អ្នកឃ្លាំមើលចង់ឃើញនីតិវិធីនៃការធ្វើលទ្ធកម្មសាធារណៈត្រូវបានអនុវត្តបានពេញលេញ
អ្នកឃ្លាំមើលបញ្ហាតម្លាភាពចង់ឃើញ មានការអនុវត្តន៍ពេញលេញនូវនីតិវិធីនៃការធ្វើលទ្ធកម្មសាធារណៈលើគម្រោងរបស់ជាតិសំខាន់ៗដែលផ្តល់សិទ្ធិទៅឲ្យក្រុមហ៊ុនឯកជនម៉ៅការជួស ជុល ឬ សាងសង់។ ការលើកឡើងនេះធ្វើឡើងស្របពេលដែលរដ្ឋសភាគ្រោងអនុម័ត«សេចក្តីព្រាងច្បាប់ស្តីពីលទ្ធកម្មសាធារណៈ»នៅថ្ងៃស្អែកនេះ។
ចុះផ្សាយនៅថ្ងៃ៖
ស្តាប់ - ០១:៣៧
សេចក្តីព្រាងច្បាប់ស្តីពីលទ្ធកម្មសាធារណៈមានគោលបំណងធានាបាននូវភាពជឿទុកចិត្ត តម្លាភាព ប្រសិទ្ធភាព ការប្រកួតប្រជែង និងការសន្សំសំចៃ ព្រមទាំងស្របតាមឧត្តមានុវត្តន៍អន្តរជាតិ ដោយប្រែក្លាយតួនាទីរបស់ក្រសួងសេដ្ឋកិច្ច និងហិរញ្ញវត្ថុទៅជានិយ័តករ និងជាអ្នកធ្វើសវនកម្មលើកិច្ចលទ្ធកម្ម។
សេចក្តីព្រាងច្បាប់នេះ បានកំណត់គោលការណ៍អំពីមុខងារនិងការទទួលខុសត្រូវឱ្យដាច់ពីគ្នារវាងស្ថាប័នគ្រប់គ្រងលទ្ធកម្ម និងស្ថាប័នអនុវត្តលទ្ធកម្ម ការផ្ទេរសិទ្ធិអំណាចនិងការទទួលខុសត្រូវលើកិច្ចលទ្ធកម្មជូនស្ថាប័នអនុវត្ត ការពង្រឹង និងកែលម្អយន្តការនៃការទទួលនិងដោះស្រាយពាក្យបណ្ដឹងតវ៉ាលទ្ធកម្មឱ្យមានឯករាជ្យ និងការបង្កើតឱ្យមានរបបដាក់ទោសទណ្ឌ។
លោក សន ជ័យ នាយកអង្គការសម្ព័ន្ធគណនេយ្យភាពសង្គមកម្ពុជា ចង់ឃើញ មានការអនុវត្តន៍ពេញលេញនូវនីតិវិធីនៃការធ្វើលទ្ធកម្មសាធារណៈលើគម្រោងរបស់ជាតិសំខាន់ៗ ដូចជា ការស្ថានាផ្លូវថ្នល់ ដែលផ្តល់សិទ្ធិទៅឲ្យក្រុមហ៊ុនឯកជនម៉ៅការជួសជុល ឬសាងសង់។
បើតាមអ្នកឃ្លាំមើលសង្គមរូបនេះ ការបើកចំហព័ត៌មានទាក់ទងនឹងការធ្វើលទ្ធកម្មសាធារណៈគួរតែត្រូវបានបើកទូលាយដោយគ្មានការលាក់លៀម ពិសេស ការចំណាយថវិកា និងការធានាគុណភាព។
សូមបញ្ជាក់ថា ច្បាប់ស្តីពីលទ្ធកម្មសាធារណៈនេះមានតាំងពីឆ្នាំ២០១២រួចហើយ តែលោក មាស សុខសេនសាន្ត អ្នកនាំពាក្យក្រសួងសេដ្ឋកិច្ច ពន្យល់ថា សេចក្តីព្រាងច្បាប់ថ្មីគឺបំពេញបន្ថែមលើច្បាប់ចាស់ឲ្យស្របតាមស្តង់ដាអន្តរជាតិ និងបានផ្តល់សិទ្ធិអំណាចច្រើនជាងមុនដល់ក្រសួងសេដ្ឋកិច្ចក្នុងការត្រួតពិនិត្យការងារលទ្ធកម្មនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ