រដ្ឋត្រៀមចាយលុយ៣១លានដុល្លារដើម្បីអន្តរាគមន៍ដល់ប្រជាពលរដ្ឋដែលរងវិបត្តិទំនិញឡើងថ្លៃ
ដ្ឋាភិបាលត្រៀមចាយលុយជាង៣០លានដុល្លារអាមេរិក ដើម្បីជួយដល់ប្រជាពលរដ្ឋដែលរងផលប៉ះពាល់ពីវិបត្តិទំនិញឡើងថ្លៃ ឬអតិផរណា។ នេះបើតាមលោក សំហេង បុរស រដ្ឋលេខាធិការក្រសួងសង្គមកិច្ច ដែលបានអះអាងនៅក្នុងសន្និសីទសារព័ត៌មានស្តីពី «យន្តការ និងនីតិវិធីនៃការអនុវត្តកម្មវិធីឧបត្ថម្ភសាច់ប្រាក់ ជូនគ្រួសារងាយរងហានិភ័យ» នៅថ្ងៃសៅរ៍ទី១០ធ្នូនេះ។
ចុះផ្សាយនៅថ្ងៃ៖
ស្តាប់ - ០២:១០
ដោយសារសេដ្ឋកិច្ចពិភពលោកកំពុងជួបវិបត្តិ និងរងផលជះពីសង្រ្គាមរុស្ស៊ី-អ៊ុយក្រែន ទើបរដ្ឋាភិបាលសម្រេចអន្តរាគមន៍គាំពារសង្គមដើម្បីឆ្លើយតបនឹងសម្ពាធអតិផរណាពេលនេះ។ នៅក្នុងសន្និសីទសារព័តមាននៅថ្ងៃសៅរ៍នេះ លោក សំហេង បុរស រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសង្គមកិច្ច អតីតយុវជន និងយុវនិតីសម្បទា បញ្ជាក់ថា ទឹកប្រាក់ដែលរដ្ឋនឹងចាយចំនួន៣១លានដុល្លារអាមេរិក គឺសម្រាប់ជួយដល់ប្រជាពលរដ្ឋប្រមាណជាង៣៥ម៉ឺនគ្រួសារ ឬជាង១លាននាក់ ដែលរងផលប៉ះពាល់ផ្នែកជីវភាព ដោយសារតែទំនិញលើទីផ្សារឡើងថ្លៃ។
បើតាមសេចក្តីប្រកាស គឺក្នុងមួយគ្រួសារនឹងទទួលបានទឹកប្រាក់ចំនួន ៩៩ ៩០០រៀលសម្រាប់ប្រជាពលរដ្ឋនៅទីក្រុងភ្នំពេញ។ ដោយឡែកនៅទីប្រជុំជន គឺចំនួន ៨៧ ៣០០រៀល ខណៈដែលតាមទីជនបទ គឺប្រជាពលរដ្ឋអាចទទួលបានសាច់ប្រាក់ចំនួន ៨១៣០០រៀល។
ការអន្តរាគមន៍របស់រដ្ឋាភិបាលពេលនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានថ្លែងនៅក្នុងសន្និសីទស្តីពី ចក្ខុវិស័យកម្ពុជាឆ្នាំ២០២២ ថាដ្ឋនឹងផ្តល់ប្រាក់ឧបត្ថម្ភដល់ប្រជាពលរដ្ឋក្រីក្រដែលរងគ្រោះដោយសារវិបត្តិកូវីដ១៩ និងដាក់ចេញនូវយន្តការថ្មីក្នុងការសម្រួលសម្ពាធអតិផរណា ដែលប៉ះពាល់សេដ្ឋកិច្ចរបស់ប្រជាពលរដ្ឋ និងបញ្ហាសង្គ្រាមរុស្សី និងអ៊ុយក្រែន ដែលបណ្តាលឱ្យតម្លៃទំនិញលើទីផ្សារកើនឡើង។
បើតាមលោក ហ៊ុន សែន ការអន្តរាគមន៍នេះមិនមែនជាការប៉ាវចិញ្ចឹមប្រជាពលរដ្ឋឡើយ ប៉ុន្តែធ្វើដើម្បីកុំប្រជាពលរដ្ឋធ្លាក់ទៅក្រោមបន្ទាត់ភាពក្រីក្រ។
នៅចំពោះមុខនៃការដាក់ឲ្យប្រជាពលរដ្ឋអាចទទួលបានសាច់ប្រាក់ពេលនេះ លោក សំហេង បុរស បានអះអាងថា យន្តការរបស់រដ្ឋាភិបាលបានធ្វើឡើងដោយតម្លាភាព មានភាពម៉ត់ចត់ និងមិនមានបក្សពួកណាមួយឡើយ។ ការអះអាងនេះ ក៏ជាការឆ្លើយតបទៅនឹងបញ្ហាមិនប្រក្រតីមួយចំនួន ដែលធ្លាប់កើតមានកន្លងមកទៅ ថាសកម្មភាពផ្តល់សាច់ប្រាក់ជូនពលរដ្ឋនៅតាមបណ្តារាជធានី-ខេត្ត ធ្វើឡើងតាមរយៈការគុបគិតរបស់មេឃុំ-ចៅសង្កាត់ និងការកិបកេងសាច់ប្រាក់មិនផ្តល់ឲ្យប្រជាពលរដ្ឋ។
សូមបញ្ជាក់ថា ក្រៅពីការផ្តល់សាច់ប្រាក់ជូនប្រជាពលរដ្ឋដែលរងវិបត្តិអតិផរណា រដ្ឋាភិបាលក៏បានអន្តរាគមន៍ផ្តល់ជាជំនួយសាច់ប្រាក់ដល់ប្រជាពលរដ្ឋ ដែលរងផលប៉ះពាល់ដោយសារតែវិបត្តិកូវីដ១៩ និងគ្រោះទឹកជំនន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ