លោក ហ៊ុន សែន អរគុណបក្សកុម្មុយនីស្តវៀតណាម ដែលគាំទ្រលោក ហ៊ុន ម៉ាណែត ដឹកនាំរដ្ឋាភិបាលថ្មី
លោកនាយករដ្ឋមន្ត្រី ហ៊ុន សែន បានពោលពាក្យអរគុណចំពោះអគ្គលេខាធិការបក្សកុម្មុយនីស្តវៀតណាម ដែលបានជឿជាក់ និងគាំទ្រ គណបក្សប្រជាជនកម្ពុជា និងលោក ហ៊ុន ម៉ាណែត ជានាយករដ្ឋមន្ត្រីដឹកនាំរដ្ឋាភិបាលអាណត្តិទី៧។ ការគូសបញ្ជាក់នេះ ធ្វើឡើងតាមរយៈជំនួបតាមប្រព័ន្ធអនឡាញ រវាង លោក ហ៊ុន សែន ប្រធានគណបក្សប្រជាជនកម្ពុជា និងលោក ង្វៀន ហ្វ៊ូចុង អគ្គលេខាធិការបក្សកុម្មុយនីស្តវៀតណាម នៅថ្ងៃសៅរ៍។
ចុះផ្សាយនៅថ្ងៃ៖
ស្តាប់ - ០២:១៨
គឺបន្ទាប់ពីគណៈកម្មាធិការជាតិរៀបចំការបោះឆ្នោត បានប្រកាសលទ្ធផលបោះឆ្នោតជ្រើសតាំងតំណាងរាស្ត្រ ជាផ្លូវការ ដែលគណបក្សប្រជាជនកម្ពុជា ទទួលបាន១២០អាសនៈ គណបក្សប្រជាជនកម្ពុជា ដែលមានលោក ហ៊ុន សែន ជាប្រធាន បានជួបប្រជុំតាមប្រព័ន្ធអនឡាញភ្លាមៗ ជាមួយអគ្គលេខាធិការបក្សកុម្មុយនីស្តវៀតណាម ដោយជជែកជ័យជំនះដែលគណបក្សកាន់អំណាចទទួលបាន។
តាមសេចក្តីប្រកាសព័ត៌មាន របស់គណបក្សប្រជាជនកម្ពុជា គឺ លោក ង្វៀន ហ្វ៊ូចុង បានសាទរចំពោះគណបក្សប្រជាជនកម្ពុជា ដែលឈ្នះឆ្នោតជាបន្ត ខណៈដែលលោក ហ៊ុន សែន ក៏បានអរគុណលោក ង្វៀន ហ្វ៊ូចុង ដោយចាត់ទុកថា វាជាសក្ខីភាពនៃសាមគ្គីភាពក្នុងកិច្ចសហប្រតិបត្តិការគ្រប់ជ្រុងជ្រោយនៃប្រទេសទាំងពីរ។
បើតាមសេចក្តីប្រកាស គឺ លោក ហ៊ុន សែន បានអរគុណចំពោះអគ្គលេខាធិការបក្សកុម្មុយនីស្តវៀតណាម ដែលជឿជាក់ និងគាំទ្រចំពោះគណបក្សប្រជាជកម្ពុជា និងជាពិសេសគឺលោក ហ៊ុន ម៉ាណែត ដែលត្រៀមចូលដឹកនាំរដ្ឋាភិបាលថ្មីក្នុងពេលខាងមុខ។
ផ្អែកតាមការចុះផ្សាយរបស់សារព័ត៌មាន Vietnam វិញ គឺលោក ហ៊ុន សែន បានបញ្ជាក់ជាថ្មីប្រាប់ដល់អគ្គលេខាធិការបសក្សកុម្មុយនីស្តវៀតណាម ថា ជួរបក្សប្រជាជនកម្ពុជា ទាំងក្នុងរដ្ឋាភិបាល និងរដ្ឋសភា ព្រមទាំងលោក ហ៊ុន ម៉ាណែត នឹងបន្តពង្រឹងទំនាក់ទំនងជាប្រពៃណី រវាងគណបក្សប្រជាជនកម្ពុជា និងគណបក្សកុម្មុយនីស្តវៀតណាម និងប្រជាពលរដ្ឋនៃប្រទេសទាំងពីរ ខណៈដែលលោក ង្វៀន ហ្វ៊ូចុង ក៏បានអះអាងថា វៀតណាមបន្តគាំទ្រការអភិវឌ្ឍទាំងអស់ក្រោមការដឹកនាំរបស់គណបក្សប្រជាជនកម្ពុជា និងរដ្ឋាភិបាលថ្មី។
គួរជម្រាបថា លោក ង្វៀន ហ្វ៊ូចុង កាលពីថ្ងៃទី២៥កក្កដា បានផ្ញើលិខិតអបអរសាទររួចជាស្រេច ជូនលោក ហ៊ុន សែន ប្រធានគណបក្សប្រជាជនកម្ពុជា ចំពោះការបោះឆ្នោតជ្រើសតាំងតំណាងរាស្រ្តនីតិកាលទី ៧ ដែលប្រព្រឹត្តទៅ ប្រកបដោយជោគជ័យ។ ភាគីវៀតណាម បានវាយតម្លៃថា ការបោះឆ្នោតកាលពីថ្ងៃទី២៣កក្កដា ជាការបោះឆ្នោតដែលសុវត្ថិភាព សេរី និងយុត្តិធម៌ ចំពោះពលរដ្ឋខ្មែរក្នុងការជ្រើសរើសការអភិវឌ្ឍន៍ប្រទេសក្នុងពេលអនាគត។
ក៏ប៉ុន្តែ បណ្តាប្រទេសលោកខាងវិញ បានរិះគន់ចំពោះការបោះឆ្នោតកន្លងទៅនេះ ថាមិនបានប្រព្រឹត្តទៅដោយយុត្តិធម៌ ខណៈដែលអាមេរិកដែលនាំមុខគេចេញសេចក្តីថ្លែងការណ៍ រិះគន់ការបោះឆ្នោត បានបញ្ជាក់ពីការដកជំនួយប្រមាណ១៨លានដុល្លារចេញពីកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ