បក្ស«ភ្លើងទៀន»ប្រាប់សមាជិកខ្លួនមិនឲ្យទៅចូលរួមសមាជបក្ស«ភ្លើងអំពូល»
គណបក្សភ្លើងទៀនមិនអនុញ្ញាតឲ្យសមាជិករបស់ខ្លួន ដែលមានសមាសភាពនៅថ្នាក់ក្រោមជាតិ ជាពិសេសសមាជិកក្រុមប្រឹក្សាឃុំ សង្កាត់ ទាំងជាង២ពាន់នាក់ ទៅចូលរួមសមាជរបស់គណបក្សកម្លាំងជាតិ ដែលនឹងត្រូវធ្វើឡើងនៅថ្ងៃអាទិត្យសប្តាហ៍នេះ។ ការហាមឃាត់របស់គណបក្សភ្លើងទៀនដល់សមាជិករបស់ខ្លួនមិនឲ្យទៅចូលរួមសមាជដំបូងរបស់គណបក្សកម្លាំងជាតិ គឺធ្វើឡើងបន្ទាប់ពីគណបក្សកម្លាំងជាតិ បានធ្វើលិខិតអញ្ជើញមេឃុំ និងក្រុមប្រឹក្សាជាប់ឆ្នោតរបស់គណបក្សភ្លើងទៀនទៅចូលរួមសមាជរបស់ខ្លួនដោយចំហ។
ចុះផ្សាយនៅថ្ងៃ៖
ស្តាប់ - ០៣:៣៨
អគ្គលេខាធិការគណបក្សភ្លើងទៀន លោក លី សុធារ៉ាយុត្តិ កាលពីថ្ងៃព្រហស្បតិ៍ម្សិលមិញ បានណែនាំ ទៅកាន់សមាជិកគណបក្សភ្លើងទៀនថ្នាក់ក្រោមជាតិ ដោយចាប់តាំងពីគណៈកម្មាធិការប្រតិបត្តិគណបក្សរាជធានី ខេត្ត ក្រុង ស្រុក ខណ្ឌ និងជាពិសេសក្រុមប្រឹក្សាឃុំ សង្កាត់ទាំង ២ ១៩៨រូប ដែលជាប់ឆ្នោតពីគណបក្សភ្លើងទៀន ត្រូវប្រកាន់ជំហររបស់ខ្លួនឲ្យបានខ្ជាប់ខ្ជួន និងអនុវត្តតួនាទី ភារកិច្ចស្របតាមលក្ខន្តិកៈ បទបញ្ជាផ្ទៃក្នុង និងសេចក្តីណែនាំរបស់គណបក្ស។
សេចក្តីណែនាំរបស់អគ្គលេខាគណបក្សភ្លើងទៀន បញ្ជាក់ថាប្រធានគណបក្សនឹងចាត់តំណាងទៅចូលរួមសមាជគណបក្សកម្លាំងជាតិតាមការអញ្ជើញ ក៏ប៉ុន្តែមិនតម្រូវឲ្យថ្នាក់ដឹកនាំគណៈកម្មាធិការប្រតិបត្តិគណបក្សរាជធានី ខេត្ត ក្រុង ស្រុក ខណ្ឌ និងសមាជិកក្រុមប្រឹក្សាឃុំ សង្កាត់ទាំងអស់ទៅចូលរួមឡើយ។ លើសពីនេះ គណបក្សភ្លើងទៀនក៏បានហាមប្រាមដែរដល់សមាជិករបស់ខ្លួនថ្នាក់រាជធានី ខេត្ត ក្រុង ស្រុក ខណ្ឌ និងសមាជិកក្រុមប្រឹក្សាឃុំ សង្កាត់ ជាប់ឆ្នោត មិនឲ្យចូលរួមសកម្មភាពនយោបាយណាមួយ ដែលផ្ទុយពីគោលការណ៍គណបក្សឡើយ។
សូមរំលឹកថាកាលពីថ្ងៃទី០៨ ខែវិច្ឆិកា កន្លងទៅ គណបក្សកម្លាំងជាតិ ដែលទើបតែទទួលស្គាល់ដោយក្រសួងមហាផ្ទៃ បានធ្វើលិខិតអញ្ជើញដោយចំហមួយទៅកាន់មេឃុំ ជំទប់ទី១ ជំទប់ទី២ និងសមាជិកក្រុមប្រឹក្សាឃុំសង្កាត់ គណបក្សភ្លើងទៀន ចូលរួមជាកិត្តិយសសមាជដំបូងគណបក្សកម្លាំងជាតិ ដែលនឹងត្រូវធ្វើនៅថ្ងៃអាទិត្យទី១២ ខែវិច្ឆិកាខាងមុខ នៅក្រុងស្ទឹងសែន ខេត្តកំពង់ធំ។
លោក ឯម សុវណ្ណារ៉ា អ្នកវិភាគនយោបាយនៅកម្ពុជាបានមើលឃើញថាវាជាទម្រង់បែកបាក់មួយរបស់គណបក្សប្រឆាំង ខណៈគណបក្សកម្លាំងជាតិបានព្យាយាមអូសទាញសមាជិករបស់គណបក្សភ្លើងទៀន ដែលជារូបភាពមិនល្អសម្រាប់បក្សប្រឆាំង។ ដោយលើកជាយោបល់ថាគណបក្សភ្លើងទៀនគួររកដំណោះស្រាយឡើងវិញនូវប្រជាធិបតេយ្យផ្ទៃក្នុងបក្ស លោក ឯម សុវណ្ណារ៉ា កត់សម្គាល់ថាគណបក្សកម្លាំងជាតិយ៉ាងច្រើនបំផុតបើអូសទាញសមាជិកភ្លើងទៀនបាន ក៏បានមិនច្រើនដែរ នៅក្នុងកាលៈទេសៈនេះ យ៉ាងច្រើនអាចបាន១ភាគ៣។ នេះបើយោងទៅលើចរន្តឆក់ទាញរបស់លោក រ៉ុង ឈុន និងលោកជា មុនី ដែលជាមេដឹកនាំសហជីព និងជាអតីតមេដឹកនាំជាន់ខ្ពស់គណបក្សភ្លើងទៀន ដែលបានប្រកាសចូលរួមជាមួយគណបក្សកម្លាំងជាតិជាបន្តបន្ទាប់។
សូមរំលឹកថាគណបក្សភ្លើងទៀនត្រូវគេមើលឃើញថា នឹងមិនមានឱកាសចូលរួមបោះឆ្នោតបានទៀតទេ ដោយសារមិនមានឯកសារចុះបញ្ជីគណបក្សច្បាប់ដើម។ គណបក្សនេះ ក៏លើកយោបល់ឲ្យគណបក្សឆន្ទៈខ្មែរ នៅក្នុងសម្ព័ន្ធភាពបក្សប្រឆាំង ជាកង់សឺគួរសម្រាប់ការចូលរួមបោះឆ្នោតជ្រើសតាំងព្រឹទ្ធសភានៅឆ្នាំ ២០២៤ខាងមុខ។ ក៏ប៉ុន្តែសមាជិកគណៈកម្មការនាយកនៅមិនទាន់ឯកភាពនៅឡើយ។
ស្របពេលជាមួយគ្នានេះ គណបក្សកម្លាំងជាតិក៏បានរះឡើងយ៉ាងឆាប់រហ័ស ដែលមេដឹកនាំគណបក្សថ្មីនេះ បានចេញមកពីសមាជិកជាន់ខ្ពស់គណបក្សភ្លើងទៀន។ តើនេះជាយុទ្ធសាស្ត្រនយោបាយរបស់អ្នកប្រឆាំង ឬយ៉ាងណា? អ្នកតាមដាននយោបាយ និងសង្គមខ្មែរ មើលឃើញថាវាជាស្រមោលមិនសូវល្អ ខណៈបក្សភ្លើងទៀន និងបក្សភ្លើងអំពូល ព្យាយាមហែកសកម្មជន និងអ្នកគាំទ្រគ្នាជាពីរ។ តាមអ្នកវិភាគ ការធ្វើបែបនេះ អ្នកដែលអង្គុយទទួលផល គឺគណបក្សកាន់អំណាចឯណោះទេ។
ទោះយ៉ាងណា គណបក្សប្រឆាំងនៅកម្ពុជាសុទ្ធតែទទួលបានបទពិសោធន៍ដ៏ជូរចត់ជាច្រើនមកហើយ ហើយបទពិសោធន៍ទាំងនោះ គួរតែគ្រប់គ្រាន់ផងដែរ។ នេះបើតាមអ្នកតាមដាននយោបាយកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ