របាយការណ៍៖ អតិផរណាកម្ពុជានឹងថយចុះមកត្រឹម ៣ភាគរយក្នុងឆ្នាំ២០២៣
ដោយសារតែការថមថយចុះនៃតម្លៃប្រេងឥន្ធនៈសកល អតិផរណានៅកម្ពុជានឹងធ្លាក់ចុះពី ៥.៣ភាគរយក្នុងឆ្នាំ២០២២ មក៣ភាគរយនាឆ្នាំ២០២៣ខាងមុខនេះ។ នេះបើតាមរបាយការណ៍ប្រចាំឆ្នាំមួយរបស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ចេញផ្សាយ កាលពីថ្ងៃទី២១ ខែធ្នូ។ ស្ថាប័នមួយនេះក៏បានព្យាករថាកម្ពុជានឹងមានកំណើន ៥.៤ភាគរយនៅក្នុងឆ្នាំ២០២៣។
ចុះផ្សាយនៅថ្ងៃ៖
ស្តាប់ - ០៣:២០
ការកើនឡើងនៃតម្លៃថាមពលពិភពលោកនៅក្នុងឆមាសទីមួយនៃឆ្នាំ២០២២ ដោយឥទ្ធិពលនៃសង្គ្រាមរុស្ស៊ីនៅអ៊ុយក្រែន បានបណ្តាលឱ្យអតិផរណានៅកម្ពុជាកើនឡើងដល់កម្រិត ៧.៨ភាគរយនៅក្នុងខែមិថុនា។ អតិផរណាក៏បានធ្លាក់ចុះមកនៅត្រឹម ៤.៩ភាគរយនៅក្នុងខែសីហា ដោយសារការធ្លាក់ចុះនៃតម្លៃប្រេងព្រោះតែភាពអាប់អួរនៃសេដ្ឋកិច្ចសាកល។ នេះបើតាមរបាយការណ៍ពិគ្រោះប្រចាំឆ្នាំស្តីពីកម្ពុជានៃការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) កាលពីថ្ងៃទី២១ ខែធ្នូ ឆ្នាំ២០២២។ របាយការណ៍នេះព្យាករថាជាមួយតម្លៃប្រេងពិភពលោក ដែលរំពឹងថានឹងបន្តធ្លាក់ចុះ អតិផរណាកម្ពុជានឹងធ្លាក់ចុះពី ៥.៣ភាគរយនៅឆ្នាំ ២០២២ មក ៣ភាគរយនៅឆ្នាំ២០២៣។
សេដ្ឋកិច្ចកម្ពុជានឹងបន្តងើបឡើងវិញបន្តិចម្តងៗដោយកំណើន ៥ភាគរយនៅឆ្នាំ២០២២ និង ៥.៤ភាគរយនៅឆ្នាំ២០២៣។ នេះបើតាមAMRO ដោយបញ្ជាក់ទៀតថាសេដ្ឋកិច្ចកម្ពុជានៅតែមានភាពធន់ គាំទ្រដោយវិស័យទេសចរណ៍ដែលទើបងើបឡើងវិញ និងប្រក្រតីភាពនៃសកម្មភាពក្នុងប្រទេសក្រោយកូវីដ១៩។ ខណៈដែលកម្ពុជាប្រឈមនឹងក្នុងវិស័យផលិតកម្ម ដោយការធ្លាក់ចុះសេដ្ឋកិច្ចរបស់អាមេរិក និងអឺរ៉ុប នៅឆមាសទីពីរនៃឆ្នាំ២០២២។
លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានថ្លែងប្រាប់វិទ្យុបារាំងអន្តរជាតិនៅថ្ងៃទី២៣ ខែធ្នូថា ចំពោះអត្រាអតិផរណា និងកំណើនសេដ្ឋកិច្ចកម្ពុជា គឺរដ្ឋាភិបាលបានព្យាយាមកាត់បន្ថយតម្លៃប្រេងឥន្ធនៈ បន្ថយតម្លៃអគ្គិសនី និងជួយដល់ជនក្រីក្រ តាមរយៈការឧបត្ថមជាសាច់ប្រាក់ជាដើម។
សម្រាប់ឆ្នាំ២០២៣ខាងមុខនេះ លោក គី សេរីវឌ្ឍន៍ បានស្នើឲ្យរដ្ឋាភិបាលយកចិត្តទុកដាក់ខ្លាំងបំផុតលើវិស័យកសិកម្ម និងវិស័យសហគ្រាសធុនតូច និងមធ្យម ដែលជាវិស័យយុទ្ធសាស្ត្ររបស់ប្រទេស ឲ្យមានភាពរឹងមាំធន់នឹងវិបត្តិ។ បើតាមលោក គី សេរីវឌ្ឍន៍ កាលពីឆ្នាំ២០១៩កន្លងទៅ សេដ្ឋកិច្ចរបស់កម្ពុជាកើនឡើងខ្លាំងដោយសារតែវិស័យទេសចរណ៍ សំណង់ និងអចលនទ្រព្យ ប៉ុន្តែវិស័យទាំងបីនេះ ក៏បានធ្វើឲ្យកម្ពុជារងគ្រោះវិញ នៅពេលមានកូវីដ១៩។ ដូច្នេះនៅពេលមានវិបត្តិ វិស័យដែលធ្វើឲ្យកម្ពុជារឹងមាំ គឺវិស័យកសិកម្ម និងវិស័យសហគ្រាសធុនតូច និងមធ្យម ហើយវិស័យកាត់ដេរក៏រឹងមាំក្នុងរយៈពេលនេះដែរ ប៉ុន្តែអាចប្រឈមនឹងហានិភ័យនៅពេលប្រទេសផ្សេងទៀត បើកដំណើរការឡើងវិញ។
ក្នុងរបាយការណ៍នោះ AMROបញ្ជាក់ថា កម្ពុជាបានគ្រប់គ្រងការរាតត្បាតនៃជំងឺកូវីដ១៩បានយ៉ាងល្អ។ ក្រៅពីការចាក់វ៉ាក់សាំងបានរហ័ស វិធានការរបស់រដ្ឋាភិបាលបានកាត់បន្ថយផលប៉ះពាល់មកលើសេដ្ឋកិច្ច និងការពារគ្រួសារកម្ពុជាមិនឱ្យធ្លាក់ចូលទៅក្នុងភាពក្រីក្រ។ ទោះជាយ៉ាងណាក៏ដោយ បញ្ហាប្រឈមថ្មីៗកំពុងសាកល្បងភាពធន់នៃសេដ្ឋកិច្ចកម្ពុជា ជាពិសេសលក្ខខណ្ឌហិរញ្ញវត្ថុសកលកាន់តែតឹងតែង សម្ពាធអតិផរណាខ្ពស់ និងកំណើនសេដ្ឋកិច្ចពិភពលោកយឺតជាដើម។
គួរជម្រាបថាការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) គឺជាស្ថាប័នអន្តរជាតិមួយ ដែលត្រូវបានបង្កើតឡើង ដើម្បីរួមចំណែកក្នុងការធានាស្ថិរភាពម៉ាក្រូសេដ្ឋកិច្ច និងហិរញ្ញវត្ថុនៃតំបន់អាស៊ាន+៣ ដែលមានសមាជិកចំនួន១០នៃសមាគមប្រជាជាតិអាស៊ីអាគ្នេយ៍(អាស៊ាន) និងប្រទេសចិន ជប៉ុន និងកូរ៉េ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ