ប្រធានសភាអ៊ុយក្រែនសាទរលោក ហ៊ុន សែន និងអរគុណកម្ពុជាដែលថ្កោលទោសរុស្ស៊ី
នៅថ្ងៃព្រហស្បតិ៍ ទី២៥ មេសានេះ ប្រធានព្រឹទ្ធសភាកម្ពុជា លោកហ៊ុន សែន បានបញ្ចេញលិខិតរបស់ប្រធានសភាអ៊ុយក្រែនលោក Ruslan STEFANCHUK។ លិខិតចុះថ្ងៃទី១០ ខែមេសា បានអបអរលោក ហ៊ុន សែន ក្រោយលោកត្រូវបានបោះឆ្នោតជ្រើសរើសជាប្រធានព្រឹទ្ធសភាកម្ពុជាអាណត្តិទី៥។ តែនៅក្នុងលិខិតដដែល ប្រធានរដ្ឋសភាអ៊ុយក្រែនមិនភ្លេចអរគុណកម្ពុជា ដែលបានគាំទ្រអ៊ុយក្រែននៅក្នុងសង្គ្រាមឈ្លានពានរបស់រុស្ស៊ី។
ចុះផ្សាយនៅថ្ងៃ៖
ស្តាប់ - ០១:៤១
តាមរយៈលិខិតមួយច្បាប់ផ្ញើជូនប្រធានព្រឹទ្ធសភាកម្ពុជាលោក ហ៊ុន សែន ប្រធានសភាអ៊ុយក្រែនលោក Ruslan STEFANCHUK បានរំលេចថា អ៊ុយក្រែនចងចាំដោយអំណរគុណចំពោះគោលជំហរដោយផ្អែកលើគោលការណ៍របស់លោក ហ៊ុន សែន ស្តីពីការថ្កោលទោសចំពោះការឈា្លនពានរបស់រុស្ស៊ីទៅលើអ៊ុយក្រែន។
តាមលោក Ruslan STEFANCHUK អ៊ុយក្រែនពឹងលើការគាំទ្របន្ថែមទៀតនូវកិច្ចខិតខំប្រឹងប្រែងរបស់អន្តរជាតិ ដើម្បីស្តារឡើងវិញនូវសន្តិភាពប្រកបដោយយុត្តិធម៌នៅអ៊ុយក្រែន និងធានាស្ថិរភាពនៅលើពិភពលោក។ បន្ថែមពីការអបអរសាទរដល់តួនាទីរបស់លោក ហ៊ុន សែន ជាប្រធានព្រឹទ្ធសភាកម្ពុជាអាណត្តិថ្មីលោក Ruslan STEFANCHUK ក៏បានអញ្ជើញលោក ហ៊ុន សែន ឲ្យទៅធ្វើទស្សនកិច្ចនៅអ៊ុយក្រែនដែរ។
សូមរំលឹកថា ក្រោយការផ្ទុះសង្គ្រាមឈ្លានពានរបស់រុស្ស៊ីលើអ៊ុយក្រែនកាលពីថ្ងៃទី២២ ខែកុម្ភៈ ឆ្នាំ២០២២ ប្រទេសកម្ពុជាបានបោះឆ្នោតថ្កោលទោសរុស្ស៊ីចំនួន២ដង ក្នុងនោះ កម្ពុជាក៏បានចូលរួមជាប្រទេសគាំទ្រការផ្តួចផ្តើមសេចក្តីសម្រេចរបស់អង្គការសហប្រជាជាតិ(co-sponsors) ទៀតផង។ ក្រៅពីនេះ កម្ពុជាក៏បានបោះឆ្នោតអនុបវាទចំពោះសំណើរបស់សហរដ្ឋអាមេរិកសុំព្យួររុស្ស៊ីពីក្រុមប្រឹក្សាសិទ្ធិមនុស្សរបស់អង្គការសហប្រជាជាតិ។
ទោះជាយ៉ាងណា ការជាប់ឆ្នោតជាប្រធានព្រឹទ្ធសភារបស់លោក ហ៊ុន សែន ក៏ត្រូវបានអបអរដោយលោកស្រី VALENTINA MATVIENKO ប្រធានក្រុមប្រឹក្សាសហព័ន្ធនៃសភាសហព័ន្ធរុស្ស៊ីកាលពីដើមខែមេសានេះដែរ។ នៅក្នុងសារអបអរ ប្រធានស្ថាប័ននីតិបញ្ញត្តិរុស្ស៊ីបានលើកឡើងនូវខ្លឹមសារការទូតនៃទំនាក់ទំនងមិត្តភាពរវាងប្រទេសទាំងពីរ កម្ពុជា-រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ