អ៊ីស្រាអែល-ប៉ាឡេស្ទីន ៖ ផ្ទុះបាតុកម្មជាថ្មីនៅហ្សេរុយសាឡិម និងការបាញ់រ៉ុកកែតចេញពីតំបន់ហ្កាហ្សា
នៅថ្ងៃសៅរ៍ទី ២៤មេសានេះ ភាពតានតឹងបានប៉ោងឡើងជាថ្មី រវាង ប៉ាឡេស្ទីន និងកងកម្លាំងអ៊ីស្រាអែល។ មានការប៉ះទង្គិចជាថ្មី ជាបន្តបន្ទាប់នៅហ្សេរុយសាឡិមផង បាតុកម្មរបស់ពលរដ្ឋប៉ាឡេស្ទីននៅតំបន់ស៊ីហ្សកដានីក្រោមអាណានិគមអ៊ីស្រាអែលផង និងមានការបាញ់គ្រាប់រ៉ុកកែតជាច្រើនចេញពីតំបន់ហ្កាហ្សាសំដៅទឹកដីអ៊ីស្រាអែលទៀត។
ចុះផ្សាយនៅថ្ងៃ៖ កែប្រែថ្ងៃទី៖
រងើកកំហឹងបានចាប់ហុយឡើងជាថ្មី តាំងពីថ្ងៃព្រហស្បតិ៍ ក្រោយពីប៉ូលិសអ៊ីស្រាអែល ដាក់បម្រាមមិនឱ្យពលរដ្ឋប៉ាឡេស្ទីនអង្គុយនៅមាត់ច្រកចូលក្រុងចាស់ តាមទម្លាប់នាខែតមអាហារ តែអនុញ្ញាត ឱ្យក្រុមស្តាំជ្រុលនិយមអ៊ីស្រាអែលធ្វើបាតុកម្មនៅក្បែរទីនោះ ទើបត្រូវបានប៉ាឡេស្ទីន យល់ថាជាទង្វើបង្កហេតុ។
ការប៉ះទង្គិចយ៉ាងហិង្សាខ្លាំងមិនធ្លាប់មាននៅទីក្រុងចាស់ ក្រុងសក្តិសិទ្ធក៏បានផ្ទុះឡើង។ ក្រោយបាតុកម្មអស់ពេញមួយយប់ថ្ងៃព្រហស្បតិ៍ រវាងម្ខាងជាបាតុករប៉ាឡេស្ទីន ម្ខាងជាបាតុករអ៊ីស្រាអែលជាតិនិយមជ្រុល ការប៉ះទង្គិចហិង្សារវាងជនប៉ាឡេស្ទីននិងប៉ូលិសអ៊ីស្រាអែលបានកើតឡើង បណ្តាលឱ្យមានរបួសជាង១២០នាក់ នៅទីលានវិហារអ៊ីស្លាម ដែលជាក្រុងសក្តិសិទ្ធទីបីរបស់សាសនាអ៊ីស្លាម និងដែលមានប្រជាជនរាប់សិបពាន់នាក់កំពុងសូត្រធម៌។ បាតុករប៉ាឡេស្ទីនជាច្រើនក្រុមទៀត បានទៅប្រមូលផ្តុំគ្នានៅជាច្រើនកន្លែងផ្សេងទៀត នៅតំបន់ហ្សេរុយសាឡិមខាងកើត ដែលសុទ្ធតែត្រូវបញ្ចប់ដោយការប៉ះទង្គិចយ៉ាងហិង្សា និងបន្តរហូតដល់ថ្ងៃសុក្រទី ២៣មេសាទៀត។
មិនបានធូរស្បើយ នៅយប់ថ្ងៃសុក្រឆ្លងចូលថ្ងៃសៅរ៍ រ៉ុកកែតចំនួន៣៦គ្រាប់បានបាញ់ចេញពីតំបន់ហ្កាហ្សា ដែនដីប៉ាឡេស្ទីនមួយដុំទៀតដែលនៅដាច់ពីស៊ីហ្សកដានីនិងហ្សេរុយសាឡិម។ ប្រព័ន្ធខែលមីស៊ីលអ៊ីស្រាអែល ចាប់បាន៦គ្រាប់ ហើយគ្រាប់រ៉ូកកែតផ្សេងបានធាក់លើដីវាលអ៊ីស្រាអែល។ ជាចម្លើយតប រថក្រោះ យន្តហោះចម្បាំង ឧទ្ធម្ភាគចក្រនៃកងយោធាអ៊ីស្រាអែលបានផ្លោងគ្រាប់ បាញ់ សំដៅលើទីតាំងរបស់ពួកចលនាហាម៉ាសដែលគ្រប់គ្រងតំបន់ហ្កាហ្សា តាំងពីឆ្នាំ២០០៧មក។ ប៉ុន្តែទោះមានកិច្ចព្រមព្រៀងឈប់បាញ់ជាមួយអ៊ីស្រាអែល ណក៏តំបន់ហ្កាហ្សានេះធ្លាប់ជាសមរភូមិសង្គ្រាមបីលើកមកហើយ (២០០៨-២០១២-២០១៤) រវាងអ៊ីស្រាអែលនិងចលនាហាម៉ាសប៉ាឡេស្ទីន។
អំពើហិង្សាថ្មីនេះ បានជំរុញឱ្យមានប្រតិកម្មជាច្រើន។ សហរដ្ឋអាមេរិកបានសម្តែងការព្រួយបារម្ភ។ ចំណែកហ្សកដានី ប្រទេសជិតខាង ដែលជាគ្រប់គ្រងរដ្ឋបាលទីតាំងវិហារសាសនាអ៊ីស្លាមនៅហ្សេរុយសាឡិម បានប្រកាសថ្កោលទោសការវាយប្រហារបែបរើសអើងរបស់អ៊ីស្រាអែលទៅលើពលរដ្ឋប៉ាឡេស្ទីន និងបានអំពាវនាវឱ្យសហគមន៍អន្តរជាតិបញ្ចេញសកម្មភាពការពារពលរដ្ឋប៉ាឡេស្ទីននេះ។ នេះក៏ជាសារព្រមានអ៊ីស្រាអែលថាមិនអាចប៉ះពាល់ក្រុងហ្សេរុយសាឡិមបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ