CCHR រៀបចំយុទ្ធនាការអនឡាញ៤ថ្ងៃ ក្នុងទិវាអន្តរជាតិបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកកាសែត
មជ្ឈមណ្ឌលសិទ្ធិមនុស្សកម្ពុជា(CCHR) នៅក្នុងឱកាសនៃទិវាអន្តរជាតិ ដើម្បីបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន បានរៀបចំយុទ្ធនាការពិភាក្សា តស៊ូមតិរយៈពេល៤ថ្ងៃ តាមអនឡាញ គឺចាប់ពីថ្ងៃទី១ ដល់ថ្ងៃទី៤ខែវិច្ឆិកានេះ។ តាមរយៈទិវានេះ អ្នករៀបចំកម្មវិធីបានបញ្ជាក់ថា គឺជាការក្រើនរំលឹកដល់រដ្ឋាភិបាលពិភពលោក ឲ្យបំពេញកាតព្វកិច្ចរបស់ខ្លួន ក្នុងការលើកកម្ពស់ និងគោរពនូវសេរីភាពសារព័ត៌មាន និងបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន។
ចុះផ្សាយនៅថ្ងៃ៖
ស្តាប់ - ០១:៤២
កម្មវិធីសំខាន់ៗទាំងនោះរួមមាន ការពិភាក្សាគ្នាតាមវិទ្យុស្តីពីទិវាអន្តរជាតិ ដើម្បីបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន ការជជែកពីសេរីភាពខាងសារព័ត៌មាន និងការចេញសេចក្តីថ្លែងការណ៍រួមស្តីពីអំពើនិទណ្ឌភាពប្រឆាំងអ្នកសារព័ត៌មានក្នុងប្រទេសកម្ពុជា។
ថ្ងៃជាបន្តបន្ទាប់ទៀត យុទ្ធនាការ នឹងមានការចេញផ្សាយខិតប័ណ្ណព័ត៌មានបច្ចុប្បន្នភាពនៃផែនទី ដែលបង្ហាញអំពីករណីឃាតកម្មទាំងអស់លើអ្នកសារព័ត៌មាននៅកម្ពុជា និងមានចេញផ្សាយនូវវីដេអូតុក្កតារឿង«អ្នកបន្តវេន» ដែលរៀបរាប់ពីកូនប្រុសរបស់អ្នកសារព័ត៌មាន ដែលត្រូវបានគេសម្លាប់ ហើយព្យាយាមស្វែងរកយុត្តិធម៌ជូនឪពុករបស់ខ្លួន។
តាមមជ្ឈមណ្ឌលសិទ្ធិមនុស្សកម្ពុជា ចាប់តាំងពីឆ្នាំ១៩៩៤មក យ៉ាងហោចណាស់ក៏មានអ្នកសារព័ត៌មានចំនួន១៣នាក់ ត្រូវបានគេសម្លាប់នៅក្នុងប្រទេសកម្ពុជា ដោយសារតែការបំពេញការងាររបស់ខ្លួន ក្នុងនោះ១២នាក់ បានស្លាប់ដោយសារអ្នកសារព័ត៌មានទាំងនោះ បានរាយការណ៍ព័ត៌មាន ដែលពាក់ព័ន្ធដោយផ្ទាល់ដល់បុគ្គលមានអំណាចនៅកម្ពុជា។
CCHR ឲ្យដឹងទៀតថា មកទល់បច្ចុប្បន្ននេះ ការស៊ើបអង្កេតប្រកបដោយប្រសិទ្ធភាព ឯករាជ្យ និងតម្លាភាព មិនត្រូវបានដំណើរការ ដើម្បីនាំជនល្មើស ដែលបានប្រព្រឹត្តបទឧក្រិដ្ឋមកធ្វើការជំនុំជម្រះឡើយ។
សូមបញ្ជាក់ថា ចាប់តាំងពីឆ្នាំ២០០៦ ដល់ឆ្នាំ២០២០ មានអ្នកសារព័ត៌មាននៅលើពិភពលោក ច្រើនជាង១២០០នាក់ ត្រូវបានគេសម្លាប់ ក្នុងនោះមានអ្នកសារព័ត៌មានចំនួន៩នាក់ ក្នុងចំណោម១០នាក់ ដែលត្រូវបានគេសម្លាប់ គឺជនល្មើសមិនត្រូវបាននាំយកមកផ្តន្ទាទោសតាមច្បាប់ទេ។ បញ្ហានេះត្រូវបានលោក ហួន ផន អ្នកសម្របសម្រួលគម្រោងការលើកកម្ពស់ និងការការពារសេរីភាពខាងការបញ្ចេញមតិ និងប្រព័ន្ធផ្សព្វផ្សាយឯករាជ្យនៃCCHR បញ្ជាក់ថា វាធ្វើឲ្យប៉ះពាល់ដល់សិទ្ធិមនុស្ស និងសេរីភាពក្នុងការបញ្ចេញមតិផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ