ទិវាសិទ្ធិនារី៖ អង្គការសិទ្ធិមនុស្សស្នើដោះលែងស្រ្តីជាសកម្មជន២រូប
ស្ត្រីជាសកម្មជន២រូបត្រូវបានរំលេចឡើងដោយអង្គការសិទ្ធិមនុស្ស ដើម្បីប្រារព្ធទិវាសិទ្ធិនារីអន្តរជាតិ៨មីនានៅឆ្នាំ២០២៤នេះ។ នៅក្នុងការប្រារព្ធទិវានារីអន្តរជាតិឆ្នាំ២០២៤ មជ្ឈមណ្ឌលសិទ្ធិមនុស្សកម្ពុជា បានបង្ហាញនូវរឿងរ៉ាវរបស់ កញ្ញា សេង ធារី មេធាវីខ្មែរសញ្ជាតិអាមេរិក ដែលត្រូវបានអង្គការសិទ្ធិមនុស្ស ចាត់ទុកថា ជាប់ពន្ធនាគារ ដោយសារតែសកម្មភាពសិទ្ធិមនុស្ស។ ចំណែក កញ្ញា ឈឹម ស៊ីថរ ប្រធានសហជីពប្រចាំក្រុមហ៊ុនណាហ្គាវើលដ៍ ត្រូវបានអង្គការសិទ្ធិមនុស្ស ចាត់ទុកថា ជាប់ពន្ធនាគារដោយសារតែសកម្មភាពការពារសហជីព។
ចុះផ្សាយនៅថ្ងៃ៖
ស្តាប់ - ០២:២៨
នៅក្នុងការប្រារព្ធទិវានារីអន្តរជាតិឆ្នាំ២០២៤ មជ្ឈមណ្ឌលសិទ្ធិមនុស្សកម្ពុជាអំពាវនាវឱ្យដោះលែង និងទម្លាក់ចោលបទចោទប្រឆាំងនឹងស្ត្រីជាសកម្មទាំងនោះ ជាបន្ទាន់ ព្រមទាំងបញ្ចប់រាល់ទម្រង់នៃការយាយីទៅលើពួកគេ និងបញ្ឈប់ការយាយីទៅលើអ្នកមានសំឡេងមិនស្រប។
បើតាមអង្គការដដែលនេះ កញ្ញា សេង ធារី ដែលត្រូវបានកាត់ទោស៦ឆ្នាំពីបទរួមគំនិតក្បត់ និងញុះញង់នោះ គឺដោយសារតែគាត់ប្រកាសគាំទ្រការវិលចូលស្រុករបស់លោក សម រង្ស៊ី កាលពីឆ្នាំ២០១៩។
មេធាវីខ្មែរសញ្ជាតិអាមេរិកាំងរូបនេះ ត្រូវបានតុលាការកម្ពុជាបើកសវនាការចំនួន២១ដង តាំងពីថ្ងៃទី៦វិច្ឆិកាឆ្នាំ២០២០ ដល់ថ្ងៃទី៣ ឧសភា ឆ្នាំ២០២២ ។ សវនាការច្រើនដងបែបនេះ ត្រូវបានអង្គការសិទ្ធិមនុស្សចាត់ទុកថា ជាសវនាការទ្រង់ទ្រាយធំលើសមាជិក និងអ្នកគាំទ្រអតីតគណបក្សសង្គ្រោះជាតិ៥០នាក់។
រីឯ កញ្ញា ឈឹម ស៊ីថរ ប្រធានសហជីពនៃអតីតបុគ្គលិកណាហ្កាវើលដ៍ ត្រូវបានតុលាការក្រុងភ្នំពេញ ដាក់ទោសឲ្យជាប់ពន្ធនាគារ២ឆ្នាំ តាមរយៈសាលក្រមថ្ងៃទី២៥ ខែឧសភា ឆ្នាំ២០២៣។ ក្រៅពីកញ្ញា ឈឹម ស៊ីថរ ក៏នៅមានកូដករជាស្រ្តី៦នាក់ទៀត ដែលជាអតីតបុគ្គលិកណាហ្កាវើលដ៍ ក៏ត្រូវជាប់ទោសម្នាក់ៗ១ឆ្នាំ ប៉ុន្តែពួកគេ ត្រូវបានដាក់នៅក្រៅឃុំ។
សូមបញ្ជាក់ថា កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួនលើកទី១ នៅដើមឆ្នាំ២០២២ ហើយប្រមាណ២ខែក្រោមមក សកម្មជនសហជីពរូបនេះ ក៏ត្រូវដោះលែងវិញ។ ប៉ុន្តែ កញ្ញា ឈឹម ស៊ីថរ ត្រូវសមត្ថកិច្ចចាប់ខ្លួនលើកទី២ នៅចុងឆ្នាំ២០២២ បន្ទាប់ពីវិលមកពីប្រទេសអូស្ត្រាលី។ ការចាប់ខ្លួនលើកទី២ ត្រូវបានតុលាកាចោទថា ដោយសារតែ មេដឹកនាំសហជីពរូបនេះ ចេញក្រៅប្រទេសដោយគ្មានការអនុញ្ញាតខណៈតុលាការ ដាក់ឲ្យស្ថិតក្រោមការត្រួតពិនិត្យតាមផ្លូវតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ