រដ្ឋមន្ត្រីរ៉ែ និងថាមពល៖មានឈ្មួញធំៗឈរពីក្រោយការធ្វើអាជីវកម្មរ៉ែមាសជាលក្ខណៈគ្រួសារ
នៅថ្ងៃទី១៤មករានេះ លោក កែវ រតនៈ រដ្ឋមន្ត្រីក្រសួងរ៉ែនិងថាមពលអះអាងថា មានឈ្មួញធំៗឈរពីក្រោយជួយជ្រោមជ្រែងការធ្វើអាជីវកម្មជីកយករ៉ែមាសជាលក្ខណៈគ្រួសារ នៅភូមិសំពៅពូន ឃុំជាំតាម៉ៅ ស្រុកមេមត់ ខេត្តត្បូងឃ្មុំ។
ចុះផ្សាយនៅថ្ងៃ៖
ស្តាប់ - ០២:៤០
ការលើកឡើងយ៉ាងដូច្នេះរបស់លោក កែវ រតនៈធ្វើឡើង បន្ទាប់ពីភាគីពាក់ព័ន្ធតាំងពីថ្នាក់ជាតិនិងថ្នាក់ក្រោមជាតិបើកយុទ្ធនាការបង្ក្រាបអាជីវកម្មរ៉ែមាសអនាធិបតេយ្យនៅភូមិសំពៅពូន ឃុំជាំតាម៉ៅ ស្រុកមេមត់ ខេត្តត្បូងឃ្មុំ។ នៅក្នុងសេចក្ដីប្រកាសព័ត៌មានរបស់ក្រសួងរ៉ែនិងថាមពលកាលពីថ្ងៃទី១០ខែមករា សកម្មភាពធ្វើអាជីវកម្មរ៉ែបែបអនាធិបតេយ្យលើតំបន់មួយ នេះនៅតែបន្តកើតមាន។
តាមសេចក្តីប្រកាសព័ត៌មានដដែល ការធ្វើអាជីវកម្មរ៉ែមាសធ្វើដោយដៃបែបលក្ខណៈគ្រួសារនៅ តំបន់នោះ បានកើត មាន តាំង ពី ឆ្នាំ១៩៩០។ ប៉ុន្តែប៉ុន្មានឆ្នាំចុងក្រោយនេះ ទម្លាប់ពីបុរាណមានការផ្លាស់ប្ដូរគួរឲ្យបារម្ភ និងបង្កផលប៉ះពាល់យ៉ាងខ្លាំងដល់បរិស្ថាន និងសុវត្ថិភាពមនុស្ស។ លោករដ្ឋមន្ត្រីបានអះអាងបន្ថែម ថា ស្ថានភាពនៅមេមត់មិនមែនជាការធ្វើអាជីវកម្មរ៉ែជាលក្ខណៈគ្រួសារទេ តែមានអ្នកមានលុយឈរពីក្រោយ និងថា ប្រសិនបើធ្វើជាលក្ខណៈគ្រួសារមែនក្រសួងនឹងផ្ដល់អាជ្ញាបណ្ណស្របច្បាប់ក្នុងការធ្វើអាជីវកម្ម ជំនួយបច្ចេកទេស និងឱវាទក្នុងការការពារបរិស្ថាន។
តាមរដ្ឋមន្ត្រីក្រសួងរ៉ែនិងថាមពលរូបនេះដដែល សកម្មភាពរុករ៉ែបែបអនាធិបតេយ្យក្នុងភូមិសំពៅពូន ឃុំជាំតាម៉ៅ ស្រុកមេមត់នេះ នាំឲ្យមានការខាតបង់ទ្រព្យសម្បត្តិនិងចំណូលជាតិ ពិសេសប៉ះពាល់ធ្ងន់ធ្ងរដល់បរិស្ថានដែលបង្កជាហានិភ័យខ្ពស់ដល់សុខភាពនិងសុវត្ថិភាពប្រជាពលរដ្ឋក្នុងនិងក្រៅមូលដ្ឋាន។
នៅចំពោះមុខទង្វើនេះ រដ្ឋមន្ត្រីប្ដេជ្ញាបញ្ចប់សកម្មភាពរុករករ៉ែអនាធិបតេយ្យ និងជំរុញឲ្យមានការធ្វើអាជីវកម្មស្របច្បាប់ដែលនឹងហុចប្រយោជន៍មួយចំនួនដូចជាការផ្ដល់ការងារដោយផ្ទាល់ និងដោយផ្ទាល់ បង្កើតប្រភពចំណូលជូនជាតិ រួមទាំង កាត់បន្ថយផលប៉ះពាល់ធ្ងន់ធ្ងរដល់បរិស្ថាន និងសង្គម។
លោក ហេង គឹមហុង ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជាស្វាគមន៍ចំពោះយុទ្ធនាការរបស់ក្រសួងរ៉ែ និងភាគីពាក់ព័ន្ធ។ តាមលោក ហេង គឹមហុង ប្រសិនបើរដ្ឋមានចេតនាគាំទ្រការធ្វើអាជីវកម្មបែបសហគមមូលដ្ឋានក៏គួរតែរៀបចំបែបបទសុវត្ថិភាពដោយបញ្ចៀសការប្រើប្រាស់សារធាតុគីមីច្រើនហួសហេតុ។ តែលោកនៅតែព្រួយបារម្ភចំពោះសកម្មភាពជីកយករ៉ែ ទោះក្នុងរូបភាពស្របច្បាប់ ឬខុសច្បាប់ដែល នាំ ឪ្យ មានផលប៉ះពាល់ផ្នែកបរិស្ថាននិងប្រព័ន្ធអេកូឡូស៊ីដូចគ្នា។
គួរបញ្ជាក់ជូនថា លទ្ធផលនៃការសិក្សាមួយរបស់អង្គការសមធម៌កម្ពុជាក្នុងឆ្នាំ២០២៣បានបង្ហាញថា សាជីវកម្មឧស្សាហកម្មរ៉ែមាសដែលប្រើគ្រឿងយន្តខ្នាតធំ ផ្ដល់ហានិភ័យជាច្រើនដល់ការទន្ទ្រានយកដីធ្លី ការបំផ្លាញបរិស្ថាន សុខភាព និងសុវត្ថិភាព ពិសេសក្នុងចំណោមជនជាតិដើមភាគតិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ