ឆ្នាំនេះភ្ញៀវទេសចរជិត៤លាន៦សែននាក់ដើរកម្សាន្តឱកាសចូលឆ្នាំខ្មែរដែលប្រហាក់ប្រហែលឆ្នាំ២០១៩
រយៈពេល៣ថ្ងៃនៃពិធីបុណ្យចូលឆ្នាំខ្មែរប្រពៃណីជាតិ កម្ពុជាមានភ្ញៀវទេសចរជិត ៤លាន៦សែននាក់។ នេះបើតាមរបាយការណ៍ក្រសួងទេសចរណ៍។ បើតាមក្រសួងទេសចរណ៍ ក្នុងចំណោមភ្ញៀវទេសចរសរុប មានភ្ញៀវជាតិជាង ៤លាន៥សែននាក់ និងភ្ញៀវបរទេសផ្ទៃក្នុង ជិត៣ម៉ឺននាក់។ ជាចំនួនភ្ញៀវទេសចរប្រហាក់ប្រហែលនឹង៣ថ្ងៃនៃថ្ងៃចូលឆ្នាំប្រពៃណីជាតិខ្មែរកាលពីឆ្នាំ២០១៩ដែរ។
ចុះផ្សាយនៅថ្ងៃ៖
ស្តាប់ - ០២:០១
ក្រសួងទេសចរណ៍ បានចេញរបាយការណ៍ភ្ញៀវទេសចរកម្សាន្តពិធីបុណ្យចូលឆ្នាំខ្មែរប្រពៃណីជាតិនៅឆ្នាំ២០២២នេះ ដោយបង្ហាញថា មានសរុបជិត ៤លាន៦សែននាក់ ក្នុងនោះ មានភ្ញៀវជាតិជាង ៤លាន៥សែននាក់ និងភ្ញៀវបរទេសផ្ទៃក្នុងជិត៣ម៉ឺននាក់។ ចំនួននេះត្រូវបានក្រសួងទេសចរណ៍មើលឃើញថា ប្រហាក់ប្រហែលនឹងភ្ញៀវចេញកម្សាន្តពិធីបុណ្យចូលឆ្នាំខ្មែរកាលពីមុនវិបត្តិកូវីដឆ្នាំ២០១៩ដែរ។ បើតាមក្រសួងទេសចរណ៍ សរុបថ្ងៃទី១ និងទី២ ចរន្តភ្ញៀវនាពេលចូលឆ្នាំនេះ មានចំនួនច្រើនជាងឆ្នាំ២០១៩ដែលមិនទាន់មានជំងឺកូវីដ ប៉ុន្តែសម្រាប់ថ្ងៃទី៣នេះ ដោយសារមានភ្លៀងធ្លាក់ពីតិចទៅច្រើននៅគ្រប់ខេត្តធ្វើឲ្យភ្ញៀវសរុបមានចំនួនតិចជាងឆ្នាំ២០១៩។
សេចក្តីរាយការណ៍របស់មន្ទីរទេសចរណ៍ទាំង២៥ខេត្ត-រាជធានីទៅក្រសួងទេសចរណ៍ បង្ហាញថា ទីតាំងដែលមានពលរដ្ឋខ្មែរទៅលេងកម្សាន្តច្រើនជាងគេនៅថ្ងៃពិធីបុណ្យចូលឆ្នាំខ្មែរគឺ ខេត្តបាត់ដំបងដែលមានចំនួនជាង ៥សែន៦ម៉ឺននាក់។ ខណៈខេត្តសៀមរាបមានជាង ៤សែននាក់ និងខេត្តព្រះសីហនុមានជាង២សែន៣ម៉ឺននាក់។
រដ្ឋមន្ត្រីក្រសួងទេសចរណ៍ លោក ថោង ខុន នៅថ្ងៃទី១៧មេសា បានវាយតម្លៃថា ការប្រារព្ធ គ្មានបាតុភាពធំដុំណាមួយកើតឡើងនោះទេ ព្រោះថាការគ្រប់គ្រងចរន្តភ្ញៀវ ការពង្រឹងការអនុវត្តវិធានសុវត្ថិភាព និង SOP ក្នុងការទប់ស្កាត់ការរាលដាលជំងឺកូវីដ១៩ និងការបញ្ចៀសការលក់ឡើងថ្លៃហួសហេតុ និងបញ្ហាបរិស្ថានអនាម័យដំណើរការទៅបានយ៉ាងល្អ។
លោក ហូ វណ្ឌី សហប្រធានក្រុមការងារវិស័យទេសចរណ៏ផ្នែកឯកជននាថ្ងៃទី១៧មេសា មើលឃើញថានេះជាសញ្ញាល្អសម្រាប់ទេសចរណ៍កម្ពុជានាពេលខាងមុខ ប្រសិនបើក្នុងករណីគ្មានផលអវិជ្ជមានពី ជំងឺកូវីដនាពេលខាងមុខនេះ។ តែយ៉ាងណាមិញ វិស័យទេសចរណ៍ទាំងមូល ត្រូវការពេលវេលាបន្ថែមទៀតដើម្បីអាចវិលទៅរកភាពដើមវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ