អ្នកការពារសិទ្ធិ៖ការបំពានរូបរាងកាយកើតមានឡើងច្រើននៅក្នុងឱកាសចូលឆ្នាំថ្មី
ល្បែងកំសាន្តនៅក្នុងឱកាសចូលឆ្នាំថ្មីគឺមានច្រើនប្រភេទទៅតាមប្រពៃណីរបស់ខ្មែរ។ ប៉ុន្តែបច្ចុប្បន្នការ លែងកំសាន្តដោយសកម្មភាពប៉ាតម៉្សៅ និងជះទឹកបានពេញនិយមខ្លាំងពីស្រទាប់យុវជននៅពេលបុណ្យចូលឆ្នាំខ្មែរឆ្នាំនេះ។ សកម្មភាពនេះ ត្រូវបានអ្នកការពារសិទ្ធិ ចាត់ទុកថា ជាការបំពានលើរូបរាង មិនមែនត្រឹមតែប្រាសចាកពីប្រពៃណីខ្មែរប៉ុណ្ណោះឡើយ។
ចុះផ្សាយនៅថ្ងៃ៖
ស្តាប់ - ០១:៤៥
ទោះបីជាអ្នកស្ម័គ្រចិត្តចេញទៅលេងខាងក្រៅនូវសកម្មភាពប៉ាតម៉្សៅ ឬជះទឹកក៏ដោយ តែមិនមានន័យថា អ្នកនោះយល់ព្រមឲ្យគេប៉ះពាល់លើរាងកាយដោយសេរី និងបៀនបៀនកេរ្តិ៍ខ្មាសនោះឡើយ។ នេះជាការគូសបញ្ជាក់របស់លោកស្រី អេង ចាន់ឌី នាយិកា អង្គការយែនឌ័រនិងអភិវឌ្ឍន៍។
អ្នកធ្វើការងារខាងការពារសិទ្ធិរូបនេះកត់សំគាល់ទៀតថា មានសកម្មភាពបានប្រព្រឹត្តិទៅដោយបន្លំឬដោយបំពានលើរូបរាង មិនថាតែលើស្ត្រីនោះឡើយ សូម្បីតែបុរស ឬអ្នកស្រឡាញ់ភេទដូចគ្នាក៏រងការពានផងដែរ។
លោកស្រី អេង ចាន់ឌី ចាត់ទុកថា សកម្មភាពទាំងនេះមិនត្រឹមតែប្រាសចាកពីប្រពៃណីខ្មែរប៉ុណ្ណោះទេ តែជាការរំលោភបំពានលើសិទ្ធិអ្នកដទៃទៀតផង។
នៅក្នុងឱកាសបុណ្យចូលឆ្នាំខ្មែរនៅឆ្នាំនេះ គឺសកម្មភាពលេងកំសាន្តរបស់យុវជនភាគច្រើនបំផុត គឺរាំធុងបាស់ ប៉ាតម៉្សៅ និងជះទឹកឬបាញ់ទឹក ខណៈដែលល្បែងប្រជាប្រិយរបស់ខ្មែរតាំងពីដូនតាមក ដូចជាបោះអង្គញ់ ចោលឈូង ទាញព្រ័ត្យ ជាដើមមិនសូវមានសកម្មភាព។ នេះជាកត់សំគាល់របស់លោកបណ្ឌិត ឈត ប៊ុនថង អតីតមន្ត្រីជំនាញខាងវប្បធម៌នៃរាជបណ្ឌិតសភាកម្ពុជា។
ទោះជាយ៉ាងណាលោកទទួលស្គាល់ថា គេពិបាកនឹងទប់ស្កាត់នូវសកម្មភាពទាំងនេះដែលមិនមែនជាប្រពៃណីរបស់ខ្មែរ ខណៈដែលទំនោររបស់យុវជនខ្មែរសម័យនេះទទួលយកវប្បធម៌របស់ប្រទេសក្បែរខាង។
នៅតាមបណ្តាញសង្គមវិញមានការរិះគន់ខ្លាំងដែរពីសកម្មភាពប៉ាតម៉្សៅ និងជះទឹកនៅក្នុងពិធីចូលឆ្នាំខ្មែរនេះថា ជាការផ្លាញប្រពៃណីវប្បធម៏ដ៏ល្អផូរផង់របស់ខ្មែរ។ មិនតែប៉ុណ្ណោះអ្នកអភិរក្សវប្បធម៌ ចង់ឃើញ ក្រសួងពាក់ព័ន្ធពិនិត្យមើលសកម្មភាពទាំងអស់នេះ ថាតើគួរតែបន្តឲ្យកើតមានតទៅទៀតដែរឬទេនៅឆ្នាំបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ