ប្រតិកម្មចម្រុះធ្លាក់មកក្នុងខួប៣១ឆ្នាំនៃកិច្ចព្រមព្រៀងសន្តិភាពក្រុងប៉ារីស
នៅថ្ងៃទី២៣តុលា២០២២នេះគឺជាខួប៣១ឆ្នាំនៃកិច្ចព្រមព្រៀងសន្តិភាពក្រុងប៉ារីស។ មានប្រតិកម្មចម្រុះពីមជ្ឈដ្ឋានអ្នកនយោបាយខ្មែរជុំវិញរឿងនេះ ខណៈភាគីក្រៅរដ្ឋាភិបាលនៅតែចាត់ទុកថា កិច្ចព្រមព្រៀងនេះនៅតែមានសារសំខាន់សម្រាប់កម្ពុជា។ ប៉ុន្តែភាគីអ្នកកាន់អំណាចបកស្រាយថា ខ្លឹមសារនៃកិច្ចព្រមព្រៀងនេះត្រូវបានបញ្ចូលទៅក្នុងរដ្ឋធម្មនុញ្ញកម្ពុជារួចហើយ។
ចុះផ្សាយនៅថ្ងៃ៖
ស្តាប់ - ០១:៥២
បើទោះបីជាពេលវេលាបានកន្លងផុតទៅ ៣១ឆ្នាំហើយក៏ដោយ ក៏កិច្ចព្រមព្រៀងសន្តិភាពទីក្រុងប៉ារីស នៅតែមានតម្លៃ និងសារសំខាន់សម្រាប់កម្ពុជា ជាពិសេស ក្នុងដំណើរការកសាងសង្គមប្រជាធិបតេយ្យ ការការពារអធិបតេយ្យភាពជាតិ និងបូរណភាពដែនដី។ នេះគឺជាការលើកឡើងរបស់គណបក្សប្រជាធិបតេយ្យមូលដ្ឋាន។
គណបក្សនេះ អំពាវនាវដល់ភាគីនយោបាយខ្មែរទាំងអស់បញ្ឈប់នូវរបៀបធ្វើនយោបាយ ដោយបណ្តុះកំហឹងសងសឹក និងកម្ចាត់គ្នាទៅវិញទៅមក ដែលខុសផ្ទុយពីស្មារតីនៃកិច្ចព្រមព្រៀងសន្តិភាពទីក្រុងប៉ារីស ហើយចាប់យកមធ្យោបាយអហិង្សា ក្នុងការប្រកួតប្រជែងគ្នា តាមរយៈសន្លឹកឆ្នោតរបស់ប្រជាពលរដ្ឋ។
គណបក្សប្រជាធិបតេយ្យមូលដ្ឋាន ទាមទារឱ្យរាជរដ្ឋាភិបាលដោះលែង និងផ្តល់សិទ្ធិសេរីភាពដល់អ្នកទោសនយោបាយទាំងអស់ និងរៀបចំបរិយាកាសសម្រាប់ការប្រកួតប្រជែងការបោះឆ្នោតជ្រើសតាំងតំណាងរាស្រ្តអាណត្តិទី៧ ឱ្យបានស្មើភាព ប្រកបដោយសេរីនិងយុត្តិធម៌ត្រឹមត្រូវ ដើម្បីជាឧត្តមប្រយោជន៍ដល់សន្តិភាពយូរអង្វែង ប្រជាធិបតេយ្យសេរីពហុបក្ស ក៏ដូចជាការលើកស្ទួយកិត្យានុភាពជាតិខ្មែរលើឆាកអន្តរជាតិ។
ចំណែកគណបក្សភ្លើងទៀនវិញកត់សំគាល់ថា ក្នុងរយៈពេលកន្លងមកនេះ កិច្ចព្រមព្រៀងក្រុងប៉ារីស មិនត្រូវបានគោរព និងអនុវត្តឲ្យបានពេញលេញឡើយ ដូចជាអធិបតេយ្យកម្ពុជានៅរងការគំរាមកំហែង ប្រព័ន្ធតុលាការមិនទាន់ឯករាជ្យ ការគោរពសិទ្ធិមនុស្សធ្លាក់ចុះនៅប៉ុន្មានឆ្នាំចុងក្រោយនេះ។
បន្ថែមពីនេះ លោក គង់ គាំ ទីប្រឹក្សាគណបក្សភ្លើងទៀន បានចេញសេចក្តីថ្លែងការណ៍ដោយឡែកមួយ ដោយបានកត់សំគាល់ រយៈ៣១ឆ្នាំមកនេះ ទោះជាដំណើរការប្រជាធិបតេយ្យសេរីពហុបក្ស ការបោះឆ្នោតជាទៀងទាត់ មិនទាន់មានយុត្តិធម៌យ៉ាងណាក៏ដោយ តែក្រោយកិច្ចព្រមព្រៀងនេះ កម្ពុជាទទួលបានការអភិវឌ្ឍន៍មិនអាចបដិសេធបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ