លោក ហ៊ុន សែន ៖ វៀតណាមដកទ័ពពីកម្ពុជានៅថ្ងៃ៣០កញ្ញា១៩៨៩ មុនកិច្ចព្រមព្រៀងប៉ារីស
លោកនាយករដ្ឋមន្ត្រី ហ៊ុន សែន បានអះអាងថា វៀតណាមបានដកកងទ័ពរបស់ខ្លួនចេញពីកម្ពុជាតាំងពីថ្ងៃ៣០កញ្ញា១៩៨៩ បន្ទាប់ពីជំនាញការរបស់វៀតណាមដកចេញពីកម្ពុជាបានមួយឆ្នាំ។ ការអះអាងបែបនេះរបស់ លោក ហ៊ុន សែន គឺនៅចំពោះមុខនាយករដ្ឋមន្ត្រីវៀតណាម ក្នុងពិធីអបអរសាទរខួប៤៥ឆ្នាំ នៃដំណើរឆ្ពោះទៅរកការតស៊ូរំដោះជាតិទី២០មិថុនា នៅព្រំប្រទល់ដែនកម្ពុជា-វៀតណាម ក្នុងខេត្តត្បូងឃ្មុំ នៅថ្ងៃចន្ទនេះ។
ចុះផ្សាយនៅថ្ងៃ៖
ស្តាប់ - ០២:៥៦
លោកប្រមុខរដ្ឋាភិបាលកម្ពុជា បានថ្លែងថា កងទ័ពវៀតណាមបានដកចេញពីកម្ពុជានៅថ្ងៃ៣០កញ្ញា១៩៨៩ គឺផ្ទុយស្រឡះពីមជ្ឈដ្ឋានមួយចំនួនដែលតែងតែអះអាងថា វៀតណាមសុខចិត្តដកទ័ពចេញពីកម្ពុជា ក៏ព្រោះតែមានកិច្ចព្រមព្រៀងប៉ារីស២៣តុលាឆ្នាំ១៩៩១។
បើតាម លោក ហ៊ុន សែន ក្រុមអ្នកជំនាញការវៀតណាមក៏បានដកចេញពីកម្ពុជាតាំងពីខែមិថុនាឆ្នាំ១៩៨៨ ពោលមុនពេលកងទ័ពដកចេញពីកម្ពុជាទៅទៀត នោះក៏ព្រោះតែលោកចង់ឲ្យមន្ត្រីកម្ពុជាចេះធ្វើការដោយខ្លួនឯង។
តាមឯកសារមួយចំនួនបានឲ្យដឹងថា តាំងពីថ្ងៃទី២៥ ខែធ្នូ ឆ្នាំ១៩៧៨ កងទ័ពវៀតណាមប្រមាណ ១៥ម៉ឺននាក់ បានចាប់ផ្ដើមវាយលុកចូលប្រទេសកម្ពុជា និងដណ្ដើមបានទីក្រុងភ្នំពេញពីរបបខ្មែរក្រហម ជោគជ័យនៅថ្ងៃទី៧ ខែមករា ឆ្នាំ១៩៧៩។
យោងតាមឯកសាររបស់លោក វ៉ាន់ឌី កាអ៊ុន វៀតណាមបានដកទ័ពចេញពីកម្ពុជាជាឯកតោភាគីនៅថ្ងៃទី៥មេសាឆ្នាំ១៩៨៩ ខណៈដែលពេលនោះខាងវៀតណាមសុខចិត្តចរចាជាមួយចិន បន្ទាប់ពីសហភាពសូវៀតព្រមដកខ្លួនចេញពីរាល់ទំនាស់ក្នុងភូមិភាគ។ មួយថ្ងៃបន្ទាប់ពីវៀតណាមដកទ័ពចេញកម្ពុជា សម្តេចព្រះនរោត្តម សីហនុ បានស្នើឲ្យបារាំងធ្វើសន្និសិទអន្តរជាតិមួយនៅទីក្រុងប៉ារីស ហើយបារាំងក៏យល់ព្រម និងបានអបអរការដែលវៀតណាមដកទ័ពចេញពីកម្ពុជា បន្ទាប់ពីគ្រប់គ្រងអស់១០ឆ្នាំ។
ដោយឡែក ឆ្លើយតបនឹងការចោទប្រកាន់ថា រដ្ឋាភិបាលកម្ពុជាកាត់ទឹកដីឲ្យវៀតណាមនោះ លោក ហ៊ុន សែន អះអាងថាជាថ្មីទៀតនៅថ្ងៃទី២០មិថុនា២០២២នេះថា ក្រោមការគ្រប់គ្រងអំណាច៤៣ឆ្នាំរបស់គណបក្សប្រជាជនកម្ពុជា គឺលោកបានដោះស្រាយបញ្ហាព្រំដែនជាមួយវៀតណាមបាន៨៤% និងនៅសល់១៦%ទៀតកំពុងចរចា។ លោកអះអាងថាបើគង់តែកាត់ដីឲ្យវៀតណាមដដែល គឺមិនចាំបាច់នៅធ្វើការចរចារហូតមកដល់ពេលនេះឡើយ។ លោក ហ៊ុន សែន ចាត់ទុកការចោទថា លោកបានកាត់ដីឲ្យវៀតណាមនោះ គឺជាការចោទដោយអយុត្តិធម៌ ខណៈលោកអះអាងថា វៀតណាមក៏មិនចង់បានទឹកដីរបស់កម្ពុជានោះដែរ។
យោងតាមសំដីរបស់ លោក ប៊ុយ ទីន អតីតជាវរសេនីយ៍ឯកនៃកងទ័ពវៀតណាម ក្រោយមក គឺនៅឆ្នាំ១៩៩០ បានភៀសខ្លួនទៅសុំសិទ្ធិជ្រកកោននៅប្រទេសបារាំងបាននិយាយប្រាប់អ្នកសារព័ត៌មានកាលនៅរស់ថា«មេដឹកនាំកុម្មុយនិស្តវៀតណាម មិនមានគោលបំណងឈ្លានពានប្រទេសកម្ពុជាទេ ពីព្រោះក្រោយពេលសង្គ្រាម ដែលវៀតណាមទាំងពីរបានបង្រួបបង្រួមគ្នាជាប្រជាជាតិតែមួយហើយនោះ វៀតណាមបានជួបប្រទះបញ្ហាធំៗ ជាច្រើននៅក្នុងប្រទេស។ ហេតុដូចនេះ មេដឹកនាំកុម្មុយនិស្ត និងប្រជាជនវៀតណាម គឺចង់បានតែសន្តិភាពប៉ុណ្ណោះ ពីព្រោះបន្ទាប់ពីសង្គ្រាមអស់រយៈពេល ៣០ឆ្នាំមក ប្រទេសវៀតណាមរងការខូចខាតខ្ទេចខ្ទាំយ៉ាងធ្ងន់ធ្ងរ ហើយមនុស្សស្លាប់ និងរងរបួសក៏ច្រើនសន្ធឹកសន្ធាប់ដែរ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ