ក្រុមស្រ្តីថ្ងៃសុក្រប្ដេជ្ញាតវ៉ាទាមទារឲ្យដោះលែងស្វាមីមិនទម្លាក់ដៃចុះឡើយ
ក្រុមស្រ្តីថ្ងៃសុក្រនឹងធ្វើការតវ៉ាទាមទារឲ្យដោះលែងស្វាមីរបស់ពួកគេបន្តទៀត ក្រោយខកចិត្តដែលស្វាមីរបស់ពួកគេមិនមានឈ្មោះក្នុងបញ្ជីបន្ធូរបន្ថយទោស និងលើកលែងទោសពីព្រះមហាក្សត្រនៅក្នុងព្រះរាជពិធីបុណ្យអុំទូក និងបុណ្យឯករាជ្យជាតិ។ ក្រៅពីតវ៉ា ក្រុមស្រ្តីថ្ងៃសុក្រ ក៏គ្រោងស្នើតាមបណ្ដាអង្គទូតប្រទេសប្រជាធិបតេយ្យនានានៅកម្ពុជា ឲ្យមានកិច្ចអន្តរាគមន៍ទៅរដ្ឋាភិបាល ដើម្បីស្នើឲ្យមានការដោះលែងស្វាមីរបស់ពួកគេផងដែរ។
ចុះផ្សាយនៅថ្ងៃ៖
ស្តាប់ - ០២:២៩
ថ្លែងប្រាប់វិទ្យុបារាំងអន្តរជាតិ RFI នៅថ្ងៃទី២៨វិច្ឆិកានេះ អ្នកស្រី ព្រំ ចាន់ថា ដែលជាស្រ្តីថ្ងៃសុក្រមួយរូប មានការខកចិត្តយ៉ាងខ្លាំងដែលស្វាមីរបស់អ្នកស្រី និងអ្នកទោសនយោបាយដទៃទៀតពុំមានឈ្មោះក្នុងបញ្ជីបន្ធូរបន្ថយទោស និងលើកលែងទោស ដូចអ្នកទោសដទៃទៀតនៅក្នុងព្រះរាជពិធីបុណ្យអុំទូក និងបុណ្យឯករាជ្យជាតិ។ អ្នកស្រី ព្រំ ចាន់ថា បានចាត់ទុកករណីនេះ ថាជារឿងអយុត្តិធម៌បំផុតសម្រាប់អ្នកទោសនយោបាយ ដែលគេចោទប្រកាន់ និងចាប់ដាក់គុកទាំងដែលគ្មានកំហុស។
ស្រ្តីថ្ងៃសុក្ររូបនេះបញ្ជាក់ថា នឹងធ្វើការតវ៉ាទាមទារឲ្យដោះលែងស្វាមីរបស់ពួកគេបន្តទៀត ដោយមិនទម្លាក់ដៃចុះឡើយ ក៏ប៉ុន្តែការតវ៉ានឹងចាប់ផ្ដើមនៅពេលណានោះអ្នកស្រីមិនបានកំណត់ឡើយ។ ក្រៅពីតវ៉ា អ្នកស្រី ព្រំ ចាន់ថា បានគូសបញ្ជាក់ថា ពួកគេក៏គ្រោងស្នើតាមបណ្ដាអង្គទូតប្រទេសប្រជាធិបតេយ្យនានានៅកម្ពុជា ឲ្យមានកិច្ចអន្តរាគមន៍ទៅរដ្ឋាភិបាល ដើម្បីស្នើឲ្យមានការដោះលែងស្វាមី និងអ្នកទោសនយោបាយដែរ។ បើតាមអ្នកស្រី ព្រំ ចាន់ថា បើមានការដោះលែងអ្នកទោសនយោបាយ នោះរដ្ឋាភិបាលនឹងចំណេញ។
សូមបញ្ជាក់ថា នៅក្នុងពិធីបុណ្យឯករាជ្យជាតិ និងព្រះរាជពិធីបុណ្យអុំទូក ឆ្នាំ២០២៣ មានទណ្ឌិតចំនួន៥៣៨នាក់ត្រូវបានលើកលែង និងបន្ថយទោសពីព្រះមហាក្សត្រ។ ប៉ុន្តែអ្នកនយោបាយប្រឆាំងដែលកំពុងជាប់ទោស គឺមិនស្ថិតក្នុងចំណោមទណ្ឌិតដែលត្រូវបានលើកលែង និងបន្ថយទោសនៅពេលនេះឡើយ។
បើតាមអ្នកស្រី ព្រំ ចាន់ថា គិតមកទល់ពេលនេះស្វាមីអ្នកស្រី និងអ្នកទោសនយោបាយដទៃទៀត បានជាប់ទោសនៅក្នុងពន្ធនាគារប្រមាណជិត ៤ឆ្នាំមកហើយ គិតចាប់តាំងពីថ្ងៃចាប់ខ្លួន។ ស្វាមីអ្នកស្រី និងអ្នកទោសនយោបាយដទៃទៀត ត្រូវតុលាការកម្ពុជាកាត់ទោស និងឃុំខ្លួនក្នុងពន្ធនាគារចន្លោះពី៣ទៅ៧ឆ្នាំ ក្រោមបទចោទប្រកាន់ «ញុះញង់ និងរួមគំនិតក្បត់» ពាក់ព័ន្ធនឹងព្រឹត្តិការណ៍វិលចូលប្រទេសកម្ពុជារបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ