រដ្ឋបាលលោកចូ បៃដិនប្រកាសសើរើនយោបាយអាមេរិកសម្រាប់តំបន់ដើមបូព៌ា
ចុះផ្សាយនៅថ្ងៃ៖
ស្តាប់ - ០៧:២១
រដ្ឋបាលលោកចូ បៃដិនបានប្រកាស កាលពីថ្ងៃពុធថា នឹងសើរើ មើលឡើងវិញ រាល់នយោបាយអាមេរិក ចំពោះ តំបន់ដើមបូព៌ា ដែលមានតាំងពីអ៊ីស្រាអែល ប៉ាឡេស្ទីន ទំនាក់ទំនងអាមេរិក ជាមួយប្រទេសអារ៉ាប់ នៅឈូងសមុទ្រពែរ្ស និងសំណុំរឿងនុយក្លេអ៊ែរអ៊ីរ៉ង់។ នៅពេលកិច្ចព្រមព្រៀងអន្តរជាតិស្តីពីនុយក្លេអ៊ែរអ៊ីរ៉ង់ ជាសំណុំរឿងអាទិភាពរបស់រដ្ឋបាលអាមេរិកថ្មី ប្រមុខការបរទេសអាមេរិក លោក Anthony Blinken បានសន្យាពិនិត្យសើរើឡើងវិញ ការសម្រេចចិត្តរបស់រដ្ឋបាលមុន នៅក្នុងការគាំទ្រផ្នែកយោធា ដល់បណ្តាប្រទេសអារ៉ាប់ ជាពិសេស អារ៉ាប៊ី សាអូឌីត នៅក្នុងសង្រ្គាមនៅ ប្រទេសយេម៉ែន។
បន្ទាប់ពី លោកដូណាល់ ត្រាំ ក្រឡាប់ចាក់ចោលកិច្ចប្រឹងប្រែងរបស់រដ្ឋបាលលោកអូបាម៉ា ដោយដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ នៅ ឆ្នាំ ២០១៨ លោកចូ បៃដិន ពេលនេះ ចង់ត្រលប់ទៅ ស្តារឡើងវិញ សមិទ្ធិផលរបស់រដ្ឋបាលលោកអូបាម៉ា ដែលមានលោកធ្លាប់ធ្វើជាអនុប្រធានាធិបតី។
លោកចូ បៃដិន ធ្លាប់បានវាយតម្លៃថា អ្វីដែលគេត្រូវធ្វើមុនគេបង្អស់ គឺស្រោចស្រង់ កិច្ចព្រមព្រៀងនុយក្លេអ៊ែរអ៊ីរ៉ង់ ដើម្បី ជៀសវាងកុំឲ្យអ៊ីរ៉ង់មានបំពាក់អាវុធនុយក្លេអ៊ែរ។
នៅក្រោយ លោកដូណាល់ ត្រាំ បានដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ នៅឆ្នាំ ២០១៨ លោកដូណាល់ ត្រាំ បានត្រលប់ទៅដាក់ទណ្ឌកម្មសេដ្ឋកិច្ចធ្ងន់ធ្ងរលើអ៊ីរ៉ង់ រហូតធ្វើឲ្យអ៊ីរ៉ង់ បានប្រកាស លែងគោរពធ្វើតាមកិច្ចព្រមព្រៀង ជាបន្តបន្ទាប់ ដូចជា បានត្រលប់ទៅចម្រើនសារធាតុអ៊ុយរ៉ាញ៉ូម ក្នុងកម្រិតខ្ពស់ និងក្នុងបរិមាណច្រើនជាង កាលកំណត់ នៅក្នុងកិច្ចព្រមព្រៀងជាដើម។
នៅថ្ងៃពុធ រដ្ឋមន្រ្តីការបរទេសថ្មី របស់អាមេរិក លោកអង់តូនី ប្លីងកិន បានបញ្ជាក់ថា អនាគតនៃកិច្ចព្រមព្រៀងស្តីពីនុយក្លេអ៊ែរជាសំណុំរឿងអាទិភាពរបស់រដ្ឋបាលថ្មី ប៉ុន្តែ អាមេរិកនៅរង់ចាំមើលការផ្លាស់ប្តូរឥរិបថ របស់អ៊ីរ៉ង់ ជាមុនសិន។ អាមេរិក នឹងបោះជំហានទៅមុខ ជាមួយអ៊ីរ៉ង់ បើសិនអ៊ីរ៉ង់ ត្រលប់មកគោរពសាជាថ្មី លក្ខខណ្ឌ ដែលមានចែងនៅក្នុងកិច្ចព្រមព្រៀង។ ប៉ុន្តែ នៅពេល អ៊ីរ៉ង់ បានរំលោភចំណុចជាច្រើន នៅក្នុងកិច្ចព្រមព្រៀងយ៉ាងដូច្នេះ អាមេរិកក៏ត្រូវការពេលវេលាច្រើន មុននឹងពិចារណា សម្រេចចិត្តមកចរចាណាមួយ ជាមួយអ៊ីរ៉ង់។ បើស្តាប់តាមពាក្យរបស់ប្រមុខការបរទេសអាមេរិក រឿងអាមេរិកត្រលប់ទៅចូលក្នុងកិច្ចព្រមព្រៀងនុយក្លេអ៊ែរ គឺជារឿងដែលនៅវែងឆ្ងាយ មិនទាន់អាចធ្វើបានភ្លាម នៅពេលនេះទេ។
សូមបញ្ជាក់ថា កិច្ចព្រមព្រៀងអន្តរជាតិស្តីពីនុយក្លេអ៊ែរអ៊ីរ៉ង់ នៅ ឆ្នាំ ២០១៥ ដែលចុះហត្ថលេខាដោយអ៊ីរ៉ង់ និងប្រទេសមហាអំណាចចំនួន ៥ អាមេរិក រុស្ស៊ី ចិន បារាំង អង់គ្លេស រួមទាំងអាល្លឺម៉ង់ អ៊ីរ៉ង់មានគោលដៅហាមឃាត់អ៊ីរ៉ង់មិនឲ្យមានសមត្ថភាពផលិតអាវុធនុយក្លេអ៊ែរ ជាថ្នូរនឹងការដកទណ្ឌកម្មសេដ្ឋកិច្ចអន្តរជាតិ និងទណ្ឌកម្មរបស់អាមេរិក។
រដ្ឋបាលអាមេរិកថ្មី សើរើ នយោបាយ គាំទ្រផ្នែកយោធា ប្រទេសអារ៉ាប់ នៅ ឈូងសមុទ្រពែរ្ស ដែលធ្វើឡើង នៅក្នុងរដ្ឋបាលមុន
នៅ សប្តាហ៍មុន នៅមុនចូលកាន់តំណែងជារដ្ឋមន្រ្តីការបរទេសអាមេរិល លោកអង់តូនី ប្លីងកិនធ្លាប់បានសន្យាហើយថា នឹងបិទបញ្ចប់ការគាំទ្ររបស់អាមេរិកសម្រាប់ សម្ព័ន្ធយោធា ដឹកនាំដោយអារ៉ាប៊ី សាអូឌីត ដែលកំពុងធ្វើសង្រ្គាម នៅប្រទេសយេម៉ែន។ សម្រាប់ប្រមុខការបរទេសអាមេរិក ប្រតិបត្តិការយោធាដឹកនាំដោយអារ៉ាប៊ីសាអូឌីត រួមជាមួយអេមីរ៉ា អារ៉ាប់រួម បានសម្លាប់ប្រជាជនស៊ីវិល យេម៉ែន និងបង្កឲ្យមានវិបត្តិមនុស្សធម៌ដ៏ធ្ងន់ធ្ងរមិនធ្លាប់មាន នៅក្នុងពិភពលោក។
នៅក្នុងពេលសើរើឡើងវិញ ដើម្បី បញ្ជាក់ថា ការលក់អាវុធអាមេរិក សមស្របនឹងយុទ្ធសាស្រ្តរបស់អាមេរិកដែរឬទេ នោះ រដ្ឋមន្រ្តីការបរទេសអាមេរិក បានសម្រេច ព្យួរ ការលក់អាវុធ ទៅឲ្យអារ៉ាប៊ី សាអូឌីត និងផ្អាក បណ្តោះអាសន្ន កិច្ចសន្យាលក់យន្តហោះចម្បាំង F 35 ចំនួន ៥០គ្រឿង ទៅអេមីរ៉ា អារ៉ាប់រួម។
ការសើរើទំនាក់ទំនងយោធាជាមួយ បណ្តាប្រទេសអារ៉ាប់ នឹងប៉ះពាល់ដល់ផលប្រយោជន៍របស់អារ៉ាប៊ី សាអូឌីត ហើយនិងអ៊ីស្រាអែល ដែលជាសម្ព័ន្ធមិត្តរបស់អាមេរិក សម្រាប់ប្រឈមទប់ទល់នឹងឥទ្ធិពលរបស់អីរ៉ង់ ក្នុងតំបន់។ ត្រូវដឹងថា ការដែលរដ្ឋបាលលោកដូណាល់ ត្រាំដើរផ្ទុយនយោបាយអាមេរិកចាស់ ដោយយល់ព្រម លក់យន្តហោះចម្បាំង ទៅឲ្យអេមីរ៉ា អារ៉ាប់រួម ក៏ព្រោះតែ អាមេរិក ចង់ឲ្យ អេមីរ៉ា អារ៉ាប់ រួម ចងស្ពានមេត្រី បង្កើតទំនាក់ទំនងធម្មតា ជាមួយអ៊ីស្រាអែល។
អាមេរិកត្រលប់ទៅផ្តល់ជំនួយដល់ប្រជាជនប៉ាឡេស្ទីន
សំណុំរឿង អ៊ីស្រាអែល ប៉ាឡេស្ទីន នឹងជួបរបត់នយោបាយថ្មីដែរ នៅក្នុងអាណត្តិរបស់លោកចូ បៃដិន។ គ្រាន់តែចូលដឹកនាំអាមេរិកបានប៉ុន្មានថ្ងៃ រដ្ឋបាលលោកដូណាល់ ត្រាំ បានប្រកាស គាំទ្រ ដំណោះស្រាយ រដ្ឋពីរ ជិតគ្នា អ៊ីស្រាអែល ប៉ាឡេស្ទីន។ ដំណោះស្រាយ នេះ នឹងប៉ះទង្គិចដល់នយោបាយរបស់អ៊ីស្រាអែល ដែលបានច្រិបយកដីរបស់ប្រជាជនប៉ាឡេស្ទីន តាមរយៈ ការពង្រីកសំណង់អាណានិគមកិច្ចដោយខុសច្បាប់អន្តរជាតិ នៅ លើទឹកដីប៉ាឡេស្ទីន។
ក្រោមអាណត្តិដឹកនាំរបស់លោកប្រធានាធិបតីចូ បៃដិន អាមេរិក និងអ៊ីស្រាអែល មិនអាចល្អូកល្អឺន ចាក់ទឹកមិនលិចដូចមុននោះទេ។ នៅអាណត្តិមុន អាមេរិក និងអ៊ីស្រាអែល ចុះសម្រុងគ្នាខ្លាំង ព្រោះថា លោកដូណាល់ ត្រាំ បានធ្វើនយោបាយ ច្រើនដើម្បីបំពេញចិត្តក្រុមស្តាំនិយមជ្រុល ដូចជា សម្រេចរើ ស្ថានទូតអាមេរិកទៅ នៅជេរូសាឡឹម បើទោះមានកំហឹងសម្បាររបស់ប្រជាជនប៉ាឡេស្ទីន ហើយនិងការរិះគន់ពីមតិអន្តរជាតិ។
ប៉ុន្តែ សួរថា តើលោកចូ បៃដិន នឹងដកស្ថានទូត អាមេរិកចេញពី ជេរូសាឡឹម មកវិញ ហើយនិងឈប់ធ្វើនយោបាយ ជំរុញឲ្យអ៊ីស្រាអែល ចងសម្ព័ន្ធភាពជាមួយ ប្រទេសអារ៉ាប់។ ចម្លើយនោះ គឺទេ។ អាមេរិកនឹងបន្តរក្សានយោបាយរបស់រដ្ឋបាលមុនសម្រាប់អ៊ីស្រាអែល ពោលគឺនឹងរក្សាស្ថានទូតខ្លួននៅជេរូសាឡឹមដដែល និងជំរុញឲ្យប្រទេសអារ៉ាប់ ជាច្រើន ចងស្ពានមេត្រី ទំនាក់ទំនងជាមួយអ៊ីស្រាអែល ដែលអាមេរិកយល់ថា នឹងមិនប៉ះពាល់ទៅដល់ដំណើរការចរចាសន្តិភាព អ៊ីស្រាអែល ប៉ាឡេស្ទីននោះទេ។
រដ្ឋបាលរបស់លោកចូ បៃដិន នឹងមិនសូវផ្លាស់ប្តូរច្រើននយោបាយអាមេរិក សម្រាប់អ៊ីស្រាអែល ប៉ុន្តែ ក៏មិនលើកតម្កើងអ៊ីស្រាអែលខ្លាំង ដូចអាណត្តិរបស់លោកដូណាល់ ត្រាំ រហូតដល់ថ្នាក់ភ្លេចប្រជាជនប៉ាឡេស្ទីនដែរ។ នៅសប្តាហ៍នេះ ឯកអគ្គរដ្ឋទូតអាមេរិកនៅ អង្គការសហប្រជាជាតិ បានប្រកាសថា អាមេរិកនឹងត្រលប់ទៅផ្តល់ជំនួយ សាជាថ្មី សម្រាប់ប្រជាជនប៉ាឡេស្ទីន បន្ទាប់ពី លោកដូណាល់ ត្រាំ បានកាត់ផ្តាច់ ជំនួយ ជាង ៣៦០លានដុល្លារ ដល់គម្រោងអង្គការសហប្រជាជាតិសម្រាប់ ជួយប្រជាជនប៉ាឡេស្ទីន។ អាមេរិកគ្រោងនឹងអនុញ្ញាតឲ្យបើកឡើងវិញផងដែរ ការិយាល័យ ប៉ាឡេស្ទីននៅ វ៉ាស៊ីនតោន ដែលលោកដូណាល់ ត្រាំ បានបិទក្នុងអាណត្តិ៤ឆ្នាំកន្លងមក ដើម្បី ដាក់សម្ពាធលើប្រជាជនប៉ាឡេស្ទីន។
លោកចូ បៃដិន នឹងត្រលប់ទៅជួយ ប្រជាជនប៉ាឡេស្ទីន ហើយនិងអាចចេញមុខប្រឆាំង សំណង់អាណានិគមកិច្ច អ៊ីស្រាអែល នៅ ទឹកដីប៉ាឡេស្ទីន។ នយោបាយរបស់លោកចូ បៃដិន នៅពេលនេះ គឺដើម្បីស្តារជំនឿទុកចិត្តរបស់ប្រជាជនប៉ាឡេស្ទីន និងដើម្បី បញ្ជាក់ជំហររបស់អាមេរិកថ្មីនៅតំបន់ដើមបូព៌ា ប៉ុន្តែ អាមេរិកនៅមិនទាន់ គិតគូរដល់ថា តើនឹងដោះស្រាយ វិបត្តិទឹកដី ដ៏រ៉ាំរ៉ៃ អ៊ីស្រាអែល និងប៉ាឡេស្ទីន ដោយវិធីណា និងនៅពេលណា នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ