លោកស ខេង បានមកដល់កម្ពុជាវិញហើយ បន្ទាប់ពីវះកាត់ជំងឺបានជោគជ័យនៅស្រុកបារាំង
លោកស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃបានវិលត្រឡប់មកដល់ប្រទេសកម្ពុជាវិញហើយនៅព្រឹកថ្ងៃចន្ទនេះ បន្ទាប់ពីស្នាក់នៅប្រទេសបារាំងអស់រយៈពេល២សប្តាហ៍។ ខុទ្ទកាល័យលោកស ខេង បានចេញមកបញ្ជាក់ថា រយៈពេល២សប្តាហ៍នេះ លោកស ខេង ត្រូវបានពិនិត្យសុខភាព និងទទួលបានការវះកាត់ដោយជោគជ័យពីសំណាក់ក្រុមវេជ្ជបណ្ឌិតជំនាញរបស់បារាំង។ ប៉ុន្តែ ខុទ្ទធកាល័យមិនបានបង្ហើបឱ្យដឹងសោះឡើយថា លោករដ្ឋមន្រ្តីក្រសួងមហាផ្ទៃកម្ពុជាមានជំងឺអ្វីនោះទេ។
ចុះផ្សាយនៅថ្ងៃ៖
ស្តាប់ - ០២:០៧
ស្ថានភាពជំងឺរបស់លោកស ខេង រដ្ឋមន្រ្តីក្រសួងមហាផ្ទៃកម្ពុជា នៅតែស្ថិតក្នុងអាថ៏កំបាំង។ ប៉ុន្តែគេត្រឹមតែអាចបានដឹងតាមរយៈខុទ្ទធកាល័យរបស់លោកថា លោកបានធ្វើដំណើរទៅកាន់ប្រទេសបារាំង០២សប្តាហ៍មកនេះ គឺដើម្បីពិនិត្យសុខភាព និងទទួលបានការវះកាត់ដោយជោគជ័យពីក្រុមវេជ្ជបណ្ឌិតបារាំង។
បន្ទាប់ពីមកដល់ប្រទេសកម្ពុជាភ្លាមនៅព្រឹកថ្ងៃចន្ទនេះ លោករដ្ឋមន្រ្តីស ខេង ត្រូវធ្វើចត្តាឡីស័កនៅគេហដ្ឋានរបស់លោកទៅតាមគោលការណ៍របស់ក្រសួងសុខាភិបាលកម្ពុជា។ នេះបើតាមការបញ្ជាក់ឱ្យដឹងរបស់ខុទ្ទធកាល័យលោកស ខេង។
ជាការកត់សម្គាល់ ពេលស្ថិតនៅក្នុងប្រទេសបារាំង២សប្តាហ៍ លោកស ខេង ត្រូវបានក្រុមលោកសម រង្ស៊ី ផ្សព្វផ្សាយតាមបណ្តាញសារព័ត៌មានថា រូបលោកមានគម្រោងជួបក្រៅផ្លូវការជាមួយពួកគេនៅទីនោះ។ ប៉ុន្តែ ខុទ្ទធកាល័យរបស់លោកស ខេង បានចេញមកទាត់ចោលភ្លាមៗ ហើយគូសបញ្ជាក់ច្បាស់ៗថា លោកស ខេង ទៅកាន់បារាំង គឺដើម្បីពិនិត្យសុខភាព ដោយគ្មានគម្រោងជួបជាមួយអ្នកណាឡើយ។ រំលងបានបន្តិច ដល់វេនលោកសម រង្ស៊ី វិញម្តង។ ត្បិតថា កំពុងមានវត្តមាននៅអាមេរិកនាពេលនោះ ប៉ុន្តែលោកសម រង្ស៊ី បានឆ្លៀតបង្ហោះសារតាមទំព័រហ្វេសប៊ុកដោយភ្ជាប់ជាមួយលោកស ខេង។
លោកសម រង្ស៊ី បានសរសេរថា ការបង្កើតរដ្ឋាភិបាលបង្រួបបង្រួមជាតិ ដែលមានលោក ស ខេង ចូលរួមផងដែរ គឺជាគំនិតមួយដ៏ត្រឹមត្រូវ។ គឺត្រង់ចំណុចនេះហើយ លោកសម រង្ស៊ី និងក្រុមរបស់លោកបានរងនូវប្រតិកម្មខ្លាំងៗពីសំណាក់លោកស សុខា ដែលជាកូនប្រុសរបស់លោកស ខេង។
លោកស សុខា បានហៅការលើកឡើងរបស់លោកសម រង្ស៊ី នេះថា គ្រាន់តែជាការប្រឌិតឡើង ដើម្បីបំភាន់មតិជាតិ និងអន្តរជាតិសំដៅកេងចំណេញផលប្រយោជន៍នយោបាយរបស់ខ្លួន និងបក្ខពួក ហើយពិសេសអាចគ្រាន់តែជាសារដង្ហើយរកផ្លូវចរចានយោបាយជាមួយគណបក្សប្រជាជនកម្ពុជាតែប៉ុណ្ណោះ។
យ៉ាងណាក៏ដោយ វត្តមានរបស់លោកស ខេង ចូលមកក្នុងប្រទេសកម្ពុជាវិញនាពេលនេះ ត្រូវបានសាធារមតិខ្លះយល់ថា វាអាចនឹងបិទបញ្ចប់នូវព័ត៌មានចចាមអារ៉ាមនានាដែលថាលោកមានជំនួបជាមួយលោកសម រង្ស៊ី នៅបារាំង។ មួយវិញទៀត វាក៏អាចបិទបញ្ចប់នួវមន្ទិលសង្ស័យផ្សេងៗដែរ ដែលថា លោកស ខេង កំពុងមានស្ថានភាពសុខភាពធ្ងន់ធ្ងរខ្លាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ