លោក ហ៊ុន ម៉ាណែត នៅបន្តឲ្យមានអ្នកវាយតម្លៃពីស្ថានភាពសិទ្ធិមនុស្សប្រចាំកម្ពុជា
លោកនាយករដ្ឋមន្ត្រី ហ៊ុន ម៉ាណែត បានចុះហត្ថលេខាបន្តសុពលភាពអាណត្តិរបស់អ្នកវាយតម្លៃស្ថានភាពសិទ្ធិមនុស្សប្រចាំកម្ពុជា ដោយអះអាងថាជាការឆ្លុះបញ្ចាំងពីសុច្ឆន្ទៈរបស់កម្ពុជាក្នុងការកែលម្អស្ថានភាពសិទ្ធិមនុស្ស។ នេះយោងតាមសេចក្តីប្រកាសព័ត៌មានស្តីពីជំនួបរវាង លោក ហ៊ុន ម៉ាណែត និងលោក អង់តូនីញ៉ូ ហ្គូទែរ៉េស អគ្គលេខាធិការអង្គការសហប្រជាជាតិនៅថ្ងៃទី២២កញ្ញា នៅទីក្រុងញ៉ូវយ៉ក។
ចុះផ្សាយនៅថ្ងៃ៖
ស្តាប់ - ០២:២២
សូមបញ្ជាក់ថា អាណត្តិរបស់អ្នករាយការណ៍ពិសេសស្តីពីសិទ្ធិមនុស្សប្រចាំកម្ពុជាគឺមានរយៈពេល៣ឆ្នាំ ដែលត្រូវផ្លាស់ចេញម្តង។ តែរដ្ឋាភិបាលកម្ពុជាគូសបញ្ជាក់ថា មានតែប្រទេសកម្ពុជាមួយទេក្នុងចំណោមប្រទេសនៅអាស៊ីអាគ្នេយ៍ដែលអនុញ្ញាតឲ្យមានអ្នកវាយតម្លៃស្ថានភាពសិទ្ធិមនុស្សបែបនេះ។
នៅកម្ពុជាចាប់តាំងពីឆ្នាំ១៩៩៣មក គឺមានអ្នករាយការណ៍ពិសេសស្តីពីសិទ្ធិមនុស្សចំនួន៧រូបហើយ ដែលចុងក្រោយគេនេះគឺលោក Vitit MUNTARBHORN ជាជនជាតិថៃ។ លោកបានចូលកាន់តំណែងកាលពីឆ្នាំ២០២១ ដែលត្រូវផុតអាណត្តិនៅឆ្នាំ២០២៣នេះ។
ក្នុងរយៈពេលមួយឆ្នាំដំបូង ជាគ្រាដែលមានកូវីដ១៩នោះ លោកពុំបានមកជាន់ទឹកដីកម្ពុជាដោយផ្ទាល់ ឡើយតែក្នុងរបាយការណ៍ចេញផ្សាយដំបូង កាលពីខែតុលាឆ្នាំ២០២១ លោក Vitit MUNTARBHORN បានលើកឡើងពីកង្វល់របស់ខ្លួន ទាក់ទងទៅនឹងការចាប់ខ្លួនអ្នកដែលសម្តែងមតិប្រឆាំងរដ្ឋាភិបាល ដែលកាលគ្រានោះ មានអ្នកការពារសិទ្ធិមនុស្សចំនួន២៥នាក់ស្ថិតក្នុងពន្ធនាគារ ខណៈមន្ត្រីនៃអតីតគណបក្សសង្រ្គោះជាតិ ចំនួន៩នាក់ ត្រូវបានកាត់ឲ្យមានទោសលើសពី២៥ឆ្នាំ។ សម្រាប់លោក Vitit ការណ៍នេះធ្វើឲ្យដំណើរប្រជាធិបតេយ្យកម្ពុជាដើរថយក្រោយ ហើយវានឹងប៉ះពាល់ដល់សិទ្ធិសម្រេចរបស់ពលរដ្ឋ នៅក្នុងកិច្ចការនយោបាយ។
ក្នុងនាមជាអ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិ ពេលលោកមកជាន់ទឹកដីកម្ពុជាដំបូងចាប់ពីថ្ងៃទី១៥ដល់ថ្ងៃទី២៦សីហាឆ្នាំ២០២២ លោកបានចុះទៅសង្កេតផ្ទាល់ដល់កន្លែងតវ៉ារបស់អតីតបុគ្គលិកកាស៊ីណូហ្គាវើលដ៍។ លោកបានស្នើឲ្យមានដំណោះស្រាយលើបញ្ហានេះ ប៉ុន្តែមកដល់ពេលនេះ សកម្មភាពតវ៉ានៅតែបន្តកើតមានដដែល។
បើត្រឡប់ទៅមើលការប្តេជ្ញាចិត្តរបស់ប្រមុខរដ្ឋាភិបាលកម្ពុជា លោក ហ៊ុន ម៉ាណែត នៅចំពោះមុខអគ្គលេខាធិការអង្គការសហប្រជាជាតិវិញ គឺកម្ពុជាបន្តកសាងសង្គមមួយ ដោយលើគោលការណ៍នីតិរដ្ឋ និងការគោរពច្បាប់ដូចមានចែងក្នុងរដ្ឋធម្មនុញ្ញ។ នេះបើតាមសេចក្តីប្រកាសព័ត៌មានស្តីពីជំនួបរវាង លោក ហ៊ុន ម៉ាណែត និងលោក អង់តូនីញ៉ូ ហ្គូទែរ៉េស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ