វិបត្តិកូវីដ១៩៖ រដ្ឋផ្ដល់ជំនួយជាសាច់ប្រាក់ជិត ៩០០លានដុល្លារជូនដល់ពលរដ្ឋដែលរងផលប៉ះពាល់
គិតមកទល់ពេលនេះ រដ្ឋាភិបាលតាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា បានផ្ដល់ជំនួយជាសាច់ប្រាក់ប្រមាណជិត ៩០០លានដុល្លារទៅដល់ប្រជាពលរដ្ឋដែលរងផលប៉ះពាល់ដោយសារវិបត្តិជំងឺកូវីដ១៩។ សាច់ប្រាក់ខាងលើនេះ មិនទាន់រាប់បញ្ចូលទាំងការជួយពលរដ្ឋដែលរងគ្រោះដោយសារទឹកជំនន់ និងរងផលប៉ះពាល់ដោយសារអតិផរណាឡើយ។
ចុះផ្សាយនៅថ្ងៃ៖
ស្តាប់ - ០២:៣៧
លោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានបញ្ជាក់ថា សាច់ប្រាក់ជិត ៩០០លានដុល្លារនេះ រដ្ឋាភិបាលបានជួយទៅពលរដ្ឋដែលរងផលប៉ះពាល់ដោយសារវិបត្តិជំងឺកូវីដ១៩ ប្រមាណជា ៧០ម៉ឺននាក់។ ក្រៅពីជួយពលរដ្ឋដែលរងផលប៉ះពាល់ដោយសារវិបត្តិកូវីដ១៩ រដ្ឋាភិបាល ក៏បន្តជួយទៅលើប្រជាពលរដ្ឋដែលរងផលប៉ះពាល់ដោយសារទឹកជំនន់ និងផលប៉ះពាល់ដោយសារបញ្ហាអតិផរណាឡើងថ្លៃផងដែរ ខណៈជំនួយទាំងនេះនៅតែបន្តធ្វើ មិនទាន់ចប់នៅឡើយទេ។ នេះបើតាមលោក វង សូត។
សម្រាប់ជំនួយឧបត្ថម្ភទៅលើគ្រួសារដែលរងគ្រោះដោយសារទឹកជំនន់ ក្នុងមួយគ្រួសារទទួលបាន ៨ម៉ឺនរៀល សមាជិកគ្រួសារក្នុងម្នាក់ទទួលបាន ១៦ ០០០រៀល កុមារអាយុ ០-៥ឆ្នាំក្នុងម្នាក់ទទួលបាន ១៦ ០០០រៀល ជនមានពិការភាពក្នុងម្នាក់ទទួលបាន ១៦ ០០០រៀល និងមនុស្សចាស់អាយុចាប់ពី ៦០ឆ្នាំឡើងទៅក្នុងម្នាក់ទទួលបាន ១៦ ០០០រៀល។ ជំនួយឧបត្ថម្ភនេះបើកផ្ដល់ជូនចំនួន ៣ដង ដោយលើកទី១ នៅខែធ្នូកន្លងទៅនេះ លើកទី២ នៅខែមករានេះ និងលើកទី៣ នៅខែកុម្ភៈ។ គ្រួសារដែលទទួលជំនួយនេះមានជិត ១០ម៉ឺនគ្រួសារ អស់ទឹកប្រាក់ជិត ៤លានដុល្លារ។
ចំណែកគ្រួសារដែលរងផលប៉ះពាល់ដោយសារអតិផរណាឡើងថ្លៃវិញ ក៏ទទួលបានជំនួយឧបត្ថម្ភពីរដ្ឋចំនួន៣លើកដូចគ្នា ដោយនៅរាជធានីភ្នំពេញក្នុងមួយគ្រួសារសមាជិកទី១ ទទួលបានជិត ១០ម៉ឺនរៀល សមាជិកបន្ទាប់ម្នាក់ទទួលបានជិត ៣ម៉ឺនរៀល។ សម្រាប់គ្រួសារនៅតាមទីប្រជុំជនវិញ សមាជិកទី១ទទួលបាន ៨៧ ៣០០រៀល សមាជិកបន្ទាប់ម្នាក់ទទួលបាន ២៤ ០០០រៀល និងសម្រាប់គ្រួសារនៅជនបទសមាជិកទី១ ទទួលបានជាង ៨ម៉ឺនរៀល និងសមាជិកបន្ទាប់ម្នាក់ទទួលបាន ២ម៉ឺនរៀល ដោយការបើកប្រាក់លើកទី១ នៅថ្ងៃទី១០ខែធ្នូកន្លងទៅនេះ លើកទី២ នៅថ្ងៃ១០ខែមេសា និងលើកទី៣ នៅថ្ងៃទី១០ខែកក្កដា។
គ្រួសារដែលរងផលប៉ះពាល់ដោយសារអតិផរណានេះ មានប្រមាណជាង ២៦ម៉ឺនគ្រួសារ ដែលជំនួយទឹកប្រាក់សរុបប្រហែលជាង ៩លានដុល្លារ។ ជំនួយទាំងនេះសាច់ប្រាក់ គឺទម្លាក់តាមធនាគារវីង ដើម្បីឲ្យពលរដ្ឋដែលទទួលបានជំនួយនេះ ទៅបើកប្រាក់ដោយខ្លួនឯង។
បើតាមលោក វង សូត នេះជាជោគជ័យមួយសម្រាប់រាជរដ្ឋាភិបាលក្នុងការផ្ដល់សាច់ប្រាក់ឧបត្ថម្ភទៅដល់គ្រួសាររងគ្រោះដោយសារវិបត្តិជំងឺកូវីដ១៩ គ្រោះទឹកជំនន់ និងអតិផរណា។ លោក វង សូត បានបញ្ជាក់ថា នៅមាន១០ម៉ឺនគ្រួសារទៀត បាននិងកំពុងសម្ភាសដើម្បីទទួលបានជំនួយពីផលប៉ះពាល់ដោយសារតែអតិផរណាឡើងថ្លៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ