លោក ហ៊ុន សែន បារម្ភការផ្ទុះកូវីដ១៩ក្នុងសហគមន៍ក្រោយពិធីបុណ្យចូលឆ្នាំខ្មែរ ដ្បិតពលរដ្ឋមិនសូវអនុវត្តវិធានសុខាភិបាល
លោកនាយករដ្ឋមន្ត្រី ហ៊ុន សែន ក្នុងឱកាសពិធីបុណ្យចូលឆ្នាំខ្មែរថ្ងៃទីពីរនេះ បានសម្តែងនូវក្តីបារម្ភរបស់ខ្លួនជុំវិញការផ្ទុះកូវីដ១៩នៅក្នុងសហគមន៍ជាថ្មី នាក្រោយពិធីបុណ្យចូលឆ្នាំប្រពៃណីខ្មែរ។ ក្តីបារម្ភនេះកើតមាន ស្របពេលដែលលោក ហ៊ុន សែន សង្កេតឃើញថា ពលរដ្ឋដើរកម្សាន្តនាថ្ងៃទីមួយមិនសូវប្រកាន់ខ្ជាប់នូវវិធានសុខាភិបាលបានល្អខ្ជាប់ខ្ជួនប៉ុន្មាន។
ចុះផ្សាយនៅថ្ងៃ៖
ស្តាប់ - ០១:៥៧
តាមរយៈសារជាសំឡេងជាង៧នាទី នាព្រឹកថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានសង្កេតឃើញថា ពលរដ្ឋមួយចំនួនដែលដើរកម្សាន្តពុំបានពាក់ម៉ាសឲ្យបានខ្ជាប់ខ្ជួនប៉ុន្មាននោះទេ។ នេះគឺជាក្តីកង្វល់មួយរបស់ប្រមុខរដ្ឋាភិបាលកម្ពុជា អំពីការឆ្លងរាលដាលនៃជំងឺកូវីដ១៩ចូលទៅក្នុងសហគមន៍ ក្រោយឱកាសពិធីបុណ្យចូលឆ្នាំប្រពៃណីជាតិខ្មែរ។
លើសពីនេះយុទ្ធនាការចាក់វ៉ាក់សាំងកូវីដ១៩នាឱកាសបុណ្យចូលឆ្នាំខ្មែរ ក៏មិនសូវមានពលរដ្ឋទៅទទួលនាថ្ងៃទីមួយប៉ុន្មានដែរ។ បើតាមលោក ហ៊ុន សែន លោកទទួលស្គាល់ប៉ុន្មានថ្ងៃដំបូងនេះ ប្រជាពលរដ្ឋរវល់ដើរលេងកម្សាន្ត។
នៅចំពោះមុខនៃក្តីកង្វល់នេះ លោក ហ៊ុន សែន បានអំពាវនាវឲ្យពលរដ្ឋចូលរួមការពារខ្លួនតាមវិធានសុខាភិបាលឲ្យបានម៉ត់ចត់។ ហើយជាពិសេសនោះ ប្រមុខរដ្ឋាភិបាលកម្ពុជារូបនេះ ក៏រំពឹងទុកថា ពលរដ្ឋនឹងទៅទទួលយកវ៉ាក់សាំងកូវីដ១៩ នៅថ្ងៃទី១៦ ឬ ទី១៧ បន្ទាប់ពីការដើរកម្សាន្តចូលឆ្នាំរួចរាល់។ បើតាមលោក ហ៊ុន សែន ពលរដ្ឋគួរតែទៅទទួលយកវ៉ាក់សាំងនៅតាមទីតាំងដែលបានរៀបចំ ដើម្បីឲ្យអត្រាអ្នកចាក់ដូសជំរុញ មានភាពស៊ាំនៅក្នុងសហគមន៍មានចំនួនច្រើន។
គួរបញ្ជាក់ថា ក្នុងអំឡុងពេលពិធីបុណ្យចូលឆ្នាំប្រពៃណីខ្មែរ ក្រសួងសុខាភិបាលបានសម្រេចបង្កើនយុទ្ធនាការចាក់វ៉ាក់សាំងកូវីដ១៩នៅតាមរាជធានី-ខេត្ត ដើម្បីសម្រួលដល់ពលរដ្ឋក្នុងការទទួលបានវ៉ាក់សាំងកូវីដ១៩។ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ធ្លាប់លើកឡើងថា យុទ្ធនាការនេះធ្វើឡើងដើម្បីសម្រួលដល់ពលរដ្ឋអាចទទួលបានវ៉ាក់សាំង ពេលដើរកម្សាន្ត ក្នុងការទប់ស្កាត់ការឆ្លងជំងឺកូវីដ១៩។
គិតមកដល់ថ្ងៃទី១៤មេសា អ្នកទទួលបានវ៉ាក់សាំងកូវីដ១៩ សម្រាប់ដូសទី១និងទី២ មានជាង១៤លាននាក់ ខណៈអ្នកទទួលបានដូសទី៣ មានជាង៨លាននាក់ និងអ្នកទទួលបានដូសទី៤ សម្រាប់ការពារជំងឺកូវីដ១៩ មានជាង១លាននាក់ នៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ