លោក ហ៊ុន សែន អរគុណមិត្តចិន ដែលផ្តល់ជំនួយវិមានកីឡដ្ឋាន តែសង្ឃឹមថា «នឹងមិនមានសម្ពាធ»
ថ្ងៃសៅរ៍ទី១៨ខែធ្នូនេះ នាយករដ្ឋមន្ត្រីកម្ពុជា លោក ហ៊ុន សែន អញ្ជើញសម្ពោធដាក់ឱ្យប្រើប្រាស់ «វិមានកីឡដ្ឋាន» ដែលជាសំណង់ធំជាងគេ នៃពហុកីឡដ្ឋានជាតិមរតកតេជោ ស្ថិតក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។ នេះគឺជាសំណង់ប្រវត្តិសាស្ត្រមួយទៀតសម្រាប់កម្ពុជា និងជាប្រវត្តិសាស្ត្រសម្រាប់ទំនាក់ទំនងកម្ពុជា-ចិន ដែលទទួលបានថវិកាជាជំនួយឥតសំណងសម្រាប់ការសាងសង់ពីរដ្ឋាភិបាលចិន ក្នុងទំហំទឹកប្រាក់ប្រមាណ១៦០លានដុល្លារ។ វិមានកីឡដ្ឋាន នេះ មានខ្នាតធំដែលអាចផ្ទុកអ្នកទស្សនាបាន រហូតដល់ ៦ម៉ឺននាក់ ហើយមានសមត្ថភាពទទួលរៀបចំព្រឹត្តិការណ៍ប្រកួតកីឡាថ្នាក់ជាតិ និងអន្តរជាតិធំៗកម្រិតពិភពលោក។ ដូចសព្វដង លោកនាយករដ្ឋមន្ត្រី ហ៊ុន សែន កោតសរសើរនិងអរគុណមិត្តចិន តែលោកសង្ឃឹមថា «នឹងមិនមានសម្ពាធ» បន្ថែមតាមរយៈមិត្តភាពកម្ពុជា-ចិន នេះទេ។
ចុះផ្សាយនៅថ្ងៃ៖
ស្តាប់ - ០១:៤៩
«វិមានកីឡដ្ឋាន» ខ្នាតអន្តរជាតិថ្មីនេះ សង់ដោយក្រុមហ៊ុនឯកជន តែលោកនាយករដ្ឋមន្ត្រី ហ៊ុន សែន ចាត់ទុកថា «នេះជាសមិទ្ធផលរបស់ជាតិ»។ នៅកៀកក្បែរនឹងលោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា លោក ហ៊ុន សែន បានថ្លែងអំណរគុណដល់រដ្ឋាភិបាលក្រុងប៉េកាំង និងប្រជាជនចិន ចំពោះទឹកចិត្តដ៏ធំធេង ក្នុងការផ្ដល់ជំនួយសន្ធឹកសន្ធាប់ដល់កម្ពុជា។ វិមានកីឡដ្ឋាននេះ គឺជាកញ្ចប់អំណោយធំជាងគេរបស់ចិនកុម្មុយនិស្តចំពោះស្រុកខ្មែរ។ ប្រមុខរដ្ឋាភិបាលខ្មែរ បានសរសើរមិត្តចិនរបស់ខ្លួន ដែលផ្ដល់ឱកាសឲ្យ ជាងខ្មែរ ជាអ្នកជ្រើសរើសរចនាប័ទ្មម៉ូដពហុកីឡដ្ឋាន ទោះបីលុយសាងសង់ ជារបស់ចិនទាំងស្រុងក្តី។
យ៉ាងណាក៏ដោយចុះ លោកនាយករដ្ឋមន្ត្រីកម្ពុជា សង្ឃឹមថា «នឹងគ្មានសម្ពាធណាមួយថែមទៀត ដោយសារតែទំនាក់ទំនងស្អិតរមួត រវាងកម្ពុជា-ចិន»។ ក៏ប៉ុន្តែ ទោះបីជាមានសម្ពាធពីមហាអំណាចណាក៏ដោយ ក៏លោក ហ៊ុន សែន នៅតែប្រកាសក្តែងៗជាថ្មី ពីគោលជំហររបស់ខ្លួន ក្នុងការរក្សាការពារសន្តិភាព។
ឆ្នាំខាងមុខនេះ ក្នុងឋានៈកម្ពុជាជាប្រធានវិលជុំអាស៊ាន គឺអ្នកឃ្លាំមើលជំហរការទូតរបស់កម្ពុជា គេដាក់ក្តីបារម្ភស្រេចទៅហើយ ថា កម្ពុជាអាចនឹងផ្អៀង ទៅផ្តល់ប្រយោជន៍ឲ្យ ចិន ជាម្ចាស់ជំនួយធំ គឺល្អៀងទៅចិន ជុំវិញការសម្រេចចិត្តណាមួយ ដែលមាន ចិន ក្នុងជម្លោះនានាក្នុងតំបន់។
ជាថ្មីម្តងទៀត ក្នុងនាមថ្នាក់ដឹកកំពូល លោក ហ៊ុន សែន បានថ្លែងអំណរអរព្រះគុណ ចំពោះ សម្តេច នរោត្តម សីហនុ ដែលបានផ្ដើមទាក់ទងជាមួយចិន ហើយបន្សល់កេរមរតកចំណងទូត រវាងប្រទេសទាំងពីរ ដល់អ្នកជាន់ក្រោយ។ ចំពោះចិន ផ្អែកតាមប្រវត្តិសាស្ត្រសម័យទំនើប គឺបក្សកុម្មុយនីស្តចិន មិនដែលបោះបង់ស្រុកខ្មែរ ឡើយទោះបីក្នុងសម័យវាលពិឃាតខ្មែរក្រហមក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ