មជ្ឈមណ្ឌលបុប្ផាណាសម្រេចបញ្ឈប់បុគ្គលិក២រូប ក្នុងករណីបៀតបៀនកេរ្តិ៍ខ្មាសលើសិក្ខាកាម
មជ្ឈមណ្ឌលបុប្ផាណាបានសម្រេចបញ្ឈប់បុគ្គលិក២រូបភ្លាម បន្ទាប់ពីរកឃើញថា បានបៀតបៀនកេរ្តិ៍ខ្មាសលើសិក្ខាកាមនារីចំនួន៣រូប។ ការបញ្ឈប់នេះ ធ្វើឡើងបន្ទាប់ពីមជ្ឈមណ្ឌលបុប្ផាណា បានបើកការស៊ើបអង្កេត ក្រោយទទួលបានការរាយការណ៍ថា សិក្ខាកាមនារី៣រូបរងការបៀតបៀនកេរ្តិ៍ខ្មាស នាអំឡុងពេលបំពេញការងារ។
ចុះផ្សាយនៅថ្ងៃ៖
ស្តាប់ - ០១:២៧
តាមរយៈសេចក្តីថ្លែងការណ៍នៅថ្ងៃទី៥វិច្ឆិកា គឺមជ្ឈមណ្ឌលបុប្ផាណា បានចាត់ទុកបញ្ហានេះ ថាជារឿងគួរឲ្យសោកស្តាយយ៉ាងខ្លាំងចំពោះការឈឺចាប់ដែលសិក្ខាកាមទាំងបីរូបទទួលរងគ្រោះ។ សម្រាប់មជ្ឈមណ្ឌលបុប្ផាណា នេះគឺជាបទពិសោធន៍ដ៍អាក្រក់ ខណៈដែលស្ថាប័នបង្ហាត់បង្រៀនផ្នែកភាពយន្តមួយនេះ តែងតែលើកកម្ពស់ចំពោះការចូលរួមរបស់ស្ត្រី។
ចំពោះមុខនៃទង្វើបៀតបៀនកេរ្ត៍ខ្មាស មជ្ឈមណ្ឌលបុប្ផាណាបានសម្រេចដកបុគ្គលិកចំនួន២រូបចេញពីការងារ កាលពីថ្ងៃទី០៤វិច្ឆិកា បន្ទាប់ពីរកឃើញថាបានប្រព្រឹត្តទង្វើមិនសមគួរលើសិក្ខាកាមជានារី។ លោក ជា សុភាព នាយកប្រតិបត្តិមជ្ឈមណ្ឌលបុប្ផាណា បានអះអាងនៅក្នុងសេចក្តីថ្លែងការណ៍ថា មជ្ឈមណ្ឌលបង្ហាត់បង្រៀនភាពយន្តមួយនេះ មិនអត់ឱនជាដាច់ខាតចំពោះសកម្មភាពបៀតបៀនកេរ្តិ៍ខ្មាស ឬសកម្មភាពរើសអើងណាមួយ។
បើតាមសេចក្តីថ្លែងការណ៍ គឺមជ្ឈមណ្ឌលបុប្ផាណានឹងចាត់វិធានការជាបន្តបន្ទាប់ ដើម្បីធានាសុវត្ថិភាពរបស់សិក្ខាកាម ដែលចូលរួមវគ្គបង្ហាត់បង្រៀន ដោយចាត់ឲ្យមានអ្នកវាយតម្លៃឯករាជ្យ ដើម្បីប្រឆាំងនឹងការបៀតបៀនកេរ្តិ៍ខ្មាស និងបណ្តុះបណ្តាលបុគ្គលិកខ្លួន ពីការទប់ស្កាត់ការកេងប្រវ័ញ្ចផ្លូវភេទ នៅកន្លែងការងារ។
គួរបញ្ជាក់ថា ករណីបៀតបៀនកេរ្តិ៍ខ្មាសលើសិក្ខាកាមនារី៣រូប ត្រូវបានរកឃើញ ក្រោយមជ្ឈមណ្ឌលបង្រៀនផ្នែកភាពយន្តមួយនេះ បើកការស៊ើបអង្កេតតាំងពីថ្ងៃទី២៦តុលាមក។ ហើយចំពោះមុខនៃទង្វើបែបនេះ លោក ជា សុភាព នាយកប្រតិបត្តិមជ្ឈមណ្ឌលបុប្ផាណា បានអះអាងពីទំនួលខុសត្រូវក្នុងការផ្តល់នូវបរិយាកាសសុវត្ថិភាព សម្រាប់សមិទ្ធិករភាពយន្តខ្មែរជំនាន់ក្រោយ ដែលទទួលការបង្ហាត់បង្រៀនពីមជ្ឈមណ្ឌល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ