កាសែតអង់គ្លេសThe Guardian កែតម្រូវព័ត៌មានរបស់ខ្លួនហើយ ក្រោយមេធាវីរដ្ឋាភិបាលកម្ពុជាព្រមានប្តឹង
មួយថ្ងៃក្រោយពីមានប្រតិកម្មយ៉ាងខ្លាំងក្លាពីសំណាក់រដ្ឋាភិបាល និងជាពិសេស ពីក្រុមមេធាវីរបស់រដ្ឋាភិបាលកម្ពុជា សារព័ត៌មានអង់គ្លេស The Guardian បានកែតម្រូវអត្ថបទព័ត៌មានរបស់ខ្លួនហើយដោយងាកមកសរសេរបែបនេះថា មនុស្សនៅក្បែរលោកហ៊ុន សែន ត្រូវបានរកឃើញថា បានទទួលលិខិតឆ្លងដែនប្រទេសស៊ីប។ ប៉ុន្តែ ដំបូងឡើយ សារព័ត៌មានមួយនេះ បានសរសេរចោទចំៗថា លោកនាយករដ្ឋមន្រ្តីកម្ពុជាហ៊ុន សែន ត្រូវបានរកឃើញថា ទទួលបានលិខិតឆ្លងដែនប្រទេសស៊ីបនេះ។
ចុះផ្សាយនៅថ្ងៃ៖
ស្តាប់ - ០២:១៣
នៅទីបំផុត សារព័ត៌មានអង់គ្លេស The Guardian បានកែតម្រូវអត្ថបទព័ត៌មានរបស់ខ្លួនហើយ។ កាសែតនេះកែតម្រូវមកជាបែបនេះថា«ពួកអ្នកមានអំណាចនៅរុស្ស៊ី និងអារ៉ាប៊ី សាអូឌីត ក៏ដូចជាសមាជិកនៃរង្វង់ផ្ទៃក្នុងមួយចំនួនរបស់មេដឹកនាំកម្ពុជាហ៊ុន សែន ត្រូវបានរកឃើញថា ស្ថិតក្នុងចំណោមជនជាតិមិនមែនអឺរ៉ុបរាប់ពាន់នាក់ដែលបានទទួលលិខិតឆ្លងដែនប្រទេសស៊ីប»។ មុននេះ សារព័ត៌មានអង់គ្លេស The Guardian បានសរសេរចំៗថា គឺរូបលោកហ៊ុន សែន តែម្តងដែលត្រូវបានរកឃើញថា បានទទួលលិខិតឆ្លងដែនពីប្រទេសស៊ីបដែលជាប្រទេសដីកោះមួយនៅទ្វីបអឺរ៉ុប។
កាលពីថ្ងៃពុធ ការចុះផ្សាយរបស់សារព័ត៌មានអង់គ្លេសមួយនេះត្រូវបានលោកសម រង្ស៊ី យកមកចុះផ្សាយបន្តតាមទំព័រហ្វេសប៊ុកដោយបន្ថែមបន្ថយខ្លះផងនោះបានទាញជះនូវប្រតិកម្មយ៉ាងខ្លាំងក្លាត្រឡប់ទៅវិញទាំងលើលោកសម រង្ស៊ី និងសារព័ត៌មានThe Guardian។ សម្រាប់រូបលោកសម រង្ស៊ី គឺលោកនាយករដ្ឋមន្រ្តីហ៊ុន សែន បានប្រកាសដាច់ណាត់ឱ្យមន្រ្តីរបស់លោកសិក្សារៀបចំធ្វើវិសោធនកម្មរដ្ឋធម្មនុញ ឬបង្កើតជាច្បាប់ថ្មី ដើម្បីដាក់កំណត់មិនឱ្យថ្នាក់ដឹកនាំកំពូលៗរបស់កម្ពុជាមានសញ្ជាតិពីរជាដាច់ខាត។
ដោយឡែក ចំពោះសារព័ត៌មានThe Guardianវិញ គឺក្រុមមេធាវីរបស់រដ្ឋាភិបាលកម្ពុជាបានចេញមកបដិសេធទាត់ចោលការចុះផ្សាយព័ត៌មាននេះ ដោយចាត់ទុកថា ជាការបំភ្លៃព័ត៌មានខុសពីការពិត។ ក្រុមមេធាវីរដ្ឋាភិបាលកម្ពុជាបានទាមទារឱ្យសារព័ត៌មានមួយនេះចុះផ្សាយកែតម្រូវឡើងវិញ។ ក្នុងពេលជាមួយគ្នានេះ ក្រុមេធាវីក៏អះអាងថាកំពុងសិក្សាលើទិដ្ឋភាពច្បាប់ក្នុងការដាក់ពាក្យប្តឹងប្រឆាំងនឹងសារព័ត៌មាននេះថែមទៀត។
ក្រៅពីក្រុមមេធាវីនេះ ក្រសួងចំណុះរដ្ឋាភិបាលកម្ពុជា២ទៀត គឺក្រសួងការបរទេស និងក្រសួងយុត្តិធម៌ក៏បានចេញដំណើរស្វែងរកការពិតជូនលោកនាយករដ្ឋមន្រ្តីហ៊ុន សែន ផងដែរ។ គឺនៅក្នុងថ្ងៃពុធតែមួយ រដ្ឋមន្រ្តីការបរទេស និងរដ្ឋមន្រ្តីយុត្តិធម៌កម្ពុជាបានផ្ញើលិខិតដោយឡែកពីគ្នាទៅកាន់រដ្ឋមន្រ្តីការបរទេស និងរដ្ឋមន្រ្តីយុត្តិធម៌ស៊ីប ដើម្បីសុំផ្តល់កិច្ចសហការក្នុងការស្រាវជ្រាវរកការពិតឱ្យឃើញចំពោះការចោទប្រកាន់ថា លោកនាយករដ្ឋមន្រ្តីហ៊ុន សែន ទទួលបានលិខិតឆ្លងដែនពីប្រទេសមួយនេះ។ ប៉ុន្តែ មកដល់ពេលនេះ ពុំទាន់មានការឆ្លើយតបយ៉ាងណានៅឡើយទេពីភាគីរដ្ឋាភិបាលប្រទេសស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ