លោក ហ៊ុន សែន គ្រោងធ្វើដំណើរទៅភូមាក្នុងនាមជានាយករដ្ឋមន្ត្រីកម្ពុជា
លោកនាយករដ្ឋមន្ត្រី ហ៊ុន សែន បានប្រកាសពីការត្រៀមខ្លួនរបស់លោកទៅកាន់ភូមា ក្នុងនាមជានាយករដ្ឋមន្ត្រីកម្ពុជានាពេលខាងមុខ។ នេះគឺការប្រកាសរបស់លោកពីខេត្តព្រះសីហនុ នាថ្ងៃទី២ ខែធ្នូនេះ ខណៈកម្ពុជាក៏នឹងអញ្ជើញរដ្ឋមន្ត្រីការបរទេសភូមា មកកម្ពុជានៅសប្តាហ៍ក្រោយនេះ។
ចុះផ្សាយនៅថ្ងៃ៖
ស្តាប់ - ០២:៤៦
នៅថ្ងៃទី៦ និងទី៧ ខែធ្នូ លោក Wunna Maung Lwin រដ្ឋមន្ត្រីការបរទេសរបស់ភូមានឹងមកបំពេញទស្សនកិច្ចនៅកម្ពុជាតបតាមការអញ្ជើញរបស់ភាគីកម្ពុជា ហើយនឹងជជែកពីបញ្ហារបស់ភូមា។ នេះជាការបញ្ជាក់របស់លោកនាយករដ្ឋមន្ត្រី ហ៊ុន សែន ក្នុងឱកាសសម្ពោធដាក់ឲ្យប្រើប្រាស់ជាផ្លូវការផ្លូវចំនួន ៣៧ខ្សែ និងអាងប្រព្រឹត្តកម្មទឹកកខ្វក់ចំនួន៣ និងសមិទ្ធផលនានា ដែលចំណាយថវិកាសាងសង់សរុបប្រមាណ ៣០០លានដុល្លារអាមេរិកក្នុងក្រុងព្រះសីហនុ។
លោកនាយករដ្ឋមន្ត្រីលើកឡើងថា លោកបានត្រៀមខ្លួនជាស្រេចក្នុងការធ្វើដំណើរទៅកាន់ប្រទេសភូមា ដោយមិនមានដាក់លក្ខខណ្ឌទុកជាមុននោះទេ ហើយដំណើរទស្សនកិច្ច ដែលគ្រោងធ្វើឡើងនេះ គឺក្នុងរូបភាពជានាយករដ្ឋមន្ត្រីកម្ពុជា។
ភូមាបច្ចុប្បន្នស្ថិតក្រោមការដឹកនាំដោយរដ្ឋាភិបាលយោធារបស់ លោក មីន អ៊ុងឡាំង ក្រោយរដ្ឋប្រហារកាលពីដើមខែកុម្ភៈ ឆ្នាំ២០២១។ កាលពីអំឡុង ជំនួបកំពូលថ្ងៃ២៦-២៨តុលា២០២១ អាស៊ានមិនបានអញ្ជើញមេដឹកនាំសឹកភូមា លោក មីន អ៊ុងឡាំង ឱ្យចូលរួមនោះទេ។ ជាវិធានការដ៏កម្ររបស់អាស៊ានចំពោះក្រុមយោធាភូមា ដែលមិនខ្វល់ ឬចង់ដោះស្រាយវិបត្តិក្រោយរដ្ឋប្រហារខែកុម្ភៈ។
លោកនាយករដ្ឋមន្ត្រីបានចោទសួរថា បើអាស៊ានមានតែ៩ប្រទេស តើអាចហៅថាជាអាស៊ានយ៉ាងម្តេចនឹងកើត ព្រោះអាស៊ានត្រូវការ គោលការណ៍កុងសង់ស៊ីស ដូច្នេះបើកុងសង់ស៊ីសត្រូវតែមាន១០ ហើយម្យ៉ាងធម្មនុញ្ញអាស៊ានមិនអាចដេញសមាជិកណាមួយចេញនោះទេ។ បើតាមលោកនាយករដ្ឋមន្ត្រីនេះគឺជាការគិតគូរខ្លះៗ ខណៈកម្ពុជានឹងធ្វើជាប្រធានអាស៊ាននៅឆ្នាំ២០២២ខាងមុខនេះ។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានថ្លែងប្រាប់វិទ្យុបារាំងអន្តរជាតិនៅថ្ងៃទី០២ ខែធ្នូថា ដំណើរទស្សកិច្ច ដែលគ្រោងធ្វើនាពេលនេះ គឺជារឿងល្អ ហើយដំណើរទស្សនៈកិច្ចនេះ អាចជាការចែករំលែកនូវបទពិសោធន៍ ដែលលោកនាយករដ្ឋមន្ត្រីបានដោះស្រាយបានជោគជ័យបញ្ចប់សង្រ្គាម កាលពីចុងឆ្នាំ១៩៩៨។
លោកបណ្ឌិត គិន ភា បន្ថែមថា ដំណើរទស្សនកិច្ច ដែលគ្រោងធ្វើនេះក៏មិនធ្វើឲ្យខូច ឬប៉ះពាល់ដល់ឯកភាពរបស់អាស៊ានដែរ ប៉ុន្តែជាការបង្ហាញពីការខិតខំដោះស្រាយក្នុងនាមជាសមាជិកអាស៊ាន ខណៈកម្ពុជាក៏ក្លាយជាប្រធានអាស៊ាននាឆ្នាំ២០២២ខាងមុខ ហើយនេះក៏ជារឿងសំខាន់ ដែលត្រូវរកឲ្យឃើញនូវដំណោះស្រាយនយោបាយសម្រាប់ប្រទេសភូមា ដែលអាចទទួលយកបានពីគ្រប់ភាគីពាក់ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ