អ្នកនយោបាយមិនស្ថិតក្នុងចំណោមទណ្ឌិតដែលត្រូវបានលើកលែងនិងបន្ថយទោស
ទណ្ឌិតចំនួន៥៣៨នាក់ត្រូវបានលើកលែង និងបន្ថយទោសនៅក្នុងឱកាសពិធីបុណ្យឯករាជ្យជាតិ និងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣។ ប៉ុន្តែអ្នកនយោបាយប្រឆាំងដែលត្រូវបានជាប់ទោស គឺមិនស្ថិតក្នុងចំណោមទណ្ឌិតដែលត្រូវបានលើកលែងនិងបន្ថយទោសនៅពេលនេះឡើយ។
ចុះផ្សាយនៅថ្ងៃ៖
ស្តាប់ - ០២:២៧
លោក គឹម សន្តិភាព អ្នកនាំពាក្យក្រសួងយុត្តិធម៌ បានសរសេរលើហ្វេសប៊ុកថានៅក្នុងឱកាសពិធីបុណ្យឯករាជ្យជាតិ និងព្រះរាជពិធីបុណ្យអុំទូក ឆ្នាំ២០២៣ មហាក្សត្របានប្រទានការលើកលែងទោសដល់ទណ្ឌិតជាស្ត្រី០១ នាក់ គឺជាករណីមនុស្សធម៌ ដោយទណ្ឌិតមានជម្ងឺមហារីកដំណាក់កាលចុងក្រោយ។
ក្រៅពីនោះ ទណ្ឌិតចំនួន៥៣៧នាក់ដែលត្រូវបានបន្ធូរបន្ថយទោស ៣ ខែ ចំនួន ៣៩១ នាក់ ។ ការបន្ថយទោស ៦ ខែ ចំនួន ១៣២ នាក់ ។ ការបន្ថយទោស ៩ ខែ ចំនួន ១២ នាក់ ។ ការបន្ថយទោស ១២ ខែ ចំនួន០១នាក់ និងការបន្ថយទោសមួយជីវិតមកនៅត្រឹម ៣០ឆ្នាំ ចំនួន ០១ នាក់។
បើតាមអ្នកនាំពាក្យរូបនេះ គណៈកម្មការជាតិពុំលើកយកមកពិនិត្យពិចារណានោះឡើយ ចំពោះសំណើទាំងឡាយណាទាក់ទងនឹងទណ្ឌិតដែលបានប្រព្រឹត្តអំពើដូចជា ឧក្រិដ្ឋជនគ្រឿងញៀន
អំពើសាហាវយង់ឃ្នងករណីមិនរាងចាល ការប្រព្រឹត្តលើជនរងគ្រោះដែលជាសាច់ញាតិឬសហព័ទ្ធ
ការប្រព្រឹត្តលើជនរងគ្រោះជាមន្ត្រីរាជការឬមន្ត្រីសាធារណៈ និងទណ្ឌិតធ្លាប់ទទួលបានការបន្ធូរបន្ថយទោសម្តងរួចមកហើយ។
ដោយឡែកក៏គ្មានការលើកលែងដែរចំពោះបទល្មើសរំលោភផ្លូវភេទ ដែលជនរងគ្រោះជាអនីតិជនអាយុក្រោម១៤ឆ្នាំជនរងគ្រោះជាជនមានវិបល្លាសស្មារតីឬពិការ ជនរងគ្រោះជាសាច់សាលោហិត ករណីរំលោភបូក និងករណីប៉ុនប៉ង ឬបៀតបៀនកេរ្តិ៍ខ្មាសលើជនរងគ្រោះជាសាច់សាលោហិត។
ទោះជាយ៉ាងណា ក្រសួងយុត្តិធម៌មិនបានរំលេចពីករណីអ្នកនយោបាយជាប់ទោសនោះឡើយ។ ប៉ុន្តែបើតាមលោក អំ សំអាត នាយកអង្គការលីកាដូ គឺគ្មានឡើយការលើកលែងទោស ឬបន្ថយទោស ទៅលើអ្នកនយោបាយ ឬសកម្មជនប្រឆាំង។ ការនេះបានធ្វើឲ្យក្រុមគ្រួសារអ្នកនយោបាយដែលជាប់ទោសសំដែងការខកចិត្ត។ មន្ត្រីសិទ្ធិមនុស្សក៏ចង់ឃើញមានការលើកលែងទោសដល់អ្នកនយោបាយដែលកំពុងឃុំផងដែរ ដើម្បីអ្វីដែលគេហៅថាជាការផ្សះផ្សាជាតិឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ