លោកបៃដិនមានឥទ្ធិពលធ្វើឲ្យអារ៉ាប៊ីសាអូឌីតទន់ភ្លន់ជាងមុនដាក់ក្រុមអ្នកប្រឆាំង?
ចុះផ្សាយនៅថ្ងៃ៖
ស្តាប់ - ០៤:៥៨
ក្រោយពេលដែលលោកចូ បៃដិន ឡើងក្លាយជាម្ចាស់សេតវិមានថ្មីរបស់សហរដ្ឋអាមេរិក ប្រទេសអារ៉ាប៊ីសាអូឌីត ចាប់ផ្តើមបញ្ចេញឫកពាប្លែកដោយប្រញាប់ប្រញាល់ដោះលែងអ្នកទោសនយោបាយមួយចំនួន និងបន្ធូរបន្ថយទំនាក់ទំនងតានតឹងជាមួយក្រុមប្រទេសដែលជាគូបដិបក្ខ។ តើការផ្លាស់ប្តូរជំហរនយោបាយរបស់អារ៉ាប៊ីសាអូឌីតបែបនេះ កើតឡើងដោយសារតែរងឥទ្ធិពលរបស់លោកចូ បៃដិនឬ?
អារ៉ាប៊ីសាអូឌីត ចេះបត់បែនតាមកាលៈទេសៈ
រដ្ឋបាលអាមេរិកថ្មីរបស់លោកចូ បៃដិន ពុំអនុវត្តឡើយនយោបាយការបរទេសស្និទ្ធស្នាលល្អឺនល្អិនខ្លាំងនិងតាមគាំទ្រការពារអារ៉ាប៊ីសាអូឌីតផ្កាប់មុខដូចរដ្ឋបាលចាស់របស់លោកដូណាល់ ត្រាំ។
តាំងពីអំឡុងពេលធ្វើយុទ្ធនាការបោះឆ្នោតមកម្ល៉េះ លោកបៃដិន បានសន្យាបញ្ឈប់គោលនយោបាយការបរទេសខ្ជីខ្ជារបស់អាមេរិកនៅមជ្ឈិមបូព៌ា។ ជាគោលនយោបាយការទូតខ្ជីខ្ជារយៈពេល ៤ឆ្នាំ ដែលលោកចង់សំដៅដល់ក្នុងអំឡុងអាណត្តិដឹកនាំរបស់លោកអតីតប្រធានាធិបតីត្រាំ។
នៅក្នុងសេចក្តីថ្លែងការណ៍ផ្លូវការមួយនាពេលថ្មីៗនេះ ទីក្រុងវ៉ាស៊ីនតោនបានហៅអារ៉ាប់ប៊ីសាអូឌីតថាជាដៃគូសន្តិសុខ ជំនួសឲ្យអ្វីដែលរដ្ឋបាលលោកត្រាំធ្លាប់តែហៅពេញៗមាត់ថាជាសម្ព័ន្ធមិត្ត និងជាអតិថិជនទិញអាវុធដ៏សំខាន់របស់សហរដ្ឋអាមេរិក។
ក្រុមអ្នកសង្កេតការណ៍បាននិយាយថាការហៅទីក្រុងរីយ៉ាដថាជាដៃគូសន្តិសុខបែបនេះ មានន័យថា អាមេរិករបស់លោកចូ បៃដិន កំពុងបែរងាកចេញពីទំនាក់ទំនងចាក់ទឹកមិនលេចជាមួយ អារ៉ាប់ប៊ីសាអូឌីត នៅចំពេលដែលអាមេរិកកំពុងពិនិត្យសើរើមើលការលក់អាវុធទៅប្រទេសអារ៉ាប់មួយនេះ។
ក្នុងនាមជាប្រធានាធិបតីអាមេរិកមកពីគណបក្សប្រជាធិបតេយ្យ បញ្ហាសិទ្ធិមនុស្សក៏ជាចំណុចអាទិភាពមួយដែររបស់លោកចូ បៃដិន។ ដោយពិនិត្យពិច័យលើបញ្ហាសិទ្ធិមនុស្សនេះ គេរំពឹងផងដែរថា មេដឹកនាំអាមេរិករូបនេះ នឹងថែរក្សាភាពជាដៃគូសន្តិសុខដ៏មានតម្លៃ ខណៈពេលដែលប្រទេសអាមេរិកកំពុងងាកទៅពិភាក្សាឡើងវិញអំពីកិច្ចព្រមព្រៀងនុយក្លេអ៊ែរ ជាមួយប្រទេសអ៊ីរ៉ង់ ដែលជាសត្រូវធំរបស់អារ៉ាប៊ីសាអូឌីត។
អារ៉ាប៊ីសាអូឌីត បន្ទន់ឥរិយាបថទៅរកលោកចូ បៃដិន
ប្រឈមនឹងផែនការថ្មីរបស់អាមេរិកាំង ក្នុងការភ្ជាប់ទំនាក់ទំនងថ្មីជាមួយអ៊ីរ៉ង់ និងក្នុងការពិនិត្យឡើងវិញអំពីទំនាក់ទំនងរវាងសហរដ្ឋអាមេរិកនិងអារ៉ាប៊ីសាអ៊ូឌីត ដោយផ្តោតលើគុណតម្លៃជាសំខាន់នោះ ទីក្រុងរីយ៉ាដជៀសមិនរួចឡើយពីត្រូវបត់បែនគោលជំហររបស់ខ្លួនតាមកាលៈទេសៈដែលតម្រូវ។
នៅមួយរយៈពេលចុងក្រោយនេះ គេឃើញអាជ្ញាធរក្រុងរីយ៉ាដបានសម្រេចដោះលែងក្រុមអ្នកទោសនយោបាយមួយចំនួន ដែលក្នុងនោះរួមផងដែរសកម្មជនទាមទារសិទ្ធិស្ត្រីម្នាក់ឈ្មោះថា លូចាអ៊ីន ថាហ្សលូល(Loujain al-Hathloul)។
សកម្មជនរូបនេះគឺជាស្ត្រីដែលមានកិត្តិសព្ទល្បីល្បាញខ្លាំងក្នុងការចេញទាមទារសិទ្ធិសេរីភាពឲ្យស្ត្រីអារ៉ាប៊ីសាអូឌីតមានសិទ្ធិបើកបរ និងអាចទៅណាមកណាដោយខ្លួនឯងបាន។ ក្រុមអ្នកវិភាគយល់ឃើញថា ពាក្យសម្តីរបស់លោកចូ បៃដិន ពីការផ្លាស់ប្តូរនយោបាយការបរទេសជាមួយអារ៉ាប៊ីសាអូឌីត គឺជាកត្តារួមចំណែកយ៉ាងច្រើនបង្កើតឲ្យមានការដោះលែងសកម្មជនស្ត្រីរូបនេះ កាលពីសប្តាហ៍មុន។
ក្រៅពីនេះ ដើម្បីឆ្លើយតបទៅនឹងការកំណត់នយោបាយការទូតថ្មីរបស់វ៉ាស៊ីនតោន ទីក្រុងរីយ៉ាដ ក៏បានបង្ហាញផងដែរពីចេតនាចូលរួមដោះស្រាយជម្លោះនៅក្នុងតំបន់។ នេះ គឺជាប្រសាសន៍របស់អ្នកស្រី គ្រីស្ទីន ឌីវ៉ាន (Kristin Diwan) អ្នកជំនាញនៃវិទ្យាស្ថានរដ្ឋឈូងសមុទ្រអារ៉ាប់នៅក្នុងវ៉ាស៊ីនតោននៃសហរដ្ឋអាមេរិក។
ដើម្បីពង្រឹងតួនាទីរបស់ខ្លួននៅក្នុងយុគសម័យថ្មីនេះ កាលពីខែដើមមករា ឆ្នាំ ២០២១ កន្លងទៅ អារ៉ាប់ប៊ីសាអូឌីតបានដឹកនាំសម្ព័ន្ធមិត្តរបស់ខ្លួនដើម្បីបញ្ចប់ជម្លោះដ៏ជូរចត់រយៈពេល ៣ ឆ្នាំជាមួយប្រទេសក្បែរខាងកាតា។
មួយវិញទៀត រាជាណាចក្រមួយនេះ ក៏ចង់កាត់បន្ថយផងដែរទំនាក់ទំនងតានតឹងជាមួយ តួកគី បន្ទាប់ពីបានធ្វើពហិការមិនទិញទំនិញរបស់តួកគីជាសាធារណៈកាលពីឆ្នាំមុន ដោយសារតែមិនត្រូវរ៉ូវគ្នា ពាក់ព័ន្ធករណីសម្លាប់អ្នកកាសែតអារ៉ាប៊ីសាអូឌីតលោកហ្សាម៉ាល់ ខាស្ហូហ្ស៊ី នៅក្នុងស្ថានកុងស៊ុលអារ៉ាប៊ីសាអូឌីត ក្នុងទីក្រុងអ៊ីស្តង់ប៊ុល កាលពីខែតុលា ឆ្នាំ ២០១៨។
អ្នកស្រី គ្រីស្ទីន ឌីវ៉ាន អ្នកជំនាញខាងកិច្ចការនយោបាយនិងទំនាក់ទំនងអន្តរជាតិបានមានប្រសាសន៍ថា កំណត់សម្គាល់ដែលទើបរៀបរាប់ខាងលើ អំពីគោលជំហរនយោបាយថ្មីៗខុសពីមុនរបស់អារ៉ាប៊ីសាអូឌីត បង្ហាញពីភាពបត់បែនថ្មីរបស់ប្រទេសនេះ។
ជារួមមក ការផ្លាស់ប្តូរជំហរនយោបាយដោយងាកទៅប្រញាប់ញាល់ដោះលែងអ្នកទោសនយោបាយមួយចំនួន និងបែរទៅបន្ធូរបន្ថយទំនាក់ទំនងតានតឹងជាមួយក្រុមប្រទេសដែលជាគូបដិបក្ខ ស្របទៅតាមការចង់បានរបស់សហគមន៍អន្តរជាតិ គឺជាសញ្ញាបញ្ជាក់ប្រាប់ថា ទោះជាយ៉ាងណាក្តី អារ៉ាប៊ីសាអូឌីត នៅទីបំផុតទៅ ងក់ក្បាលយល់ព្រមទៅកាន់លោកចូ បៃដិន ដែលជាមេដឹកនាំអាមេរិកថ្មី។
ដូច្នោះហើយ គេអាចសន្និដ្ឋានបានថា នយោបាយការបរទេសថ្មីរបស់សហរដ្ឋអាមេរិកក្រោមអាណត្តិដឹកនាំរបស់លោកចូ បៃដិន ចំពោះពិភពលោក ក៏ដូចជាតំបន់មជ្ឈិមបូព៌ា ពិតជាមានឥទ្ធិពលអាចធ្វើឲ្យអារ៉ាប៊ីសាអូឌីត ផ្លាស់ប្តូរគោលនយោបាយទន់ភ្លន់ជាងមុន ចំពោះក្រុមអ្នកប្រឆាំងនៅក្នុងប្រទេស ក៏ដូចជាជាមួយបណ្តាប្រទេសដែលជាគូបដិបក្ខមួយចំនួនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ