សុំណុំរឿងប្រេង៣០ម៉ឺនបារ៉ែលឈានដល់ការដោះស្រាយចែកផលសេដ្ឋកិច្ច
ភាគីពាក់ព័ន្ធនៅក្នុងសំណុំរឿងប្រេង ៣០ម៉ឺនបារ៉ែលបានឈានដល់ដំណាក់កាលដោះស្រាយចែកផលសេដ្ឋកិច្ច។ នេះបើតាមការបញ្ជាក់ពីមន្ត្រីជាន់ខ្ពស់នៃអគ្គនាយកដ្ឋានប្រេងកាត នៃក្រសួងរ៉ែ និងថាមពលនាថ្ងៃទី២៩ ខែកញ្ញា ដោយបញ្ជាក់ទៀតថា កម្ពុជានឹងទទួលបានចំណែក៧០% ពីការលក់ប្រេងបន្ទាប់ពីការទូទាត់លើចំណាយពាក់ព័ន្ធផ្សេងៗ។
ចុះផ្សាយនៅថ្ងៃ៖
ស្តាប់ - ០២:០៩
លោក ជៀប សួរ អគ្គនាយកនៃអគ្គនាយកដ្ឋានប្រេងកាត នៃក្រសួងរ៉ែ និងថាមពលបានថ្លែងប្រាប់វិទ្យុបារាំងអន្តរជាតិនៅថ្ងៃទី២៩ ខែកញ្ញានេះថា ភាគីពាក់ព័ន្ធដែលមានក្រុមហ៊ុនម្ចាស់បំណុលរបស់ក្រុមហ៊ុន KrisEnergyសិង្ហបុរី ក្រុមហ៊ុនកប៉ាល់ដឹកប្រេង MT Strovolous និងរដ្ឋាភិបាលកម្ពុជាបានចុះកិច្ចព្រមព្រៀងដោះស្រាយក្នុងការលក់ប្រេង ដើម្បីចែកផលសេដ្ឋកិច្ចរវាងភាគីពាក់ព័ន្ធ។
លោកបន្តថាភាគីពាក់ព័ន្ធបានចុះហត្ថលេខារួចរាល់ហើយ លើកិច្ចព្រមព្រៀងលក់ប្រេងនោះ ហើយប្រេងក៏បានផ្ទេរពីកប៉ាល់ MT Strovolous ទៅកប៉ាល់អ្នកទិញប្រេង កាលពីថ្ងៃទី១០ ខែកញ្ញា ដែលភាគីរាជរដ្ឋាភិបាលកម្ពុជានឹងទទួលបានចំណែក៧០% ពីការលក់ប្រេងបន្ទាប់ពីការទូទាត់លើចំណាយពាក់ព័ន្ធផ្សេងៗ។ លោកបញ្ជាក់ថា ចំណូលដែលជាចំណែករបស់កម្ពុជានឹងទទួលបាននៅរយៈពេល ៣០ថ្ងៃ បន្ទាប់ពីប្រេងបូមចេញពីកប៉ាល់។
យ៉ាងណាក៏ដោយ លោកមិនអាចបញ្ជាក់បានទេថាចំណែក៧០% ដែលភាគីរាជរដ្ឋាភិបាលកម្ពុជាទទួលបាននោះនឹងមានទំហំជាថវិកាប៉ុន្មាន ដោយសារតម្លៃប្រេងត្រូវយកមធ្យមភាគនៃតម្លៃប្រេងលើទីផ្សារនាខែកញ្ញាមកកំណត់ ហើយតម្លៃប្រេងកំពុងមានការប្រែប្រួលជារៀងរាល់ថ្ងៃ និងម្យ៉ាង ដោយសារមិនទាន់ដាច់ខែកញ្ញានៅឡើយ។
លោក ជៀប សួរ បន្តថានៅពេលគណនាឃើញតម្លៃប្រេងហើយ នោះត្រូវគិតលើថ្លៃចំណាយនានាបន្ថែមទៀត ដូច្នេះត្រូវរងចាំរហូតដល់ដាច់ខែកញ្ញា។
សុំណុំរឿងបាត់ប្រេងជាង ៤៧លានលីត្របាកើតឡើងកាល ពីពាក់កណ្តាលខែមិថុនា ឆ្នាំ២០២១កន្លងទៅ ដោយសារក្រុមហ៊ុនកប៉ាល់ដឹកប្រេង MT Strovolous យកហេតុផលបញ្ហាអាកាសធាតុ ដើម្បីសុំដកយុថ្កាចេញពីទីតាំងបូមប្រេងរបស់កម្ពុជា ដើម្បីទប់លំនឹងកប៉ាល់ពីបញ្ហាព្យុះ។ ក្រោយដកយុថ្ការួច កប៉ាល់ដឹកប្រេងបែរជាបើករត់ចេញពីដែនទឹករបស់កម្ពុជា។
ករណីបាត់ប្រេងនេះ បានកើតឡើងបន្ទាប់ពីក្រុមហ៊ុន Kris Energy ដែលមានមូលដ្ឋាននៅប្រទេសសិង្ហបុរី បានប្រកាសក្ស័យធន កាលពីខែមិថុនឆ្នាំ២០២១ ហើយថាខ្លួនមិនមានលទ្ធភាពសងបំណុលនោះឡើយ ដោយអះអាងថា មកពីការធ្លាក់ចុះប្រាក់ចំណូល នៃការអភិវឌ្ឍន៍វិស័យប្រេងនៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ