ការស្ទង់មតិ៖ រដ្ឋាភិបាលគួរបង្កើនថវិកាបន្ថែមលើវិស័យអប់រំតែត្រូវធានាថាការចំណាយនេះមានប្រសិទ្ធភាព
អង្គការតម្លាភាពកម្ពុជា បានលើកឡើងថា រដ្ឋាភិបាលគួរតែបង្កើនកញ្ចប់ថវិកាទៅដល់វិស័យអប់រំបន្ថែមទៀត ខណៈការស្ទង់មតិបង្ហាញថា យុវជន៧៤%យល់ស្របទាំងស្រុងថា ការអប់រំដែលពួកគេចង់បានគឺលើសពីលទ្ធភាពថវិកាដែលពួកគេមាន។ ការស្ទង់មតិនេះត្រូវបានអង្គការតម្លាភាពកម្ពុជា ផ្សព្វផ្សាយនៅសប្តាហ៍នេះ ស្របពេលរដ្ឋាភិបាល គ្រោងបង្កើនកញ្ចប់ថវិកាជាតិឆ្នាំ២០២៣ កើនដល់ជិតមួយម៊ឺនលានដុល្លារ។
ចុះផ្សាយនៅថ្ងៃ៖
ស្តាប់ - ០១:៥៨
យុវជនកម្ពុជា ទទូលស្គាល់ពីសារសំខាន់នៃការសិក្សា នៅថ្នាក់ឧត្តម និងវគ្គបណ្តុះបណ្តាល នានា បន្ទាប់ពីថ្នាក់វិទ្យាល័យ បើទោះបីជាពួកគេ គិតថា ការសិក្សាទាំងនោះ ត្រូវការចំណាយថវិកាច្រើន។
ពាក់កណ្តាលនៃអ្នកឆ្លើយសំណួរបាននិយាយថា សញ្ញាបត្របណ្តុះបណ្តាលវិជ្ជាជីវៈ ឬសញ្ញាបត្រសាកលវិទ្យាល័យគឺចាំបាច់ ដើម្បីទទួលបានជោកជ័យនៅក្នុងសង្គម។ ប៉ុន្តែយុវជន៧៤%យល់ស្របទាំងស្រុងថា ការអប់រំដែលពួកគេចង់បានគឺលើសពីលទ្ធភាពថវិកាដែលពួកគេមាន។ នេះបើតាមការស្ទង់មតិរបស់អង្គការតម្លាភាពកម្ពុជា។
ការស្ទង់មតិនេះបង្ហាញទៀតថា យុវជន៤៤% គិតថាគោលដៅនៃការអប់រំប្រកបដោយគុណភាពដល់យុវជនដែលមានចែងក្នុងគោលនយោបាយថ្នាក់ជាតិស្តីពីការអប់រំឆ្នាំ២០១១ គឺអនុវត្តបានមួយភាគធំ ខណៈ៣៤% និយាយថាគោលដៅនោះសម្រេចបានតែមួយផ្នែកប៉ុណ្ណោះឬតិចតួចបំផុត។ នេះបង្ហាញថា រដ្ឋាភិបាលមិនទាន់អនុវត្តបានគ្រប់ជ្រុងជ្រោយនូវឡើយលើគោលនយោបាយអប់រំប្រកបដោយគុណភាពដល់យុវជន។
ឆ្លើយតបចំពោះបញ្ហានេះ អង្គការតម្លាភាពកម្ពុជា បានលើកឡើងថា រដ្ឋាភិបាលគួរតែបង្កើនកញ្ចប់ថវិកាទៅដល់វិស័យអប់រំបន្ថែមទៀត ខណៈដែលរដ្ឋាភិបាល បានគ្រោងបង្កើនកញ្ចប់ថវិកាជាតិឆ្នាំ២០២៣ កើនដល់ជិតមួយម៊ឺនលានដុល្លារ។
នៅឆ្នាំ២០២៣ រដ្ឋាភិបាលគម្រោងចំណាយថវិកាចំនួន ៣៩ ២០៦ ២០៥លានរៀល ស្មើប្រមាណ ៩.៦ពាន់លានដុល្លារ កើនឡើង ១៣% ធៀបនឹងច្បាប់ឆ្នាំ២០២២។ គម្រោងចំណាយថវិកាជាតិឆ្នាំ២០២៣ ផ្ដោតសំខាន់លើក្រសួងអប់រំ តាមពីក្រោយដោយក្រសួងសុខាភិបាល និងក្រសួងការពារជាតិ។ គម្រោងចំណាយថវិកាសម្រាប់ឆ្នាំ២០២៣របស់រដ្ឋាភិបាលនេះ ត្រូវបានអ្នកនយោបាយ សង្គមស៊ីវិល អ្នកសេដ្ឋកិច្ចគាំទ្រ តែជំរុញឲ្យមានការប្រើប្រាស់ថវិកាជាតិប្រកបដោយតម្លាភាព និងប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ