ហេតុអ្វីបានជាកូនប្រុសសពអតីតមេដឹកនាំផ្តាច់ការលីប៊ីកាដាហ៊្វីចូលប្រឡូកក្នុងឆាកនយោបាយ?
ចុះផ្សាយនៅថ្ងៃ៖
ស្តាប់ - ០៦:១៤
នៅក្នុងប្រទេសលីប៊ី លោកសាយីហ្វ អាល់ អ៊ីស្លាម កាដាហ៊្វីបានប្រកាសឈរឈ្មោះជាបេក្ខជនប្រធានាធិបតីសម្រាប់ការបោះឆ្នោតដែលគ្រោងរៀបចំនៅថ្ងៃទី២៤ ធ្នូខាងមុខ។ សាយីហ្វ អាល់ អ៊ីស្លាម កាដាហ៊្វីជាកូនប្រុសរបស់សពអតីតមេដឹកនាំផ្តាច់ការកាដាហ៊្វី។ អ្វីជាការកត់សម្គាល់ រូបសាយីហ្វ អាល់ អ៊ីស្លាម កាដាហ៊្វីកំពុងជាប់ជំពាក់វាក់វិននឹងរឿងអាស្រូវតុលាការ ពិសេសតុលាការព្រហ្មទ័ណ្ឌអន្តរជាតិក្រុងឡាអេដែលកំពុងតាមចាប់ខ្លួន។ តើវត្តមានរបស់សាយីហ្វ អាល់ អ៊ីស្លាម កាដាហ៊្វីនៅក្នុងឆាកនយោបាយនឹងជួយស្រោចស្រង់ប្រទេសឲ្យងើបផុតពីការហែកហួរផ្ទៃក្នុង ឬមួយក៏រុញទម្លាក់ប្រទេសឲ្យធ្លាក់ក្នុងជ្រោះកាន់តែជ្រៅថែមទៀត?។
ពិតជារឿងគួរឲ្យភ្ញាក់ផ្អើល និងគ្មាននរណានឹកស្មានដល់សោះឡើយថា បន្ទាប់ពីបានបាត់មុខអស់មួយរយៈពេលយូរមក ស្រាប់តែសាយីហ្វ អាល់ អ៊ីស្លាម កាដាហ៊្វីបានលេចមុខគ្រលើម និងថែមទាំងបានប្រកាសឈរឈ្មោះជាបេក្ខជនប្រធានាធិបតីសម្រាប់ការត្រៀមបោះឆ្នោតនៅចុងឆ្នាំ ២០២១ នេះទៀតផង។ មានអាយុ ៤៩ឆ្នាំ មានពុកចង្ការស ខ្មៅ ជូតកន្សែងក្បាល និងស្លៀកពាក់ដូចឱពុក សាយីហ្វ អាល់ អ៊ីស្លាម កាដាហ៊្វីជាកូនប្រុសទី២ របស់សពអតីតមេដឹកនាំផ្តាច់ការលីប៊ីកាដាហ៊្វី។ គួររម្លឹកថា មេដឹកនាំផ្តាច់ការលីប៊ីកាដាហ៊្វីដែលត្រូវបានសម្លាប់នៅក្នុងមហាបដិវត្តប្រជាជនក្នុងឆ្នាំ ២០១១ មានប្រពន្ធ ២នាក់ និងមានកូនសរុបចំនួន ៧នាក់។
តែរូបសាយីហ្វ អាល់ អ៊ីស្លាម កាដាហ៊្វីដែលជាកូនប្រុសទី២ ត្រូវបានគេមើលឃើញថា ជាអ្នកដែលត្រូវស្នងតំណែងពីឱពុក។ មែនទែនទៅ ការប្រកាសឈរឈ្មោះជាបេក្ខជនប្រធានាធិបតីរបស់សាយីហ្វ អាល់ អ៊ីស្លាម កាដាហ៊្វីសម្រាប់ការបោះឆ្នោតខាងមុខជារឿងដែលគេបានទន្ទឹងរង់ចាំ។ ទន្ទឹងរង់ចាំព្រោះនៅក្នុងបទសម្ភាសន៍ជាមួយកាសែតអាមេរិក New York Times នារដូវក្តៅកន្លងទៅថ្មីៗនេះ សាយីហ្វ អាល់ អ៊ីស្លាម កាដាហ៊្វីធ្លាប់បានបង្ហាញចេញនូវមហិច្ឆតានយោបាយ និងឆន្ទៈរបស់ខ្លួនក្នុងការស្តារឯកភាពប្រទេសដែលបាត់បង់។ តាមសាយីហ្វ អាល់ អ៊ីស្លាម កាដាហ៊្វី លីប៊ីសព្វថ្ងៃកំពុងស្ថិតក្នុងស្ថានភាពលំបាកខ្លាំងដោយគ្មានលុយកាក់ និងគ្មានសន្តិសុខ។
បន្ទាប់មក កូនប្រុសរបស់សពអតីតមេដឹកនាំផ្តាច់ការកាដាហ៊្វីរូបនេះដដែលមិនភ្លេចរម្លឹកនូវព្រឹត្តិការណ៍នៃការទម្លាក់ និងការសម្លាប់ឱពុកខ្លួនកាលពី ១០ឆ្នាំមុនទេ។ តាមសាយីហ្វ អាល់ អ៊ីស្លាម កាដាហ៊្វី ព្រឹត្តិការណ៍ឆ្នាំ ២០១១ មិនមែនជាបដិវត្តដែលចម្លងចេញពីបដិវត្តអារ៉ាប់ទេ តែជាសង្រ្គាមស៊ីវិល និងជាថ្ងៃខ្មៅងងឹតរបស់លីប៊ី។ គួររម្លឹកថា នៅក្រោយការដួលរលំរបបដឹកនាំរបស់ឱពុកក្នុងឆ្នាំ ២០១១ សាយីហ្វ អាល់ អ៊ីស្លាម កាដាហ៊្វីដែលបានសន្យាធ្វើការសងសឹកជំនួសឱពុកបានព្យាយាមរត់ចេញពីប្រទេស។ តែត្រូវបានក្រុមអ្នកបដិវត្តចាប់ខ្លួនក្នុងខែវិច្ឆិកា ឆ្នាំ ២០១១ និងតាំងពីឆ្នាំ ២០១១ ដដែល តុលាការព្រហ្មទ័ណ្ឌអន្តរជាតិក្រុងឡាអេក៏បានចេញដីកាតាមចាប់ខ្លួនសាយីហ្វ អាល់ អ៊ីស្លាម កាដាហ៊្វីក្នុងបទឧក្រិដ្ឋកម្មសង្រ្គាម និងបទឧក្រិដ្ឋកម្មប្រឆាំងមនុស្សជាតិ។
ក្រោយមកក្នុងឆ្នាំ ២០១៥ សាយីហ្វ អាល់ អ៊ីស្លាម កាដាហ៊្វីរួមទាំងអតីតថ្នាក់ដឹកនាំក្នុងរបបចាស់ ៨នាក់ទៀតត្រូវបានតុលាការពិសេសក្រុងទ្រីប៉ូលីកាត់ទោសប្រហារជីវិត។ តែបញ្ហានៅត្រង់ថា ក្រុមអ្នកបដិវត្តបានបដិសេធមិនប្រគល់រូបសាយីហ្វ អាល់ អ៊ីស្លាម កាដាហ៊្វីទៅឲ្យតុលាការពិសេសលីប៊ីក៏ដូចជាទៅឲ្យតុលាការព្រហ្មទ័ណ្ឌអន្តរជាតិក្រុងឡាអេ និងសុខចិត្តបន្តឃុំរូបសាយីហ្វ អាល់ អ៊ីស្លាម កាដាហ៊្វីដោយខ្លួនឯងរហូតដល់ឆ្នាំ ២០១៧ទើបដោះលែងឲ្យមានសេរីភាពវិញ។ តែគេមិនត្រូវភ្លេចនិយាយទេថា រូបគេបន្តស្ថិតក្នុងការស្វែងចាប់ខ្លួនពីតុលាការព្រហ្មទ័ណ្ឌអន្តរជាតិក្រុងឡាអេដដែល។ ទោះជាយ៉ាងណាក៏ដោយ រឿងរ៉ាវមួយនេះមិនបានធ្វើឲ្យសាយីហ្វ អាល់ អ៊ីស្លាម កាដាហ៊្វីព្រឺឆ្អឹងខ្នង និងមិនបានរារាំងរូបគេមិនឲ្យចូលប្រឡូកក្នុងឆាកនយោបាយនាពេលនេះទេ។
តើវត្តមានរបស់សាយីហ្វ អាល់ អ៊ីស្លាម កាដាហ៊្វីនៅក្នុងឆាកនយោបាយលីប៊ីពេលនេះជាដំណឹងល្អ ឬជាដំណឹងអាក្រក់សម្រាប់ប្រទេស និងប្រជាជនលីប៊ី?។ ចម្លើយ ជាដំណឹងល្អផង និងជាដំណឹងអាក្រក់ផង។ ជាដំណឹងល្អ ព្រោះវាបានធ្លាក់មកចំពេលដែលប្រទេសកំពុងបន្តហែកហួរគ្នាដោយនៅម្ខាង តំបន់ប៉ែកខាងកើតកំពុងស្ថិតក្រោមការគ្រប់គ្រងរបស់សេនាប្រមុខខាលីហ្វា ហាវតារ។ ចំណែកនៅម្ខាងទៀត តំបន់ប៉ែកខាងលិចកំពុងដឹកនាំដោយនាយករដ្ឋមន្រ្តីលោកអាប់ឌែល ហាមីត ដេបា។ កំណត់សម្គាល់មួយទៀត សេនាប្រមុខហាវតារ និងនាយករដ្ឋមន្រ្តីហាមីត ដេបាទទួលបានការគាំទ្រពីបរទេសរៀងៗខ្លួន។ នាយករដ្ឋមន្រ្តីលោកហាមីត ដេបាទទួលបានការគាំទ្រពីប្រទេសតួកគី។
សេនាប្រមុខហាវតារទទួលបានការគាំទ្រពីប្រទេសរុស្ស៊ី អេហ្ស៊ីប និងអេមីរ៉ាតអារ៉ាប់រួម ហើយរូបសាយីហ្វ អាល់ អ៊ីស្លាម កាដាហ៊្វីក៏ទទួលបានការគាំទ្រពីរុស្ស៊ីដូចសេនាប្រមុខហាវតារដែរ។ អ៊ីចឹងហើយបានជាមានសំណួរចោទឡើងថា តើរុស្ស៊ីកំពុងលេងល្បែងអ្វីជាមួយសេនាប្រមុខហាវតារ និងរូបសាយីហ្វ អាល់ អ៊ីស្លាម កាដាហ៊្វី។ យ៉ាងណាក៏ដោយ វត្តមានរបស់សាយីហ្វ អាល់ អ៊ីស្លាម កាដាហ៊្វីនៅក្នុងឆាកនយោបាយលីប៊ីពេលនេះអាចជះផលវិបាកដល់គំនិតផ្តួចផ្តើមអន្តរជាតិក្នុងការផ្សះផ្សារជាតិរវាងសេនាប្រមុខហាវតារ និងនាយករដ្ឋមន្រ្តីហាមីត ដេបា។
ចូរកុំភ្លេចថា គំនិតផ្តួចផ្តើមអន្តរជាតិសម្រាប់លីប៊ីមិនបានគិតដល់តួអង្គនយោបាយថ្មីក្រៅពីគូប្រជែងដែលកំពុងបន្តដណ្តើមអំណាចគ្នាតាំងពីប៉ុន្មានឆ្នាំចុងក្រោយនេះទេ។ មែនទែនទៅ ប្រជាជនលីប៊ីមិនជំទាស់នឹងវត្តមានរបស់សាយីហ្វ អាល់ អ៊ីស្លាម កាដាហ៊្វីនៅក្នុងឆាកនយោបាយលីប៊ីពេលនេះទេ។ តែអ្វីដែលពួកគេបារម្ភ និងកំពុងចោទសួរនោះគឺថា តើការចូលក្នុងឆាកនយោបាយរបស់រូបសាយីហ្វ អាល់ អ៊ីស្លាម កាដាហ៊្វីពេលនេះមិនមែនជាសញ្ញានៃការវិលត្រឡប់ជាថ្មីនូវរបបផ្តាច់កាដាហ៊្វីទេ ឬយ៉ាងណា?។ គេត្រូវរង់ចាំចម្លើយចំពោះសំណួរនេះនាពេលខាងមុខ។ អ្វីដែលគេអាចនិយាយបាន វត្តមានរបស់កូនប្រុសសពអតីតមេដឹកនាំផ្តាច់ការកាដាហ៊្វីនៅក្នុងឆាកនយោបាយពេលនេះនឹងធ្វើឲ្យស្ថានការនយោបាយលីប៊ីដែលកំពុងស្រពិចស្រពិលស្រាប់នឹងធ្លាក់ក្នុងភាពមិនច្បាស់លាស់កាន់តែខ្លាំងថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ