៣ថ្ងៃមុនការប្រឡងបាក់ឌុប ក្រសួងអប់រំបានត្រៀមស្ទើររួចរាល់ទាំងស្រុងហើយ
ក្រសួងអប់រំ យុវជន និងកីឡា នៅថ្ងៃទី២ ខែធ្នូ ឆ្នាំ២០២២នេះ បានចាប់ផ្ដើមដឹកជញ្ជូនហឹបវិញ្ញាសា ទៅកាន់បណ្ដារាជធានី-ខេត្ត ទាំង២៥ទូទាំងប្រទេស សម្រាប់ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ឬបាក់ឌុប ដែលប្រព្រឹត្តិទៅនៅថ្ងៃទី៥ ខែធ្នូ ឆ្នាំ២០២២ខាងមុខ។ មន្ត្រីជាន់ខ្ពស់ក្រសួងអប់រំ បញ្ជាក់ថា ការប្រឡងបាក់ឌុបនៅឆ្នាំនេះ នឹងប្រព្រឹត្តទៅតាមគោលការណ៍ច្បាប់យ៉ាងម៉ឺងម៉ាត់។
ចុះផ្សាយនៅថ្ងៃ៖
ស្តាប់ - ០២:២៨
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់វិទ្យុបារាំងអន្តរជាតិ RFI នៅថ្ងៃទី ២ ខែធ្នូនេះថា ក្រសួងអប់រំបានចាប់ផ្ដើមដឹកហឹបវិញ្ញាសារពីទីតាំងមានសុវត្ថិភាពនៅភ្នំពេញ ទៅកាន់គោលដៅដែលមានសុវត្ថិភាពដូចជាសាលាខេត្តទាំង២៥រាជធានី-ខេត្ត ហើយអាជ្ញាធរខេត្តជាអ្នកទទួលបន្ទុកក្នុងការរក្សាសុវត្ថិភាពវិញ្ញាសារទាំងនេះ។
ក្រសួងអប់រំនៅតែបន្តអនុវត្តគោលការណ៍ទាំង៤ យ៉ាងម៉ឺងម៉ាត់ក្នុងការប្រឡងសញ្ញាបត្រមធ្យមសិក្សាទុតិយភូមិ ដែលរួមមានគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ដើម្បីឆ្លុះបញ្ចាំងពីលទ្ធផលដែលសមស្របតាមការប្រឹងប្រែងរបស់បេក្ខជនប្រឡង។ នេះបើតាមលោក រស់ សុវាចា។
អ្នកនាំពាក្យក្រសួងអប់រំរូបនេះឱ្យដឹងថា ក្រសួងនៅតែបន្តអនុវត្តវិធានការសុខាភិបាលក្នុងការទប់ស្កាត់កូវីដ-១៩ ដែលជាអាទិភាពក្នុងការធានាសុវត្ថិភាពដល់បេក្ខជនប្រឡង បុគ្គលិកអប់រំ និងភាគីពាក់ព័ន្ធទាំងអស់។ ចំពោះបេក្ខជនដែលវិជ្ជមានកូវីដ-១៩ នឹងត្រូវបានអនុញ្ញាតឱ្យប្រឡងនៅបន្ទប់ដាច់ដោយឡែក។
សូមរំលឹក ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ ដែលជាការប្រឡងសំណេរ នឹងប្រព្រឹត្តទៅចំនួន ២ថ្ងៃ គឺពីថ្ងៃទី៥ ដល់ទី៦ ខែធ្នូខាងមុខ។ ចំណែកដំណើរការកំណែនឹងចាប់ផ្ដើមពីថ្ងៃទី៨ ដល់ថ្ងៃទី១៤។ រីឯការស្រង់ បូក និងផ្ទៀងផ្ទាត់ពិន្ទុ នឹងប្រព្រឹត្តទៅចាប់ពីថ្ងៃទី១៥ ដល់ថ្ងៃទី២៦ធ្នូ។ ចំពោះការប្រកាសលទ្ធផល ក្រសួងអប់រំ បានកំណត់យកថ្ងៃទី២៧ ខែធ្នូ ឆ្នាំ២០២២ សម្រាប់បណ្ឌលប្រឡងនៅភ្នំពេញ និងខេត្តកណ្ដាល និងថ្ងៃទី២៨ ខែធ្នូ ប្រកាសលទ្ធផលបាក់ឌុបសម្រាប់ខេត្តផ្សេងៗនៅទូទាំងប្រទេស។ នេះបើតាមក្រសួងអប់រំ។
តាមរយៈសេចក្ដីប្រកាសព័ត៌មានរបស់ក្រសួងអប់រំ ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា នៅថ្ងៃទី៥ ខែធ្នូ ឆ្នាំ២០២២នេះ មានបេក្ខជនចុះឈ្មោះប្រឡងសរុបចំនួន ១២៨ ១៣៤នាក់។ បណ្ឌលប្រឡងសរុបមានចំនួន ២២១មណ្ឌល ដែលមាន ៥១៧៤បន្ទប់ ហើយក្នុងបន្ទប់នីមួយៗនឹងមានបេក្ខជនប្រឡង ២៥នាក់។
គួរជម្រាបជូនថា នេះគឺជាលើកទី២ ដែលក្រសួងអប់រំរៀបចំការប្រឡងបាក់ឌុបក្នុងបរិបទកូវីដ-១៩។ ដោយឡែកការប្រឡងសញ្ញាប័ត្រមធ្យមសិក្សាទុតិយភូមិ កាលពី ២៧ ធ្នូ ២០២១ កន្លងទៅ មានបេក្ខជនប្រឡងសរុបចំនួន ១១៤ ១៨៧នាក់ ក្នុងនោះមានបេក្ខជនចំនួន ៧២ ០១៦នាក់ បានប្រឡងជាប់។ ក្នុងចំណោមបេក្ខជនប្រឡងជាប់ មានសិស្សទទួលបាននិទ្ទេស A សរុបចំនួន ១៧៥៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ