អឺរ៉ុបដាក់គំនាបឱ្យអ៊ីស្រាអែលបញ្ចប់ការពង្រីកដែនអាណានិគម
មានជនប៉ាឡេស្ទីន ប្រមាណ១៥នាក់ត្រូវចាប់ខ្លួន នៅក្នុងការប៉ះទង្គិចសាជាថ្មី រវាងបាតុករនៅទីក្រុងហ្សេរុយសាឡិមខាងកើត ជុំវិញការពង្រីកដែនអាណានិគមអ៊ីស្រាអែល។ ប្រឈមនឹងស្ថានការណ៍បែបនេះ បារាំង អាល្លឺម៉ង់ អង់គ្លេស អ៊ីតាលី និងអេស្ប៉ាញ បានស្នើសុំឱ្យអ៊ីស្រាអែលបិទបញ្ចប់នយោបាយពង្រីកដែនអាណានិគមកិច្ច និងបញ្ឈប់ការបណ្តេញពលរដ្ឋប៉ាឡេស្ទីនពីទីក្រុងហ្សេរុយសាឡិមខាងកើត។ នេះបើតាមសេចក្តីថ្លែងការណ៍រួមចេញផ្សាយនៅល្ងាចថ្ងៃព្រហស្បតិ៍ទី ៦ឧសភា ២០២១។
ចុះផ្សាយនៅថ្ងៃ៖
ស្តាប់ - ០១:៥១
ប្រទេសធំៗនៅអឺរ៉ុបចំនួន៥ប្រទេស បានទទូចឱ្យរដ្ឋាភិបាលអ៊ីស្រាអែល ប្តូរចិត្ត បញ្ឈប់ផែនការពង្រីកដែនអាណានិគមកិច្ច តាំងពីឆ្នាំ១៩៩៧មក ដោយសាងសង់លំនៅដ្ឋានចំនួន ៥៤០អាគារ នៅ Har Homa E នៃតំបន់ស៊ីហ្សកដានីដែលស្ថិតក្រោមអាណានិគមអ៊ីស្រាអែល និងទទូចឱ្យបិទបញ្ចប់នយោបាយពង្រីកដែនអាណានិគម ក្នុងតំបន់រស់នៅរបស់ប្រជាពលរដ្ឋប៉ាឡេស្ទីន។
បើតាមសេចក្តីថ្លែងការណ៍រួមរបស់រដ្ឋាភិបាលបារាំង អង់គ្លេស អាល្លឺម៉ង់ អេស្ប៉ាញ និងអ៊ីតាលី រដ្ឋាភិបាលអ៊ីស្រាអែលថែមទាំងបានពន្លឿនការធ្វើអាណានិគមកិច្ច នៅ Givat HaMatos និងបន្តបណ្តេញប្រជាពលរដ្ឋប៉ាឡេស្ទីន នៅហ្សេរុយសាឡិមខាងកើត ជាពិសេសនៅសង្កាត់ Sheikh Jarrah ទៀត។ ការធ្វើអាណានិគមកិច្ចអ៊ីស្រាអែលនេះ ជាទង្វើរំលោភច្បាប់អន្តរជាតិ និងគំរាមកំហែងទស្សនវិស័យនៃការចរចាស្វែងរកសន្តិភាពអ៊ីស្រាអែលនិងប៉ាឡេស្ទីនខ្លាំងណាស់។ នេះបើតាមការគូសបញ្ជាក់បន្ថែមរបស់អឺរ៉ុប ដោយអំពាវនាវឱ្យភាគីទាំងពីរបញ្ឈប់រាល់គ្រប់សកម្មភាពជាឯកតោភាគី និងវិលមកបើកកិច្ចចរចាហ្មត់ចត់មួយឈានឆ្ពោះទៅរកការបង្កើតរដ្ឋពីររស់ទន្ទឹមគ្នា។
សេចក្តីថ្លែងការណ៍អឺរ៉ុប ធ្វើឡើងក្រោយពីមានការប៉ះទង្គិចហិង្សាជាថ្មី តាំងពីថ្ងៃពុធនិងមានការចាប់ខ្លួនបាតុករប៉ាឡេស្ទីនថែម១៥នាក់ទៀត នៅថ្ងៃព្រហស្បតិ៍ទី ៦ឧសភា។ បាតុករប៉ាឡេស្ទីននាំគ្នាតវ៉ាព្រោះតុលាការកំពូលអ៊ីស្រាអែល ត្រូវផ្តល់សេចក្តីសម្រេច លើសំណុំរឿងបណ្តេញគ្រួសារប៉ាឡេស្ទីន ៤គ្រួសារ ត្រូវជា៧០នាក់ ចេញពីក្រុងហ្សេរុយសាឡិមក្នុងសង្កាត់ចាស់ដែលជនអ៊ីស្រាអែលនិងប៉ាឡេស្ទីនតែងប៉ះទង្គិចគ្នា និងក្នុងក្របខ័ណ្ឌនៃការពង្រីកដែនអាណានិគមកិច្ចអ៊ីស្រាអែល។ តុលាការកំពូលអ៊ីស្រាអែលបានលើកពេលបើកសវនការទៅធ្វើនៅថ្ងៃចន្ទទី ១០ឧសភា ដែលត្រូវចំថ្ងៃអ៊ីស្រាអែលប្រារព្វខួបនៃការដណ្តើមបានក្រុងហ្សេរុយសាឡិមមួយចំហៀងផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ