បក្សប្រឆាំងស្នើឲ្យប្រទេសហត្ថលេខីជំរុញឲ្យរដ្ឋាភិបាលគោរព ២៣ តុលា ខណៈបារាំងស្នើឲ្យពង្រីកលំហនយោបាយ
សម្ព័ន្ធភាពឆ្ពោះទៅអនាគត នៅថ្ងៃទី២៣ ខែតុលានេះ បានចេញសេចក្តីថ្លែងការណ៍មួយ រំលឹកខួបលើទី៣២ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស៍ថ្ងៃ ២៣ តុលា។ សេចក្តីថ្លែងការណ៍ក៏បានបញ្ជាក់ដែរថាកិច្ចព្រមព្រៀងសន្តិភាពទីក្រុងប៉ារីស៍មិនត្រូវបានគោរពពេញលេញទេ និងស្នើឲ្យប្រទេសហត្ថលេខីជួយជំរុញឲ្យមានការគោរពនូវកិច្ចព្រមព្រៀងនេះ ស្របពេលដែលប្រទេសបារាំងជំរុញឲ្យកម្ពុជាពង្រីកលំហសេរីភាព និងប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០៣:៥៧
ដោយចាត់ទុកថាកិច្ចព្រមព្រៀងសន្តិភាពទីក្រុងប៉ារីស៍ថ្ងៃ ២៣ តុលា ១៩៩១ ជាថ្ងៃប្រវត្តិសាស្ត្រ គណបក្សសម្ព័នភាពរួមមានគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជាបានសរសេរថារយៈពេល៣២ឆ្នាំ កន្លងទៅ គោលការណ៍គ្រឹះនៃកិច្ចព្រមព្រៀងសន្តិភាពទីក្រុងប៉ារីស៍មិនត្រូវបានគោរព និងអនុវត្តឲ្យបានពេញលេញឡើយ ដូចជាការបង្រួបបង្រួម និងឯកភាពជាតិ ការគោរពសិទ្ធិមនុស្ស លទ្ធិប្រជាធិបតេយ្យសេរីពហុបក្ស ឯករាជ្យភាពនៃប្រព័ន្ធតុលាការ។ ចំណុចទាំងអស់នេះក៏ត្រូវសម្ព័ន្ធភាពឆ្នោះទៅអនាគត រំលឹកដល់រដ្ឋាភិបាលផងដែរ។
សេចក្តីថ្លែងការណ៍របស់គណបក្សសម្ព័ន្ធ ក៏បានសម្តែងនូវការគោរពដឹងគុណ និងចងចាំជានិច្ចនូវវីរភាពរបស់វីរជនខ្មែរស្ថាបនិកទាំងអស់នៃកិច្ចព្រមព្រៀងសន្តិភាពទីក្រុងប៉ារីស៍ និងបណ្តាប្រទេសហត្ថលេខីទាំងអស់ ដែលបានខិតខំប្រឹងប្រែងស្វែងរកដំណោះស្រាយ ក្នុងការបញ្ចប់សង្គ្រាមស៊ីវិលជាង២ទស្សវត្សរ៍នៅកម្ពុជា ដោយសម្ព័ន្ធភាពក៏បានអំពាវនាវឲ្យប្រទេសហត្ថលេខីទាំងអស់ បន្តជួយជំរុញការអនុវត្តន៍កិច្ចព្រមព្រៀងនេះ ឲ្យបានពេញលេញ ដើម្បីជួយស្តារ និងកសាងប្រទេសកម្ពុជាឡើងវិញ។
រឿងខួប៣២ឆ្នាំថ្ងៃ២៣ តុលានេះ លោក ហ៊ុន សែន អតីតនាយករដ្ឋមន្ត្រី ក៏បានសរសេរនៅលើហ្វេសប៊ុករបស់លោកដែរ ដោយលោករៀបរាប់ពីតំណាងរបស់ភាគីខ្មែរជម្លោះគ្នាទាំង៤ រួមមានភាគីរដ្ឋកម្ពុជា ចលនាហ្វុនស៊ិនប៉ិច រណសិរ្សជាតិរំដោះប្រជាពលរដ្ឋខ្មែរ និងភាគីកម្ពុជាប្រជាធិបតេយ្យ រួមទាំងប្រទេសចំនួន១៨ ដែលជាសាក្សី និងអង្គការសហប្រជាជាតិផងដែរ។
លោក ហ៊ុន សែន ក៏បានរំលេចខ្លាំងជាងគេពីសកម្មភាពជំនួបចរចា សីហនុ-ហ៊ុន សែន ចាប់តាំងពីថ្ងៃទី០២ ខែធ្នូ ឆ្នាំ១៩៨៧ នៅ FERE-EN-TARDENOIS ប្រទេសបារាំង។ ក៏ប៉ុន្តែលោកបញ្ជាក់ថា ទោះបីមានកិច្ចព្រមព្រៀងសន្តិភាពប៉ារីស៍ ២៣ តុលា ១៩៩១ ក៏ពិតមែន ប៉ុន្តែសង្រ្គាមស៊ីវិលនៅកម្ពុជា នៅតែបន្តដែលបញ្ហានេះបង្កដោយភាគីកម្ពុជាប្រជាធិបតេយ្យ(ប៉ុលពត)។ លោកថា ក្រោមនយោបាយ ឈ្នះ-ឈ្នះ របស់លោក សង្រ្គាមស៊ីវិលត្រូវបានបញ្ចប់ទាំងស្រុងនៅឆ្នាំ១៩៩៨ ដែលកម្ពុជាទូទាំងប្រទេស បានស្គាល់នូវសន្តិភាពពេញលេញ និងសម្បូរសប្បាយរហូតមកដល់សព្វថ្ងៃ។
ជាមួយគ្នានេះ ស្ថានទូតបារាំងប្រចាំនៅកម្ពុជាក៏បានសរសេរនៅលើហ្វេប៊ុករបស់ខ្លួនដែរថា កាលពី៣២ឆ្នាំ្មមុន ការចុះហត្ថលេខាលើកិច្ចលើព្រមព្រៀងសន្តិភាពទីក្រុងប៉ារីស៍ គឺជាការចាប់ផ្តើមនៃការវិលត្រលប់មកវិញនៃសនិ្តភាព និងការផ្សះផ្សារនៅប្រទេសកម្ពុជា ដោយមានការគាំទ្រពីអង្គការសហប្រជាជាតិ។
ប្រទេសបារាំង ដែលមានកិត្តិយសធ្វើជាសហប្រធានកិច្ចព្រមព្រៀងទីក្រុងប៉ារីស៍ ជំរុញឲ្យកម្ពុជាពង្រីកលំហនយោបាយ និងសេរីភាពពលរដ្ឋ ក៏ដូចជាពង្រឹងលទ្ធិប្រជាធិបតេយ្យពហុបក្ស ដែលមានការគោរពសិទ្ធិមនុស្ស និងសេរីភាពជាមូលដ្ឋាន ស្របតាមប្បញ្ញត្តិនៃរដ្ឋធម្មនុញ្ញកម្ពុជា ដែលប្រសូតចេញពីកិច្ចព្រមព្រៀងនេះ។
គណបក្សហ្វុនស៊ិនប៉ិច ដែលជាតួអង្គសំខាន់នៃកិច្ចព្រមព្រៀងទីក្រុងប៉ារីស៍នេះដែរ ក៏បានចេញសេចក្តីថ្លែងការណ៍រៀបរាប់ពីវីរភាពរបស់ថ្នាក់ដឹកនាំខ្លួនដែរ ដែលមានសម្តេចក្រុមព្រះ នរោត្តម រណឫទ្ធិ ជាតំណាង។ គណបក្សរាជានិយមមួយនេះ ក៏បានអំពាវនាវដែរដល់ពលរដ្ឋខ្មែរគ្រប់និន្នាការនយោបាយ ឲ្យបន្តថែរក្សាស្មារតីនៃកិច្ចព្រមព្រៀងសន្តិភាពទីក្រុងប៉ារីស៍នេះ។
នៅក្នុងប្រទេសអូស្ត្រាលីឯណោះវិញ លោក សម រង្ស៊ី ដែលជាប្រធានស្តីទីអតីតគណបក្សសង្គ្រោះជាតិ ក៏បានលើកឡើងដែរថា កិច្ចព្រមព្រៀងសន្តិភាពទីក្រុងប៉ារីស៍ នៅតែមានសុពលភាពរស់រវើកមកដល់បច្ចុប្បន្ន ដោយលោកស្នើទៅហត្ថលេខីទាំងអស់ ជំរុញឲ្យមានការគោរពកិច្ចព្រមព្រៀង សន្តិភាពទីក្រុងប៉ារីស៍ ថ្ងៃ ២៣ តុលា ១៩៩១ នេះ ដែលជាសន្ធិសញ្ញាអន្តរជាតិ ជាមូលដ្ឋានច្បាប់ ដើម្បីធានាឲ្យប្រទេសកម្ពុជាមានសុខសន្តិភាពយ៉ាងពិតប្រាកដ។ នេះបើតាមសំណេរនៅលើហ្វេសប៊ុក លោក សម រង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ