ក្រុមហ៊ុនរុករករ៉ែមាសមួយទៀតប្ដេជ្ញាផលិតមាសឲ្យបាន៦០គីឡូត្រឹមបំណាច់ឆ្នាំ២០២២
ក្រុមហ៊ុន រុករករ៉ែមាសមួយទៀតរបស់ចិន បានប្ដេជ្ញាផលិតមាសនៅកម្ពុជាឲ្យបាន៦០គីឡូក្រាមត្រឹមបំណាច់ឆ្នាំ២០២២នេះ។ ការប្ដេជ្ញានេះ ធ្វើឡើងនៅចំពោះមុខរដ្ឋមន្រ្តីក្រសួងរ៉ែ និងថាមពល ក្នុងដំណើរការចុះទៅកត់ត្រាទិន្នន័យស្លរ៉ែមាសលើកទី១ របស់ក្រុមហ៊ុនមួយនេះកាលពីថ្ងៃចន្ទ។
ចុះផ្សាយនៅថ្ងៃ៖
ស្តាប់ - ០២:៤៤
លោក ស៊ុយ សែម រដ្ឋមន្រ្តីក្រសួងរ៉ែ និងថាមពល កាលពីថ្ងៃទី១០ ខែតុលា ឆ្នាំ២០២២ បានចុះត្រួតពិនិត្យ ក៏ដូចជាកត់ត្រាទិន្នន័យស្លរ៉ែមាសលើកទី១ របស់ក្រុមហ៊ុន Xing Yuan Kanng Yeak Co., Ltd ជាក្រុមហ៊ុនសាជីវកម្មបរទេស (កម្ពុជា-ចិន) ដែលទទួលបានសិទ្ធិធ្វើអាជីវកម្មរុករករ៉ែមាស នៅស្រុកសំបូរ ខេត្តក្រចេះ។ នេះជាការបើកដំណើរការកត់ត្រាទិន្នន័យស្លរ៉ែមាសលើកទី១ របស់ក្រុមហ៊ុន ដែលមានទុនវិនិយោគដំបូងចំនួន ២០.០០០.០០០ រៀល ចុះបញ្ជីនៅថ្ងៃទី ១០ ខែមករា ឆ្នាំ២០១១។
ការបើកដំណើរការកត់ត្រាទិន្នន័យស្លរ៉ែមាសលើកទី១ ក្រុមហ៊ុននេះ បានកត់ត្រាថ្លឹងកំហាប់រ៉ែមាស (Gold Concentrates) មានទម្ងន់ ៧ ៨៤៩ក្រាម និងបានយកកំហាប់រ៉ែមាសនោះទៅស្ល និងចាក់ចេញជាដុំមាស (Gold Doré) បានចំនួន ០៧ដុំ មានទម្ងន់សរុប ៨ ២១២,២៧ក្រាម ដែលមានអត្រាភាពសុទ្ធ ៩៩.៩%។ បើតាមគម្រោងសាកល្បង ៣ខែដំបូង ក្រុមហ៊ុនគ្រោងផលិតឱ្យបាន ២០គីឡូក្រាមក្នុងមួយខែ ដែលគិតត្រឹមខែធ្នូ ឆ្នាំ២០២២ខាងមុខនេះ ក្រុមហ៊ុនគ្រោងផលិតឱ្យបានចំនួន ៦០គីឡូក្រាម។
បើតាមការបញ្ជាក់ពីក្រសួងរ៉ែ និងថាមពល ក្រុមហ៊ុន Xing Yuan Kanng Yeak Co., Ltd ទទួលបានអាជ្ញាប័ណ្ណឧស្សាហកម្មអាជីវកម្មរ៉ែមាស កាលពីខែសីហា ឆ្នាំ២០១៨ លើទំហំដីចំនួន ២៨គីឡូម៉ែត្រក្រឡា ដើម្បីប្រតិបត្តិការអាជីវកម្មរ៉ែមាសរបស់ខ្លួននៅស្រុកសំបូរ ខេត្តក្រចេះ។ ក្រោយពីទទួលបានអាជ្ញាប័ណ្ណ ក្រុមហ៊ុនបានតម្លើងខ្សែសង្វាក់ផលិតកម្មអាជីវកម្មរបស់ខ្លួន តែដោយសារតែបញ្ហាកូវីដ១៩ ក្រុមហ៊ុនទើបតែបានបញ្ចប់ការសាងសង់ និងរៀបចំខ្សែសង្វាក់ផលិតកម្មរបស់ខ្លួននៅក្នុងខែតុលា ឆ្នាំ២០២២។
សូមបញ្ជាក់ថា នេះជាក្រុមហ៊ុនទី២ហើយដែលក្រសួងរ៉ែ និងថាមពល បានបង្ហាញពីការទទួលបានអាជ្ញាប័ណ្ណរុករករ៉ែមាសនៅប្រទេសកម្ពុជា។ ក្រុមហ៊ុនទី១ គឺក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីធីត គឺជាក្រុមហ៊ុនមួយរបស់អូស្ត្រាលី ដែលទទួលបានអាជ្ញាប័ណ្ណរុករករ៉ែមាស ហើយអាចផលិតមាសបានប្រមាណ ៣តោនក្នុងមួយឆ្នាំ សម្រាប់រយៈពេល ៨ឆ្នាំដំបូង។ ក្រុមហ៊ុននេះ កំពុងដំណើរការអភិវឌ្ឍរ៉ែមាស ស្ថិតនៅក្នុងតំបន់អូខ្វាវ ក្នុងស្រុកកែវសីមា ខេត្តមណ្ឌលគិរី ចាប់តាំងពីថ្ងៃទី២១ ខែមិថុនា ឆ្នាំ២០២១មកម្លេះ។
លោកនាយករដ្ឋមន្រ្តី ហ៊ុន សែន ធ្លាប់បានលើកឡើងថា ក្រុមហ៊ុនធ្វើអាជីវកម្មរ៉ែមាស នឹងផ្តល់ផលប្រយោជន៍ជាចំណូលមធ្យមប្រមាណ ១៨៥លានដុល្លារក្នុងមួយឆ្នាំ ក្នុងនោះចំណូលថវិកាជាតិពីសួយសារ និងសារពើពន្ធផ្សេងៗជាមធ្យមប្រមាណ ៤០លានដុល្លារក្នុងមួយឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ