក់កណ្តាលជាកងទង់ដែង។ ជម្រើសបើកងក្នុងស្បូន កើនឡើងជាលំដាប់ ព្រោះកងជាមធ្យោបាយពន្យារកំណើតដែលមានសុវត្ថិភាពនិងប្រសិទ្ធភាពខ្លាំង។ គ្រោះហានិភ័យធ្លាក់ខ្លួនមានផ្ទៃពោះ ទាបជាងមួយ១%ទៅទៀត ពោលគឺកងក្នុងស្បូន ទង់ដែង អាចការពារមិនឱ្យមានគ៌ភ បានដល់ទៅ៩៩,៤% ហើយកងប្រើអ័រមូន ការពារបានកាន់តែខ្ពស់ជាងកងទង់ដែងទៀត។ បើស្ត្រីមានអាយុលើសពី៤០ឆ្នាំទៀតហានិភ័យមានផ្ទៃពោះធ្លាក់ស្ទើរដល់សូន្យតែម្តង។
កងដាក់ក្នុងស្បូន ជាវិធីពន្យារកំណើតដែលមានការរំខានតិចតួចបំផុត និងមិនទៅខ្ទប់យន្តការអ័រមូនរបស់សរីរទេ ហើយមិនរំខានដល់ទំនាក់ទំនងផ្លូវភេទ និយាយឱ្យចំ មិនរំខានការរួមរក្សឡើយ។ កងក្នុងស្បូនដែលល្អ ដែលត្រូវនឹងអ្នក គឺកងដែលអ្នកពាក់ភ្លេចមិនដឹងថាមានកងក្នុងខ្លួន។ នេះជាការបញ្ជាក់បន្ថែមរបស់វេជ្ជបណ្ឌិតជំនាញរោគស្ត្រី។ ដាក់កងក្នុងស្បូន ជាការផ្តល់សេរីភាពឱ្យដល់ស្ត្រី ក្នុងជីវិតរស់នៅប្រចាំថ្ងៃនិងក្នុងជីវិតផ្លូវភេទ ដោយលែងភ័យ លែងគិតរកថ្នាំលេបជារៀងរាល់ថ្ងៃ។
ប៉ុន្តែកងទង់ដែង ដែលជាជម្រើសដ៏ប្រសើរសម្រាប់ស្ត្រីបំបៅដោះកូន អាចបង្កផលរំខានបន្តិច ព្រោះវាអាចនឹងធ្វើឱ្យស្ត្រីមានរដូវធ្លាក់ច្រើនៗ និងមានជ្រាបបន្តស្នាមធ្លាក់ឈាមដែលត្រូវទ្រាប់ការពារកុំឱ្យប្រលាក់ យូរថ្ងៃ។ ដូច្នេះប្រសិនបើអ្នកជាស្ត្រីដែលមាននិស្ស័យធ្លាក់រដូវច្រើន សូមកុំជ្រើសរើសប្រើកងដាក់ក្នុងស្បូនទង់ដែងអី។
ផ្ទុយទៅវិញ កងដាក់ក្នុងស្បូនមានអ័រមូន នឹងធ្វើឱ្យអ្នកមានរដូវធ្លាក់យ៉ាងតិចតួចបំផុត និងលែងមានធ្លាក់រដូវសោះតែម្តងផង។ ៨៥-៩០%នៃស្ត្រីពាក់កងអ័រមូន លែងមានរដូវសោះក្រោយពីដាក់កងនោះបានពីរបីខែ។ សមត្ថភាពរបស់កងអ័រមូននេះ បានជួយសម្រួលជីវិតស្ត្រី ជាពិសេសស្ត្រីដែលធ្លាប់មានរដូវច្រើន និងធ្លាប់ឈឺចុកចាប់ខ្លាំងពេលធ្លាក់រដូវ។
គ្រប់ស្ត្រីដែលមានទំនាក់ទំនងផ្លូវភេទហើយសុទ្ធតែអាចប្រើកងដាក់ក្នុងស្បូនបានទាំងអស់។ តែប្រសិនបើជាស្ត្រីប្រឈមនឹងហានិភ័យកើតជំងឺកាមរោគ (ជំងឺចម្លងតាមការរួមរក្ស ដោយ មានដៃគូច្រើន ឬដៃគូមិនប្រាកដប្រជា...) គ្រូពេទ្យសូមណែនាំមិនឱ្យជ្រើសរើសយកការប្រើកងដាក់ក្នុងស្បូនជាមធ្យោបាយពន្យារកំណើតទេ។ ស្ត្រីដែលមានស្បូនមិនប្រក្រតី មានដុំសាច់ក្នុងស្បូន និងស្ត្រីដែលកំពុងមានជំងឺរលាកឬជំងឺបង្ករោគនៅប្រដាប់ភេទ មិនត្រូវអនុញ្ញាតឱ្យប្រើកងក្នុងស្បូនទេ។
ការដាក់កងក្នុងស្បូន ប្រព្រឹត្តទៅ តែប៉ុន្មានមួយនាទីប៉ុណ្ណោះ។ ស្ត្រីអាចសម្រេចចិត្តដាក់កងបានគ្រប់ពេលឱ្យតែប្រាកដថាអ្នកគ្មានផ្ទៃពោះ។ ជាទូទៅ គ្រូពេទ្យណែនាំឱ្យដាក់កងនៅរវាងពីថ្ងៃទី ១ ដល់ថ្ងៃទី ១២នៃវដ្តរដូវ ឬបួនទៅ៦សប្តាហ៍ក្រោយការសម្រាលកូនរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ