លោក ហ៊ុន ម៉ាណែត បង្ហោះនិក្ខេបបទសិក្សាជាសាធារណៈ តាមការស្នើសុំរបស់អ្នកកាសែតបរទេស
លោកនាយករដ្ឋមន្ត្រី ហ៊ុន ម៉ាណែត នៅយប់ថ្ងៃពុធ ទី៨វិច្ឆិកា បានសម្រេចបង្ហោះនិក្ខេបបទសិក្សាថ្នាក់អនុបណ្ឌិត និងថ្នាក់បណ្ឌិត ពីក្រៅប្រទេស ជាសាធារណៈ តាមការស្នើសុំរបស់អ្នកកាសែតបរទេស។ ការដាក់ផ្សព្វផ្សាយជាសាធារណៈនេះ ធ្វើឡើង ក្រោយពេលដែលលោក David Whitehouse អ្នកសារព័ត៌មានអន្តរជាតិមួយរូប បានសរសេរលិខិតចំហមួយច្បាប់ ដាក់ជូនលោក ហ៊ុន ម៉ាណែត ក្នុងការស្នើសុំចម្លងនិក្ខេបបទរបស់លោក។
ចុះផ្សាយនៅថ្ងៃ៖
ស្តាប់ - ០៣:២៨
តាមរយៈបណ្តាញសង្គមតេលេក្រាម លោកនាយករដ្ឋមន្ត្រី ហ៊ុន ម៉ាណែត បានគូសបញ្ជាក់ ប្រាប់លោក David Whitehouse ថា លោកសូមអរគុណចំពោះការព្យាយាមស្វែងរកនិក្ខេបបទបញ្ចាប់ការសិក្សារបស់លោក បើទោះជាលោក ហ៊ុន ម៉ាណែត មិនដឹងថា ការស្នើសុំនោះធ្វើឡើងដោយគោលបំណងអ្វីឲ្យច្បាស់លាស់។
ការសម្រេចបង្ហោះនិក្ខេបបទជាសាធារណៈ នេះ គឺក្រោយពេលលោក David Whitehouse អ្នកសារព័ត៌មានជនជាតិបារាំង បានអះអាងនៅក្នុងលិខិតចំហផ្ញើជូនអង្គភាពព័ត៌មាននាយករដ្ឋមន្ត្រីកម្ពុជា ថា លោកមានការពិបាកទទួលបានការចម្លងនិក្ខេបបទរបស់លោកនាយករដ្ឋមន្ត្រី ហ៊ុន ម៉ាណែត ដោយ សកលវិទ្យាល័យ Bristol បានបដិសេធមិនបញ្ចេញនិក្ខេបបទនោះជាច្រើនដង។
នៅក្នុងសារឆ្លើយទៅកាន់លោក David Whitehouse លោក ហ៊ុន ម៉ាណែត ថា លោកពិតជាសោកស្តាយ នៅពេលដែលបានដឹងថាលោក David Whitehouse មានការលំបាក ក្នុងការស្នើសុំសេចក្តីចម្លងនិក្ខេបបទថ្នាក់បណ្ឌិតនេះ ពីសាកលវិទ្យាល័យ Bristol ។ តាមលោកនាយករដ្ឋមន្ត្រី គឺលោកមិនដឹងអំពីគោលការណ៍ ឬបទប្បញ្ញត្តិរបស់សាកលវិទ្យាល័យ ពាក់ព័ន្ធនឹងការគ្រប់គ្រងឬចែកចាយឯកសារស្រាវជ្រាវរបស់និស្សិត ដូចជានិក្ខេបបទរបស់លោកនេះទេ។ លោក ហ៊ុន ម៉ាណែត បានបញ្ជាក់ទៀតថា លោកក៏មិនដែលបានស្នើសុំឱ្យសាកលវិទ្យាល័យ Bristol រក្សានិក្ខេបបទនេះជាការសម្ងាត់នោះឡើយ។
បើតាមនាយករដ្ឋមន្ត្រីកម្ពុជា ក៏គ្មានហេតុផលណាមួយ ក្នុងការរក្សានិក្ខេបបទរបស់លោកជាការសម្ងាត់ដែរ ។ ដ្បិតនិក្ខេបបទនេះ ជាលទ្ធផលដែលកើតចេញពីការសិក្សាស្រាវជ្រាវ និងការវិភាគជាច្រើនឆ្នាំ រួមទាំងការពិគ្រោះយោបល់ជាប្រចាំ ជាមួយលោកសាស្រ្តាចារ្យ Jonathan Temple។
ជាការកត់សម្គាល់ បញ្ហានិក្ខេបបទរបស់លោកនាយករដ្ឋមន្ត្រី ហ៊ុន ម៉ាណែត ត្រូវបានលើកមកពិភាក្សាវែកញែក ទាមទារការដាក់បង្ហាញជាសាធារណៈជាហូរហែ ពីសំណាក់បណ្តាអ្នកនយោបាយប្រឆាំង និងអ្នកសារព័ត៌មាន។ ក្នុងនោះលោក សម រង្ស៊ី គូប្រជែងនយោបាយរបស់លោកអតីតនាយករដ្ឋមន្ត្រី ហ៊ុន សែន រាប់ឆ្នាំមកនេះ ក៏បានវាយប្រហារទៅលើការសរសេរនិក្ខេបបទថ្នាក់បណ្ឌិតរបស់លោក ហ៊ុន ម៉ាណែត ផងដែរ។ កាលពីថ្ងៃទី១៨ ខែកញ្ញាកន្លងទៅ លោក សម រង្ស៊ី បានដាក់ការមន្ទិលសង្ស័យអំពីសញ្ញាបត្របណ្ឌិត ដែលលោក ហ៊ុន ម៉ាណែត ទទួលបានកាលពីឆ្នាំ ២០០៩ ពីសាកលវិទ្យាល័យ Bristol ចក្រភពអង់គ្លេស ថា ប្រហែលជា លោក ហ៊ុន ម៉ាណែត បានជួលជនបរទេសឲ្យសរសេរនិក្ខេបបទ មួយ ដែលមិនពាក់ព័ន្ធអ្វី នឹងប្រទេសកម្ពុជា។
ករណីនេះ លោក ហ៊ុន ម៉ាណែត ឆ្លើយតបថា និក្ខេបបទបណ្ឌិតរបស់លោក មិនអាចជាការបន្លំបានទេ និងថា លោក សម រង្ស៊ី ប្រហែលរៀនមិនដល់ថ្នាក់បណ្ឌិត ទើបមិនយល់ពីការធ្វើនិក្ខេបបទថ្នាក់បណ្ឌិតដូច្នេះ។
គួរបញ្ជាក់ថា នៅក្នុងនិក្ខេបបទរបស់លោក ហ៊ុន ម៉ាណែត ដែលបង្ហោះជាសាធារណៈនោះ បានសរសេរសម្រាប់ថ្នាក់អនុបណ្ឌិត ថា «IS MARKET- ASSISTED LAND REFORM AN APPROPRIATE CHOICE FOR CAMBODIA AT THE PRESENT TIME?» ក្នុងន័យជាខេមរភាសាថា «តើការធ្វើកំណែទម្រង់ដីធ្លី គឺជាជម្រើសដ៏ល្អដែលជំរុញអោយមានទីផ្សារសមរម្យសម្រាប់កម្ពុជាបច្ចុប្បន្នដែរឬទេ?»។ ខណៈដែល និក្ខេបបទថ្នាក់បណ្ឌិតរបស់លោក ពីសាកលវិទ្យាល័យ Bristol បានសរសេរអំពី «What Determines the Firm Size Distribution and Structural Integration? A Cross-Country Study» ដែលប្រែជាខេមរភាសា ថា «ករណីសិក្សាឆ្លងប្រទេស៖ តើកត្តាអ្វីខ្លះដែលកំណត់សំគាល់ទំហំសហគ្រិន និងការរៀបចំរចនាសម្ព័ន្ធ?»។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ