ខ្សែភាពយន្តរឿង «ប៊ូឌីញ ស» ដែលជាប់ពានរង្វាន់នៅបរទេស ចាប់ផ្ដើមចាក់បញ្ចាំងនៅស្រុកខ្មែរ
ខ្សែភាពយន្តរឿង «ប៊ូឌីញ ស» របស់សមិទ្ធករ នាង កាវិច ដែលជាប់ពានរង្វាន់នៅមហោស្រពភាពយន្តអ៊ីតាលី Venice មានចាក់បញ្ចាំងនៅកម្ពុជាហើយ ចាប់តាំងពីថ្ងៃទី០៧ខែមេសា។ នៅក្នុងពិធីសម្ពោធខ្សែភាពយន្ត «ប៊ូឌីញ ស» នៅផ្សារទំនើប Midtown ក្នុងទីក្រុងភ្នំពេញកាលពីដើមសប្ដាហ៍នេះ សមិទ្ធករភាពយន្ត លោក នាង កាវិច បានគូសបញ្ជាក់ថា លោកផលិតខ្សែភាពយន្តនេះឡើង ដោយសារលោកមានអនុស្សាវរីយ៍រស់នៅក្នុងអគារប៊ូឌីញស។ មួយវិញទៀត តាមរយៈខ្សែភាពយន្តនេះ លោកក៏ចង់ឲ្យកូនខ្មែរជំនាន់ក្រោយបានស្គាល់អគារប៊ូឌីញស បើទោះបីជាអគារនេះ រលាយបាត់រូបរាងពីពិភពលោកនេះហើយក៏ដោយ។
ចុះផ្សាយនៅថ្ងៃ៖
ស្តាប់ - ០២:៥២
ខ្សែភាពយន្តរឿង «ប៊ូឌីញ ស» ឬ «White Building» ចាប់ដំណើរការផលិតឡើងតាំងពីឆ្នាំ២០១៦ លើកឡើងពីជីវិតគ្រួសារជាច្រើនដែលរស់នៅក្នុងអគារប៊ូឌីញ មុននឹងអគារនេះត្រូវវាយកម្ទេចចោល នៅថ្ងៃទី១៧ខែកក្កដាឆ្នាំ២០១៧។ ដោយធ្លាប់រស់នៅក្នុងអគារនេះតាំងពីតូចក្រូចឆ្មារ សមិទ្ធករភាពយន្តវ័យក្មេង លោក នាង កាវិច បានសម្រេចបន្តការផលិតរឿង «ប៊ូឌីញ ស» រហូតទាល់តែចប់ បើទោះបីជាអគារនេះ លែងមានវត្តមានលើលោកនេះទៀតហើយក៏ដោយ។
គួរកត់សម្គាល់ថា មុននឹងចាក់បញ្ចាំងនៅកម្ពុជា ខ្សែភាពយន្តរឿង «ប៊ូឌីញ ស» បានបង្ហាញខ្លួននៅតាមមហោស្រពភាពយន្តអន្ដរជាតិជាង២០លើករួចមកហើយ ហើយបានទទួលពានរង្វាន់ពីមហោស្រពអន្ដរជាតិចំនួន២។ បន្ថែមពីលើនោះ រឿង «ប៊ូឌីញ ស» របស់លោក នាង កាវិច ក៏បានចាក់បញ្ចាំងនៅរោងភាពយន្តទូទាំងប្រទេសបារាំងផងដែរ កាលពីចុងខែធ្នូឆ្នាំ២០២១ ដោយបានទទួលការគាំទ្រយ៉ាងច្រើនកុះករពីសំណាក់អ្នកទស្សនានៅទីនោះ។
ឆ្លើយនឹងសំណួររបស់វិទ្យុបារាំងអន្ដរជាតិ RFI លោក នាង កាវិច ពន្យល់ថា ការណ៍ដែលលោកពុះពារផលិតខ្សែភាពយន្តពីអគារប៊ូឌីញនេះ គឺទី១ ដោយសារតែលោកធ្លាប់រស់នៅក្នុងអគារនេះ និងទី២ លោកគិតថាអគារនេះ មានប្រវត្តិគួរឲ្យចាប់អារម្មណ៍ជាងអគារផ្សេងៗទៀតនៅស្រុកខ្មែរ៖ អគារប៊ូឌីញស ត្រូវបានរចនាឡើងដោយស្ថាបត្យករខ្មែរ លោក លូ បានហាប់ និងត្រួតពិនិត្យដោយលោក វណ្ណ ម៉ូលីវណ្ណ។ អគារនេះដាក់សម្ពោធឲ្យប្រើប្រាស់នៅឆ្នាំ១៩៦៣ សម្រាប់ប្រជាជនដែលមានចំណូលទាបនិងមធ្យម។ ក្រោយសម័យខ្មែរក្រហម សិល្បករ-សិល្បការិនីជាច្រើន បានចូលមកតាំងទីលំនៅនៅក្នុងអគារប៊ូឌីញ ដែលក្នុងចំណោមនោះក៏មានលោកឪពុករបស់លោក នាង កាវិច មួយរូបដែរ។
លោក នាង កាវិច ចាត់ទុកខ្សែភាពយន្តរឿង «ប៊ូឌីញ ស» ថាជាវីដេអូឯកសារដ៏សំខាន់សម្រាប់រូបលោក និយាយដោយឡែក និងសម្រាប់កូនខ្មែរជំនាន់ក្រោយ និយាយជារួម ឲ្យបានដឹង បានស្គាល់ និងបានយល់ពីជីវិតអ្នករស់នៅអគារនេះ ទាំងក្នុងពេល និងក្រោយពេលដែលអគារនេះរលាយបាត់រូប។ សូមជម្រាបដែរថា ក្រៅពីខ្សែភាពយន្តរឿង «ប៊ូឌីញ ស» លោក នាង កាវិច ក៏បានផលិតខ្សែភាពយន្តឯកសារមួយទៀតស្ដីពីអគារនេះដែរ ដោយដាក់ចំណងជើងថា «យប់មិញបងឃើញអូនញញឹម»។ ខ្សែភាពយន្តឯកសារ «យប់មិញបងឃើញអូនញញឹម» បានចាក់បញ្ចាំងនៅតាមមហោស្រពខ្សែភាពយន្តអន្ដរជាតិជាច្រើន កាលពីឆ្នាំ២០១៩ ប៉ុន្តែពុំទាន់បានចាក់បញ្ចាំងជាទូទៅនៅកម្ពុជានៅឡើយទេ រហូតមកទល់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ