ចិនបន្តបញ្ជាក់ពីការគាំទ្រលោក ហ៊ុន ម៉ាណែត ក្រោយចេញដំណើរបាន៣ខែ
៣ខែក្រោយការចេញដំណើររបស់រដ្ឋាភិបាលថ្មីកម្ពុជា ចិនបានបញ្ជាក់ជាថ្មីពីការបន្តគាំទ្រការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត ដើម្បីធានានូវកំណើនសេដ្ឋកិច្ច និងនាំមកនូវផ្លែផ្កាសម្រាប់ប្រទេស និងប្រជាជនកម្ពុជា។ ការបញ្ជាក់បែបនេះ បានធ្វើឡើងនៅក្នុងជំនួបមួយរវាងលោក ហ៊ុន សែន ប្រធានគណបក្សប្រជាជនកម្ពុជា និងលោកស្រី ស៊ិន យៀកយៀក (Shen Yueyue) អនុប្រធានសភាប្រឹក្សានយោបាយប្រជាជនចិន កាលពីថ្ងៃទី២៣ ខែវិច្ឆិកា នៅទីស្នាក់ការគណបក្សកាន់អំណាច ក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:៤១
ជាថ្មីម្តងទៀតប្រទេសចិនតាមរយៈអនុប្រធានសភារបស់ខ្លួនគឺលោកស្រី ស៊ិន យៀកយៀក (Shen Yueyue) ដែលបានមកទស្សនកិច្ចនៅកម្ពុជា បានសម្តែងនូវការគាំទ្រដល់ការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត ដោយចិនលើកឡើងថា ដើម្បីធានានូវកំណើនសេដ្ឋកិច្ច និងនាំមកនូវផលប្រយោជន៍ជាផ្លែផ្កាដើម្បីប្រទេស និងប្រជាជនកម្ពុជា។ នេះបើតាមសេចក្តីប្រកាសព័ត៌មានរបស់គណបក្សប្រជាជនកម្ពុជានៅថ្ងៃទី២៣ ខែវិច្ឆិកា ឆ្នាំ២០២៣។ ការបញ្ជាក់របស់មេដឹកនាំទី២ នៃអំណាចនីតិបញ្ញត្តិចិនធ្វើឡើងក្រោយរដ្ឋាភិបាលថ្មីដឹកនាំដោយលោក ហ៊ុន ម៉ាណែត ចេញដំណើរបានរយៈពេល៣ខែ។
នៅក្នុងជំនួបជាមួយលោក ហ៊ុន សែន ប្រធានគណបក្សប្រជាជនកម្ពុជានេះដែរ អនុប្រធានសភាចិនបានឲ្យដឹងថាទស្សនកិច្ចរបស់លោកស្រីនៅកម្ពុជា ជាការជំរុញបន្ថែមទៀតនូវការអនុវត្តន៍កិច្ចសហប្រតិបត្តិការជាកស្តែងនៅក្នុងការកសាងសហគមន៍ជោគវាសនារួម កម្ពុជា-ចិន ដែលមានគុណភាពខ្ពស់ កម្រិតខ្ពស់ និងស្តង់ដារខ្ពស់នៅក្នុងយុគសម័យថ្មី។
ជាមួយគ្នានេះ ជំនួបរវាងប្រធានគណបក្សកាន់អំណាច និងអនុប្រធានសភាចិន ភាគីទាំងពីរក៏បានបង្ហាញពីការប្តេជ្ញាចិត្តបន្តគាំទ្រគ្នាទៅវិញទៅមក ដើម្បីរក្សាសន្តិភាព ស្ថិរភាព ការអភិវឌ្ឍន៍ និងពង្រឹងនូវទំនាក់ទំនងរវាងប្រជាជន និងប្រជាជនឲ្យកាន់តែស៊ីជម្រៅថែមទៀត។ ក្រៅពីនេះជំនួបនៃថ្នាក់ដឹកនាំជាន់ខ្ពស់នយោបាយប្រទេសទាំងពីរបានរំលឹកក្នុងនាមមិត្តដែកថែបថា កិច្ចព្រមព្រៀងពាណិជ្ជកម្មសេរីកម្ពុជា-ចិន នៅតែបន្តដើរតួនាទីយ៉ាងសំខាន់ក្នុងការកសាងសហគមន៍ជោគវាសនារួម ការប្តេជ្ញាបន្តបង្កើននូវសមិទ្ធផលផ្លែផ្កាជាក់ស្តែងលើ«ច្រករបៀងឧស្សាហកម្ម និងបច្ចេកវិទ្យា» និង«ច្រករបៀងមច្ឆារ និងអង្ករ» ក្រោមកិច្ចសហប្រតិបត្តិការត្បូងពេជ្រ។
សូមរំលឹកថាបន្ទាប់ពីឡើងធ្វើជានាយករដ្ឋមន្ត្រីកាលពីចុងខែសីហា លោក ហ៊ុន ម៉ាណែត ក៏ធ្លាប់បានជួបលោកប្រធាននាធិបតីចិន ស៊ី ជិនពីង ២លើកបន្តបន្ទាប់គ្នាផងដែរត្រឹមតែរយៈពេលមិនដល់២ខែផង។ នៅក្នុងជំនួបជាមួយនាយករដ្ឋមន្ត្រីថ្មីរបស់កម្ពុជា មេដឹកនាំកំពូលចិនតែងពោលពាក្យរឹតចំណង បង្កើន ពង្រីកកិច្ចសហប្រតិបត្តិការរវាងប្រទេសទាំងពីរ ដែលមានកំរិតខ្ពស់រួចទៅហើយនោះឲ្យកាន់តែខ្ពស់បន្ថែមទៀត។ មេដឹកនាំចិន ក៏បានបង្ហាញនូវចំណុចជាវិជ្ជមាន ដែលប្រទេស និងប្រជាជនកម្ពុជាទទួលបាននូវអត្ថប្រយោជន៍ពីការចូលរួមជាមួយយុទ្ធសាស្ត្រ«ខ្សែក្រវាត់ និងផ្លូវ»របស់ចិន ខណៈដែលកម្ពុជាបន្តអះអាងតជំនាន់ពីការគាំទ្រឥតងាករេនូវនយោបាយចិន១ បើទោះណាជាប្រទេសនេះរងនូវការរិះគន់ពីលោកខាងលិចថាមានការលម្អៀងទៅរកចិនក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ