មន្រ្តីវៀតណាម៖ ការបង្កើតដេប៉ាតឺម៉ង់សិក្សាវៀតណាមនៅកម្ពុជា ជួយជំរុញទំនាក់ទំនងទ្វេភាគី
ដេប៉ាតឺម៉ង់សិក្សាវៀតណាមដែលនឹងត្រូវបើកនៅសកលវិទ្យាល័យភូមិន្ទភ្នំពេញនឹងជំរុញកិច្ចសហប្រតិបត្តិការលើវិស័យអប់រំ ពាណិជ្ជកម្ម និងការវិនិយោគ បង្កើនការយល់ដឹង និងការផ្លាស់ប្តូររវាងប្រជាជនទាំងពីរ។ នេះបើតាមអ្នកនាំពាក្យនៃក្រសួងការបរទេសវៀតណាម កាលពីថ្ងៃទី០៨ ខែកញ្ញា។ នៅឯកម្ពុជាវិញការបើកដេប៉ាតឺម៉ង់សិក្សាវៀតណាមបានបង្កឲ្យមានទស្សនៈផ្ទុយគ្នាផ្ទុះឡើង។
ចុះផ្សាយនៅថ្ងៃ៖
ស្តាប់ - ០២:១៥
អ្នកនាំពាក្យក្រសួងការបរទេសវៀតណាម លោក ដោន ខាក វៀត (Doan Khac Viet) បានថ្លែងនៅក្នុងសន្និសីទកាសែតប្រចាំថ្ងៃ កាលពីថ្ងៃទី០៨ ខែកញ្ញាថា វៀតណាម និងកម្ពុជា គឺជាអ្នកជិតខាងដ៏ជិតស្និទ្ធ ដែលប្រជាជន និងរដ្ឋាភិបាលចង់ជំរុញកិច្ចសហប្រតិបត្តិការយ៉ាងទូលំទូលាយលើគ្រប់វិស័យ រួមទាំងការអប់រំ និងបណ្តុះបណ្តាលដែរ។ នេះបើតាមការចុះផ្សាយរបស់សារព័ត៌មានវៀតណាម (Vietnam+)។
លោកបញ្ជាក់ថាព្រឹត្តិការណ៍ដ៏មានអត្ថន័យនេះ នឹងជំរុញកិច្ចសហប្រតិបត្តិការលើវិស័យអប់រំ ពាណិជ្ជកម្ម និងការវិនិយោគ បង្កើនការយល់ដឹង និងការផ្លាស់ប្តូររវាងប្រជាជនទាំងពីរ ព្រមទាំងរួមចំណែកជាវិជ្ជមានដល់ទំនាក់ទំនងគ្រប់ជ្រុងជ្រោយ មិត្តភាពប្រពៃណី និងយូរអង្វែងរវាងវៀតណាម និងកម្ពុជា។
កាលពីថ្ងៃទី២៣ ខែសីហា ក្នុងពិធីប្រគល់សញ្ញាបត្រដល់និស្សិតនៅសកលវិទ្យាល័យ អាស៊ីអឺរ៉ុប នាទីក្រុងភ្នំពេញ លោក នាយករដ្ឋមន្រ្តី ហ៊ុន សែន បានអះអាងថា ការបង្កើតដេប៉ាតឺម៉ង់សិក្សាវៀតណាមនៅក្នុងសាកលវិទ្យាល័យភូមិន្ទភ្នំពេញ គឺជាផលចំណេញរបស់កម្ពុជាទៅវិញទេ។ លោក ហ៊ុន សែន បញ្ជាក់ថា ការបង្កើតដេប៉ាតឺម៉ង់សិក្សាវៀតណាមនេះ ដូចជាការបង្កើតដេប៉ាតឺម៉ង់ភាសាបារាំង ឬអង់គ្លេសដូចគ្នា ដោយមិនមានអ្វីខាតដល់កម្ពុជា និងមិនអាចធ្វើឲ្យកម្ពុជាក្លាយជាកម្ពុជាក្រោមទី២នោះទេ។
កាលពីថ្ងៃទី២៩ ខែសីហា កន្លងទៅ ក្រុមយុវជនប្រមាណ១០នាក់ បានប្រមូលផ្តុំគ្នាដាក់ញត្តិនៅក្រសួងអប់រំ ដើម្បីស្នើលុបចោលការបង្កើតអគារសិក្សាភាសាវៀតណាម នៅសកលវិទ្យាល័យភូមិន្ទភ្នំពេញ។ តំណាងយុវជន លោក ថេល ធីលែន លើកឡើងថា ការដាក់ញត្តិនេះ ដោយសារតែក្រុមយុវជនលោក មិនសុខចិត្តលើគម្រោងការបង្កើតអាគារសិក្សាភាសាវៀតណាមនៅកម្ពុជា ដោយបារម្ភថា នឹងធ្វើឱ្យប៉ះពាល់ដល់ឧត្ដមប្រយោជន៍របស់ជាតិ។
លោកបញ្ជាក់ថា ក្រុមយុវជនលោកមិនអាចទទួលបាននូវការអះអាងពីរដ្ឋមន្ត្រីក្រសួងអប់រំ និងនាយករដ្ឋមន្ត្រី ដែលថា ការបង្កើតអាគារសិក្សាវៀតណាម មានសារៈសំខាន់សម្រាប់និស្សិតកម្ពុជា ក្នុងការស្វែងយល់ពីបញ្ហាផ្សេងៗប្រទេសជិតខាង រួមទាំងប្រទេសទាំងអស់ក្នុងតំបន់អាស៊ាន។ តែតាមការយល់ឃើញរបស់ក្រុមយុវជននេះ វាមិនមែនជាតម្រូវការចាំបាច់ និងផ្ដល់អត្ថប្រយោជន៍ខ្លាំងនោះទេ បើធៀបនឹងអគារសិក្សាភាសានានានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ