ខេមបូចារកឃើញថា អ្នកកាសែត៥៣នាក់ក្នុងចំណោម៧២នាក់ត្រូវបានចាប់ឃុំខ្លួន និងរកអំពើហិង្សាក្នុងឆ្នាំ២០២០
សមាគមសម្ព័ន្ធអ្នកសារព័ត៌មានកម្ពុជាហៅកាត់ថា (ខេមបូចា )នៅថ្ងៃទី២៩ ខែមីនានេះ បានចេញផ្សាយរបាយការណ៍ជាលើកដំបូងរបស់ខ្លួនស្តីពីស្ថានភាពសារព័ត៌មាននៅក្នុងប្រទេសកម្ពុជាក្នុងឆ្នាំ២០២០។ នៅក្នុងរបាយការណ៍នេះ ខេមបូចា បានរកឃើញថា នៅក្នុងឆ្នាំ២០២០កន្លងទៅ អ្នកសារព័ត៌មាននៅកម្ពុជាចំនួន៥៣នាក់ក្នុងចំណោម៧២នាក់ត្រូវបានចាប់ឃុំខ្លួន និងរងអំពើហិង្សា ហើយបទចោទព្រហ្មទណ្ឌ គឺជាបទចោទពេញនិយមជាងគេដែលអាជ្ញាធរ និងតុលាការយកមកប្រើប្រាស់ ដើម្បីប្រឆាំងនឹងអ្នកសារព័ត៌មាន។
ចុះផ្សាយនៅថ្ងៃ៖
ស្តាប់ - ០២:២៣
«មានការយាយីចំនួន៣៥ករណី ប្រឆាំងនឹងអ្នកសារព័ត៌មានចំនួន៧២នាក់ ក្នុងឆ្នាំ ២០២០» នេះគឺជាការរកឃើញរបស់សមាគមសម្ព័ន្ធអ្នកសារព័ត៌មានកម្ពុជាហៅកាត់ថា ខេមបូចា នៅក្នុងរបាយការណ៍កម្រាស់២៨ទំព័រ។ ខេមបូចា បានវែកញែកទៀតថា ប្រភេទនៃការយាយីប្រឆាំងនឹងអ្នកសារព័ត៌មានទាំងនេះ ដែលកើតឡើងច្រើនជាងគេ គឺការដាក់ពន្ធនាគារ និងការប្រើអំពើហិង្សា។ ក្នុងនោះ អ្នកសារព័ត៌មានចំនួន៣១នាក់ ត្រូវបានចាប់ឃុំខ្លួន និង២២នាក់ទៀតបានទទួលរងការវាយដំលើរូបរាងកាយ ឬរងការគំរាមប្រើអំពើហិង្សានៅពេលកំពុងបំពេញការងារ។
បើតាមខេមបូចា បទចោទញុះញង់ឱ្យប្រព្រឹត្តបទឧក្រិដ្ឋជាអាទិ៍ ឬជំរិតទារប្រាក់នៃក្រមព្រហ្មទណ្ឌ ត្រូវបានប្រើប្រាស់ភាគច្រើនមែនទែនក្នុងការប្រឆាំងនឹងអ្នកសារព័ត៌មាននៅក្នុងប្រទេសកម្ពុជា។ យ៉ាងណាក៏ដោយ ខេមបូចា បានអះអាងថា ការចាប់ខ្លួន ការឃុំខ្លួន និងការគំរាមកំហែងជាបន្តបន្ទាប់មកលើអ្នកសារព័ត៌មាន គឺធ្វើឱ្យប៉ះពាល់ដល់តួនាទីរបស់ប្រព័ន្ធផ្សព្វផ្សាយនៅក្នុងសង្គមប្រជាធិបតេយ្យ និងធ្វើឱ្យមានការភ័យខ្លាចចំពោះអ្នកដែលចុះផ្សាយរឿងរ៉ាវ ឬករណីពាក់ព័ន្ធនឹងមន្រ្តីអ្នកមានអំណាច។
លោកណុប វី នាយកប្រតិបត្តិខេមបូចា បានកត់សម្គាល់ថា អ្នកសារព័ត៌មាន ដែលចុះផ្សាយ និងរាយការណ៍អំពីផលប្រយោជន៍របស់មន្រ្តីយោធា និងអ្នកមានអំណាចនៅតែត្រូវបានគេធ្វើទុក្ខបុកម្នេញតាមរយៈប្រព័ន្ធតុលាការ ដែលប្រើប្រាស់ច្បាប់ព្រហ្មទណ្ឌជំនួសច្បាប់ស្តីពីរបបសារព័ត៌មាន។ ម្យ៉ាងវិញទៀត ពួកគេត្រូវបានគេវាយដំ និងទទួលរងនូវអំពើហិង្សាជាបន្តបន្ទាប់។ ប្រឈមនឹងបញ្ហាទាំងអស់នេះ ខេមបូចា បានអំពាវនាវដល់រដ្ឋាភិបាលកម្ពុជាឱ្យធានានូវសុវត្ថិភាព និងសន្តិសុខរបស់អ្នកសារព័ត៌មានទាំងអស់ ដើម្បីឱ្យពួកគេអាចអនុវត្តសិទ្ធិរបស់ពួកគេក្នុងការរាយការណ័ព័ត៌មានដោយសេរី និងដោយគ្មានការភ័យខ្លាច។
ជាការកត់សម្គាល់ របាយការណ៍របស់សមាគមសម្ព័ន្ធអ្នកសារព័ត៌មានកម្ពុជានេះ បានចេញផ្សាយឡើងតែប៉ុន្មានថ្ងៃប៉ុណ្ណោះ បន្ទាប់ពីក្រសួងព័ត៌មានបានលុបចោលអាជ្ញាបណ្ណសារព័ត៌មានអនឡាញ៤ ជាប់គ្នាៗតែម្តង។ អាជ្ញាបណ្ណសារព័ត៌មានអនឡាញទាំងនេះ ត្រូវបានលុបចោលក្រោយពីបានចុះផ្សាយព័ត៌មានប៉ះពាល់ដល់ព្រះសង្ឃ និងព្រះពុទ្ធសាសនា និងចុះផ្សាយព័ត៌មានមិនពិតពាក់ព័ន្ធបញ្ហាជំងឺកូវីដ-១៩ នៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ