អាជ្ញាធរថៃ សម្រេចដោះលែងពលរដ្ឋខ្មែរដែលធ្វើការខុសច្បាប់៥នាក់ ត្រឡប់មកកម្ពុជាវិញ
ពលរដ្ឋខ្មែរ ដែលអះអាងថាបានធ្វើការងារខុសច្បាប់ក្នុងប្រទេសថៃចំនួន៥នាក់ នឹងត្រូវបានអាជ្ញាធរថៃដោះលែងវិញ និងបញ្ជូនមកកម្ពុជានៅថ្ងៃអង្គារសប្ដាហ៍ក្រោយ។ ការសម្របសម្រួលពីអាជ្ញាធរថៃដូច្នេះ ធ្វើឡើងក្រោយមានការអន្តរាគមន៍ពីអនុព័ន្ធស្ថានទូតកម្ពុជានិងស្ថានទូតកម្ពុជា ដែលអះអាងថា មិនដែលព្រងើយចំពោះពលរដ្ឋដែលកំពុងជួបបញ្ហាឡើយ។
ចុះផ្សាយនៅថ្ងៃ៖
ស្តាប់ - ០១:១៩
ក្រសួងការងារនៅថ្ងៃសុក្រនេះ បានបញ្ជាក់ថាអាជ្ញាធរថៃ នឹងដោះលែងពលរដ្ឋខ្មែរចំនួន៥នាក់វិញ នៅថ្ងៃអង្គារទី២៩សីហាខាងមុខនេះ ក្រោយមានការសម្របសម្រួលពីអនុព័ន្ធការងារកម្ពុជា និងស្ថានទូតកម្ពុជា។ ពលរដ្ឋខ្មែរទាំង៥នាក់នេះ ត្រូវបានអាជ្ញាធរថៃ ចាប់ខ្លួនកាលពីថ្ងៃទី១៩សីហា ក្រោយបានរកឃើញថាបានប្រកបរបររកស៊ីខុសច្បាប់។
ទន្ទឹមនឹងការសម្របសម្រួលនេះ ក្រសួងការងារ បានអំពាវនាវឲ្យពលរដ្ឋខ្មែ រជ្រើសរើសការធ្វើការដោយស្របច្បាប់ ពោលតាមរយៈទីភ្នាក់ងារក្រុមហ៊ុនឯកជនដែលត្រូវបានក្រសួងទទួលស្គាល់ជាផ្លូវការ ជាជាងការធ្វើការមិនស្របច្បាប់ ដែលនាំឲ្យមានប្រថុយប្រថាន និងបាត់បង់អត្ថប្រយោជន៍ការងារ។
គួរជម្រាបថា បើយោងតាមការប៉ាន់ប្រមាណមួយ នៅក្នុងចំណោមពលរដ្ឋចំណាកស្រុកប្រមាណ៥លាននាក់ដែលធ្វើការនៅក្នុងប្រទេសថៃ គឺមានប្រមាណតែពាក់កណ្ដាលប៉ុណ្ណោះ ដែលមានសំណុំឯកសារការងារត្រឹមត្រូវ។
ចំណែកបើយោងតាមក្រសួងការងារកម្ពុជា គិតត្រឹមពាក់កណ្ដាលឆ្នាំ២០២២ ចំនួនពលរដ្ឋខ្មែរដែលធ្វើការក្នុងប្រទេសថៃ មានចំនួនច្រើនជាង១លាន២សែននាក់ ដែលធ្វើការភាគច្រើននៅក្នុងវិស័យសំណង់ កសិកម្ម នេសាទ ឬវិស័យខ្ចប់ម្ហូបអាហារ។ ចំណែករបាយការណ៍របស់អង្គការសង់ត្រាល់ (Central)វិញ រកឃើញថា ពលករខ្មែរ ដែលកំពុងរស់នៅ និងធ្វើការក្នុងប្រទេសថៃ ទាំងស្របច្បាប់ និងមិនស្របច្បាប់មានជាងពីរលាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ