ហេតុអ្វីបានជាក្រុងហ្សេរុយសាឡឹមខាងកើតបន្តចិញ្ចឹមភាពតានតឹងរវាងអ៊ីស្រាអែល និងប៉ាឡេស្ទីន?
ចុះផ្សាយនៅថ្ងៃ៖
ស្តាប់ - ០៤:៥០
ស្ថានការណ៍កំពុងបន្តតានតឹង និងពុះកញ្ជ្រោលខ្លាំងនៅក្នុងទីក្រុងហ្សេរុយសាឡឹមខាងកើត។ អស់ជាច្រើនថ្ងៃកន្លងមក ការប្រឈមមុខដាក់គ្នាយ៉ាងហិង្សាបានផ្ទុះឡើងរវាងប្រជាជនប៉ាឡេស្ទីន និងកម្លាំងទាហានអ៊ីស្រាអែលនៅទីលានវិហារអ៊ីស្លាមដែលប៉ាឡេស្ទីនហៅអាល់ អាសា និងអ៊ីស្រាអែលហៅប្រាសាទភ្នំ។ គិតត្រឹមថ្ងៃចន្ទ ទី១០ ឧសភា អំពើហិង្សាបានបណ្តាលឲ្យរបួសជាង ៣០០នាក់ដែលភាគច្រើនជាប្រជាជនប៉ាឡេស្ទីន។ ប្រឈមនឹងការផ្ទុះហិង្សាថ្មីនេះ មានប្រទេសជាច្រើនបានអំពាវនាវឲ្យមានភាពស្ងប់ស្ងាត់។ ចំណែកក្រុមប្រឹក្សាសន្តិសុខអង្គការសហប្រជាជាតិកោះប្រជុំក្នុងថ្ងៃចន្ទ ទី១០ ឧសភាតាមសំណើរបស់ប្រទេសទុយនីស៊ី។ អ្វីទៅជាដើមចមពិតប្រាកដនៃការផ្ទុះអំពើហិង្សារវាងប៉ាឡេស្ទីន និងអ៊ីស្រាអែលពេលនេះ និងថា តើព្រឹត្តិការណ៍មួយនេះមិនមែនកំពុងឈាមទៅផ្ទុះសង្រ្គាមអ៊ីនទីហ្វាដាជាលើកទី៣ ទេ ឬយ៉ាងណា?។
អំពើហិង្សាដែលកំពុងផ្ទុះឡើងនៅក្នុងទីក្រុងហ្សេរុយសាឡឹមខាងកើតពេលនេះមិនមែនជារឿងថ្មីទេ តែជាភាពច្រំដែលនៃដំណើរវិលចុះវិលឡើងរបស់កង់ប្រវត្តិសាស្រ្តនៅក្នុងតំបន់ដើមបូព៌ា។ បើគេមើលមួយភ្លែតទៅ អំពើហិង្សានាប៉ុន្មានថ្ងៃចុងក្រោយនេះបានកើតមានឡើង ខណៈដែលតុលាការកំពូលអ៊ីស្រាអែលត្រូវបើកសវនាការជំនុំជម្រះនាថ្ងៃចន្ទ ទី១០ ឧសភាលើសំណុំរឿងគ្រួសារប៉ាឡេស្ទីនមួយចំនួនដែលរស់ក្នុងសង្កាត់ Cheikh Jarrah នៃទីក្រុងហ្សេរុយសាឡឹមខាងកើត និងដែលគ្រួសារប៉ាឡេស្ទីនទាំងនេះរងការគំរាមបណ្តេញចេញដើម្បីផ្តល់ទីតាំងនោះទៅឲ្យក្រុមអាណានិគមជនអ៊ីស្រាអែល។
ក្រោមភ្នែក ច្រមុះប៉ាឡេស្ទីន នេះជាទង្វើមួយដែលខ្លួនមិនអាចទទួលយកបានទេ ព្រោះទីកន្លែងដែលគ្រួសារប៉ាឡេស្ទីនកំពុងរស់នៅជាដែនដីរបស់ប៉ាឡេស្ទីន។ នៅទីបំផុត តុលាការកំពូលអ៊ីស្រាអែលបានសម្រេចលើកយកសំណុំរឿងនេះទៅចាត់ការនៅពេលក្រោយវិញ។ តែអំពើហិង្សាហាក់មិនបានស្ងប់ស្ងាត់ទេនាថ្ងៃចន្ទ ទី១០ ឧសភាដែលជាទិវាហ្សេរុយសាឡឹមសម្រាប់អ៊ីស្រាអែល។ ទិវាហ្សេរុយសាឡឹមជាថ្ងៃដែលអ៊ីស្រាអែលបានក្រសោបយកហ្សេរុយសាឡឹមខាងកើតក្នុងសម័យសង្រ្គាម ៦ថ្ងៃកាលពីឆ្នាំ ១៩៦៧។ នេះហើយជាដើមចមមួយក្នុងចំណោមដើមចមពិតផ្សេងទៀតដែលបញ្ជាក់ពីអំពើហិង្សារវាងអ៊ីស្រាអែល និងប៉ាឡេស្ទីននាពេលកន្លងមកក៏ដូចជានៅពេលនេះ។
ចូរកុំភ្លេចថាសព្វថ្ងៃនេះ ហ្សេរុយសាឡឹមទាំងមូលនិយាយជារួម និងហ្សេរុយសាឡឹមខាងកើត និងខាងលិច និយាយដោយឡែកនៅមិនទាន់ជាទីក្រុងផ្លូវការរបស់អ៊ីស្រាអែល ឬប៉ាឡេស្ទីនទេ។ បើនិយាយក្រៅផ្លូវការវិញ ហ្សេរុយសាឡឹមខាងលិចកំពុងស្ថិតក្នុងដៃអ៊ីស្រាអែល ហើយហ្សេរុយសាឡឹមខាងកើតកំពុងត្រូវបានប៉ាឡេស្ទីនបន្តទាមទារយកធ្វើជាអនាគតទីក្រុងសម្រាប់អនាគតរដ្ឋរបស់ខ្លួន។ តែបញ្ហានៅត្រង់ថា រដ្ឋប៉ាឡេស្ទីនស្របច្បាប់មួយដែលប្រជាជនប៉ាឡេស្ទីនសង្ឃឹមមានអស់ជាច្រើនទសវត្សមិនដឹងអាចប្រសូត្របាននៅពេលណាទេ។ ចំណែកទីក្រុងហ្សេរុយសាឡឹមទៀតសោតត្រូវបានអ៊ីស្រាអែលប្រកាសជាឱឡារិក និងក្តែងៗថា ជាទីក្រុងផ្តាច់មុខអមតៈរបស់ខ្លួនដែលមិនអាចពុះចែកបានជាដាច់ខាត មិនថាជាបួនចំណែក ឬជាពីរចំណែកទេ។
ក្រៅពីការប្រទាញប្រទង់ ដណ្តើមទីក្រុងហ្សេរុយសាឡឹម បញ្ហាក៏កំពុងបន្តចោទឡើងជុំវិញខ្សែបន្ទាត់ព្រំដែនសម្រាប់អានាគតរដ្ឋប៉ាឡេស្ទីន ប្រសិនបើអាចបង្កើតបាននៅថ្ងៃណាមួយនោះ។ សម្រាប់ប៉ាឡេស្ទីន និងក្រុមប្រទេសអារ៉ាប់ អនាគតរដ្ឋប៉ាឡេស្ទីននឹងត្រូវកំណត់យកព្រំដែនឆ្នាំ ១៩៦៧ និងយកហ្សេរ៉ុយសាឡិមខាងកើតធ្វើជាទីក្រុង។ តែសំណើនេះត្រូវបានអ៊ីស្រាអែលបន្តបដិសេធយ៉ាងដាច់អហង្ការ។ អ្វីដែលបាន និងកំពុងបន្តកើតមានជាក់ស្តែងនៅពេលនេះ ប៉ាឡេស្ទីនមិនត្រឹមតែនៅមិនទាន់មានរដ្ឋឯករាជ្យមួយប៉ុណ្ណោះទេ តែដែនដីដែលនៅសេសសល់សព្វថ្ងៃក៏ត្រូវបានអ៊ីស្រាអែលច្រឹបយកមួយចង្ងាមម្តងៗតាមរយៈគោលនយោបាយអាណានិគមនិយម។
គួររម្លឹកថា ក្រុងហ្សេរុយសាឡឹមជាទីកន្លែងប្រមូលផ្តុំទៅដោយទីសក្ការៈបូជារបស់សាសនាទាំង៣ គឺសាសនាគ្រឹស្ត សាសនាអ៊ីស្លាម និងសាសនារបស់ជនជាតិជ្វីហ្វ។ នៅពេលគេនិយាយពីហ្សេរុយសាឡឹមខាងកើត គេមិនអាចមិននិយាយពីទីលានវិហារអ៊ីស្លាមដែលកំពុងផ្ទុះហិង្សារវាងប៉ាឡេស្ទីន និងអ៊ីស្រាអែលពេលនេះទេ។ ទីលានវិហារអ៊ីស្លាមនៅហ្សេរុយសាឡឹមខាងកើតដែលប៉ាឡេស្ទីនហៅអាល់ អាសា និងអ៊ីស្រាអែលហៅប្រាសាទភ្នំជាទីកន្លែងសក្ការៈទី៣ របស់អ្នកកាន់សាសនាអ៊ីស្លាមនៅទូទំាងពិភពលោក បន្ទាប់ពីទីសក្ការៈក្នុងទីក្រុងឡាម៉េក និងមេឌីននៅប្រទេសអារ៉ាប៊ីសាអូឌីត។ មានតែប្រជាជនអ៊ីស្លាមទេដែលត្រូវបានអនុញ្ញាតឲ្យចូលទៅកាន់ទីលានវិហារអ៊ីស្លាមនោះដើម្បីក្រាបបន់ស្រន់។
ចំណែកអ្នកកាន់សាសនាជ្វីហ្វក៏ត្រូវគេអនុញ្ញាតដែរ តែមានម៉ោងកំណត់ច្បាស់លាស់ និងស្ថិតក្រោមការយាមកាមក្នុងកម្រិតខ្ពស់បំផុត។ សរុបមកវិញ អ្វីដែលគ្រប់គ្នាកំពុងបារម្ភពីរូបភាពនៃអំពើហិង្សានៅហេ្សរុយសាឡឹមខាងកើតពេលនេះ គឺសង្រ្គាមចោលដុំថ្មដែលគេហៅអ៊ីនទីហ្វាដា។ សង្រ្គាមមួយនេះធ្លាប់បានកើតឡើងចំនួនពីរលើកដែលលើកទី១ពីឆ្នាំ ១៩៨៧ ដល់ឆ្នាំ ១៩៩៣ និងលើកទី២ ពីឆ្នាំ ២០០០ ដល់ឆ្នាំ ២០០៣។ វាហាក់ដូចជារហ័សពេកដែលគេហ៊ានលើកឡើងពីសង្រ្គាមអ៊ីទីនហ្វាដាលើកទី៣។ តែជារឿងចៀសមិនរួច ប្រសិនបើស្ថានការណ៍នៅតែបន្តដូចសព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ