២៣តុលា ២០២១៖ ប្រទេសហត្ថលេខីចេញថ្លែងការណ៍រៀងៗខ្លួន និងអំពាវនាវឲ្យគោរពលទ្ធិប្រជាធិបតេយ្យ
នៅថ្ងៃទី២៣ ខែតុលានេះ ប្រទេសមួយចំនួន ដែលជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសបានចេញសេចក្តីថ្លែងការណ៍រៀងៗ ខ្លួនរំឭកខួប៣០ឆ្នាំនៃកិច្ចព្រមព្រៀងនេះ។ ទន្ទឹមគ្នានឹងការអបអរ ប្រទេសអូស្ត្រាលី និងសមាជិកសភាអាមេរិក ឯណោះវិញ បានអំពាវនាវឲ្យរដ្ឋាភិបាលកម្ពុជា គោរពតាមការប្តេជ្ញាចិត្តរបស់ខ្លួន ចំពោះលទ្ធិប្រជាធិបតេយ្យ និងអព្យាក្រឹតភាព ដូចមានចែងក្នុងកិច្ចព្រមព្រៀង។
ចុះផ្សាយនៅថ្ងៃ៖
ស្តាប់ - ០២:១៦
តាមរយៈសេចក្តីប្រកាសព័ត៌មានរបស់ខ្លួន ក្រសួងការបរទេសអូស្ត្រាលី នៅថ្ងៃទី២៣ ខែតុលានេះ បានបញ្ជាក់ថាកម្ពុជាមានការរីកចម្រើនគួរឱ្យកត់សម្គាល់ក្នុងការលើកកម្ពស់ជីវភាពរស់នៅរបស់ប្រជាជននារយៈពេលបីទសវត្សរ៍កន្លងមកនេះ រួមទាំងការលើកកម្ពស់លទ្ធភាពទទួលបានការអប់រំ ការកាត់បន្ថយអត្រាមរណភាពមាតា និងទារក និងការការពារយេនឌ័រ និងវប្បធម៌ចម្រុះ។
ប៉ុន្តែអូស្ត្រាលីបានបង្ហាញក្តីបារម្ភខ្លាំង ចំពោះការធ្លាក់ចុះនៃសេរីភាព ប្រជាធិបតេយ្យ និងការបង្កើនការយាយីចំពោះទស្សនៈផ្ទុយ ជាក់ស្តែងដូចជាការហាមប្រាមគណបក្សប្រឆាំង និងការចាប់ឃុំខ្លួនសកម្មជនសង្គមស៊ីវិលជាដើម។ ជាមួយក្តីបារម្ភ អូស្ត្រាលី តាមរយៈសេចក្តីប្រកាសព័ត៌មានរបស់ក្រសួងការបរទេសដដែល បានលើកទឹកចិត្តឱ្យរដ្ឋាភិបាលកម្ពុជាចាត់វិធានការស្តារទំនាក់ទំនង ជាមួយអតីតបក្សប្រឆាំង និងសង្គមស៊ីវិលមុន ការបោះឆ្នោតនៅឆ្នាំ២០២២ និងឆ្នាំ២០២៣ និង ដើម្បីជាការលើកស្ទួយសិទ្ធិបញ្ចេញមតិផង។
ចំណែកសមាជិកព្រឹទ្ធសភាអាមេរិក៤រូប តាមរយៈសេចក្តីថ្លែងការណ៍រួមមួយ ចេញផ្សាយ កាលពីថ្ងៃទី២២ ខែតុលា បានកត់សម្គាល់ឃើញថា អ្វីដែលបានសន្យាក្នុងកិច្ចព្រមព្រៀងសន្តិភាពទីក្រុងប៉ារីស នៅតែមិនបានសម្រេច ដោយសារតែ លោកនាយករដ្ឋមន្ត្រី ហ៊ុន សែន បំពានរដ្ឋធម្មនុញ្ញកម្ពុជា និងការគ្រប់គ្រងដោយបក្សតែមួយតាំងពីឆ្នាំ ១៩៩៣។
តាមរយៈសេចក្តីថ្លែងការណ៍ អមដោយសេចក្តីស្នើច្បាប់មួយ សមាជិកព្រឹទ្ធសភាទាំង៤រូប បានលើកឡើងពីភាពចាំបាច់ ដែលរដ្ឋាភិបាលកម្ពុជាត្រូវធ្វើ គឺការប្តេជ្ញាចិត្តចំពោះការបោះឆ្នោត បែបពហុបក្ស ដោយសេរី និងយុត្តិធម៌ សម្រាប់ការបោះឆ្នោតនាពេលខាងមុខ។ កម្ពុជាត្រូវ ការពារសិទ្ធិមនុស្ស និងប្រជាធិបតេយ្យ។ បន្ថែមពីនេះ ត្រូវទម្លាក់ចោលរាល់ការចោទប្រកាន់បែបនយោបាយ ការកាត់ទោសអ្នកប្រឆាំង អ្នកសារព័ត៌មាន និងសកម្មជនសង្គមស៊ីវិល ហើយបញ្ឈប់សកម្មភាពបំពានរដ្ឋធម្មនុញ្ញ។
សូមជម្រាបថាកិច្ចព្រមព្រៀងសន្តិភាពទីក្រុងប៉ារីស ដែលមានសាក្សីពីប្រទេស១៨ បានព្រមព្រៀងគ្នានៅថ្ងៃទី ២៣ ខែតុលាឆ្នាំ ១៩៩១ ដោយដាក់ចេញនូវមូលដ្ឋានគ្រឹះ សន្តិភាព វិបុលភាព ប្រជាធិបតេយ្យ និងអធិបតេយ្យភាពសម្រាប់កម្ពុជា។ កម្ពុជា ដែលធ្លាប់រងទុក្ខដោយសង្គ្រាមស៊ីវិលដ៏ឃោរឃៅរាប់សិបឆ្នាំ មុនកិច្ចព្រមព្រៀងទីក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ