សំណុំរឿងព្រំដែនសមុទ្រ៖ ថៃជំរុញឱ្យមានកិច្ចចរចាថ្មីជាមួយកម្ពុជាលើតំបន់ប្រេងត្រួតស៊ីគ្នា
រដ្ឋមន្ត្រីក្រសួងថាមពលថៃបានបង្ហាញផ្លូវចូលតុពិភាក្សាកិច្ចអភិវឌ្ឍរួមគ្នាជាមួយប្រទេសកម្ពុជា លើតំបន់ត្រួតស៊ីគ្នាក្នុងដែនសមុទ្រ ដែលត្រូវបានប្រមាណថា អាចមានស្តុកប្រេងនិងឧស្ម័នខ្ទង់រយលានបារ៉ែលនៅក្រោមបាតសមុទ្រ។ បើតាមការចុះផ្សាយរបស់កាសែតថៃនៅថ្ងៃទី១៤ ខែកញ្ញាម្សិលមិញនេះ ការពិភាក្សាក្នុងសំណុំរឿងព្រំដែនសមុទ្រដែលជាប់គាំងតាំងពីដើមទសវត្ស១៩៧០មកនេះ គឺជាសញ្ញាល្អក្នុងការជួយថៃនិងកម្ពុជាដោះស្រាយវិបត្តិថាមពល។
ចុះផ្សាយនៅថ្ងៃ៖
ស្តាប់ - ០២:៥៥
បន្ទាប់ពីពន្យារពេលអស់រយៈពេល ២០ឆ្នាំ ការចរចាលើការអភិវឌ្ឍប្រេងនិងឧស្ម័ន នៅក្នុងការទាមទារតំបន់ត្រួតស៊ីគ្នានៅឈូងសមុទ្រថៃជាមួយកម្ពុជានឹងចាប់ផ្តើមឡើងវិញ ដើម្បីចូលរួមកាត់បន្ថយផលប៉ះពាល់នៃការប្រែប្រួលតម្លៃប្រេងនិងថាមពល។ រដ្ឋមន្ត្រីក្រសួងថាមពលថៃ លោក Supattanapong Punmeechaow កាលពីថ្ងៃទី១៣ ខែកញ្ញាកន្លងទៅ តាមរយៈកាសែតបាងកកប៉ុស្តិ៍ បានឱ្យដឹងទៀតថា រដ្ឋាភិបាលថៃបានបង្កើតគណៈកម្មការមួយដើម្បីធ្វើការងារនេះ ដោយមានក្រសួងការបរទេសថៃដើម្បីដឹកនាំកិច្ចចរចាជាមួយរដ្ឋាភិបាលកម្ពុជា។ តែយ៉ាងណា ប្រទេសថៃកំពុងបន្តសិក្សាព័ត៌មានលម្អិតមួយចំនួន ជាក់ស្តែងក្តីបារម្ភជុំវិញការបោះបង្គោលព្រំដែនមួយចំនួន និងការស្វែងរកដំណោះស្រាយ ពន្យល់ប្រាប់ពលរដ្ឋថៃជាដើម។
តាមការចុះផ្សាយរបស់កាសែតបាងកកប៉ុស្តិ៍ រដ្ឋាភិបាលថៃរំពឹង ការអភិវឌ្ឍន៍រួមគ្នានេះក្លាយជាផ្នែកមួយនៃគោលនយោបាយរយៈពេលវែងរបស់ខ្លួន ក្នុងការបង្កើតប្រភពថាមពលទំនើបជួយដល់បរិស្ថាន ការជម្រុញការដេញថ្លៃសម្បទានប្រេងថ្មីៗ និងការជំរុញកិច្ចពិភាក្សាថាមពលជាមួយប្រទេសក្បែរខាង ពិសេសកម្ពុជា។ ហើយអ្វីដែលលើសពីនោះ ថៃក៏ចង់ដោះស្រាយចំណុចជម្លោះយូរអង្វែងនៃដែនសមុទ្រខ្លួនជាមួយកម្ពុជាដែរ។ ថៃរំពឹងថាកិច្ចសហប្រតិបត្តិការចាប់ផ្តើមកាន់តែឆាប់ នឹងរឹតតែប្រសើរចំពោះកម្ពុជានិងថៃ។
នៅខាងភាគីកម្ពុជាវិញ លោក ម៉េង សក្តិធារ៉ា រដ្ឋលេខាធិការក្រសួងរ៉ែនិងថាមពល បានលើកឡើងក្នុងសន្និសីទមួយកាលពីដើមខែសីហាកន្លងទៅថា ការចរចាបញ្ហានេះ មានភាពស្មុគស្មាញខ្លាំង ដោយសារតែមានពាក់ព័ន្ធមិនត្រឹមតែបញ្ហាប្រេងប៉ុណ្ណោះទេ ប៉ុន្តែមានធនធានធម្មជាតិផ្សេងៗទៀត ហើយបញ្ហានេះ មានចរិតជានយោបាយផង និងជាសេដ្ឋកិច្ចផង។ លោកបន្តថា ទោះបីប្រមុខថ្នាក់ដឹកនាំប្រទេសទាំង ២ ចង់ឱ្យមានការដោះស្រាយបានឆាប់ ប៉ុន្តែវឌ្ឍនភាពនៃការចរចានេះនៅមានភាពយឺតយ៉ាវ។ តែយ៉ាងណា កម្ពុជាបានត្រៀមខ្លួនរួចស្រេចក្នុងការចរចាជាមួយភាគីថៃជុំវិញកិច្ចអភិវឌ្ឍរួមគ្នាក្នុងតំបន់ប្រេងត្រួតស៊ីគ្នានៅដែនសមុទ្រនេះ។
តំបន់ទាមទារត្រួតស៊ីគ្នា(OCA)នោះ មានមានទំហំ ២៦,០០០ គីឡូម៉ែត្រការ៉េដែលគេប៉ាន់ប្រមាណថា នឹងអាចស្តុកទុកប្រេងនិងឧស្ម័នរហូតដល់ ៥០០លានបារ៉ែលនៅក្រោមបាតសមុទ្រ។
គួររំព្ញកថា សិទ្ធិអភិវឌ្ឍន៍លើតំបន់ទាមទារត្រួតស៊ីគ្នាក្នុងឈូងសមុទ្រថៃ គឺជាចំណុចនៃជម្លោះរវាងប្រទេសជិតខាងថៃនិងកម្ពុជា ដែលបានទាមទារតំបន់នេះតាំងពីដើមទសវត្ស ១៩៧០មក។ រដ្ឋាភិបាលនៃប្រទេសទាំងពីរបានចុះហត្ថលេខាលើអនុស្សាររណៈយោគយល់ កិច្ចចរចាអភិវឌ្ឍប្រេងនិងឧស្ម័ននៅតំបន់នោះ តាំងពីខែមិថុនាឆ្នាំ២០០១ ក៏ប៉ុន្តែត្រូវបានផ្អាកនៅក្នុងអន្តរកាលប្តូរនាយករដ្ឋមន្ត្រីថៃ កាលពីឆ្នាំ២០០៩។ កិច្ចពិភាក្សាគ្នារវាងប្រទេសទាំង២ក៏ធ្លាប់ចង់គូសវាសឡើងវិញដែរ តែត្រូវបង្អាក់ដោយសារវិបត្តិជំងឺកូវីដ១៩ កាលពីចុងឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ